4月27將會係荷蘭既國王日,到時到底會有幾熱鬧哩﹖ 回望前半生,大部份時間都係病床上面渡過,總覺得自己好快會死,於是從來都唔做人生規劃。直到2012年親人同愛犬相繼離世,好想去改變,於是係2013年既二月,第一次離開亞洲地區,第一次展開超過七天的旅程,直奔挪威,漫遊左十四日,幸運地遇上北極光,自始愛上旅遊。 自知應變能力不佳,唯有每次出發前都盡量搜集資料,務求將可預見既變數盡量納入計劃同掌握之內,這麼一來,當你抱著最壞打算既心態出發,沒有遇上就當係好事,旅途上的心情也會比較輕鬆﹗只是,要搜集這麼多的資料,也是挺花氣力和時間的,所以,過往都要早在旅程前三、四個月開始準備﹗﹗2016年同朋友去南美,更花了超過6個月既時間計劃。 始終三歲定八十,一個本來就無計劃既人,就始終都係無計劃,當慢慢習慣左外遊模式,當發現有尐國家既交通/城市規劃都係大同小異,個人就會開始鬆懈,繼而變得怠慢﹗﹗ 今日已經係4月16號,我地20號晚就要搭凌晨機出發到比利時,之但係,家陣都未定好行程,係咪有啲過份哩﹗﹗ 一路都比借口自己,一來荷蘭、比利時同盧森堡都唔大,又近,繼而行程彈性比較大﹗二來,此行重點係影花,根據官網,鬱金香未開,怕太早去到KEUKENHOF會空手而回,所以一直無法落實行程﹗ 依家只係訂左住宿,到時點樣走都真係要執生﹗ 4月21(DAY 1)- ROTTERDAM留宿一晚 凌晨機由香港出發,直航到比利時BRUSSELS,一落機就直接搭火車過ROTTERDAM。 比利時有個有趣既乘車優惠,叫RAIL PASS 10(26歲以下則用GO PASS 10),只需77EURO,就可以係比利時境不論遠近咁搭乘10次國營既火車(2等車廂)﹗假如我地係BRUSSELS過ROTTERDAM,就可以利用哩個PASS坐到比利時最近荷蘭國界既ESSEN站,加多張ESSEN到ROTTERDAM既車票(唔使轉車),咁就可以慳返尐,詳情遲尐再講﹗不過要留意既係,由機場出發,要比多一個叫DIABOLO FEE既野,依家好似係5.3EURO,到時買完先再報告。 我地落機時間係當地時間早上7點幾,由BRUSSELS過ROTTERDAM應該係2個鐘以內既車程,姐係我地會有一整天既時間係ROTTERDAM市內遊走,應該有足夠時間來個鹿特丹現代建築之旅﹗ 4月22 至23(DAY 2 - DAY 3) - AMSTERDAM留宿兩晚 由ROTTERDAM返AMSTERDAM,留宿兩晚。係荷蘭境內,應該會用到一張叫OV CARD既東東,性質同香港八達通差不多,預先儲值,就可以隨意搭乘荷蘭既公共交通工具﹗之但係哩張咭要先比7.5EURO(你可理解為開咭費或手續費,總之哩7.5 EURO就無得退,亦不含車資),本來覺得成本貴唔抵買,但後來發現佢有佢既好處,於是又決定買,買左再報告﹗﹗ 由ROTTERDAM返AMSTERDAM中間應該可以去KINDERDIJK(小孩堤防)睇風車,甚至去埋THE HAGUE/DEN HAAG(海牙)同DELFT(台夫特)玩﹗依家日照長,夜尐先返AMSTERDAM應該無問題,而且我地就住係中央車站,方便移動﹗ 23號星期一,假如開花情況理想的話,應該可以去KEUKENHOF睇鬱金香同踩單車,一日點都夠玩,只希望星期一當地遊客會無咁多﹗﹗若然未開,就先去ZAANSE SCHANS睇風車或UTRECHT(烏特勒支)之類行下。 4月24(DAY 4) - GIETHOORN(羊角村)留宿一晚 從AMSTERDAM過GIETHOORN(羊角村),係要轉火車再轉巴士,為免論盡,只會帶背包,而行履箱就寄存係AMSTERDAM既酒店? 4月25 至27(DAY 5 - DAY 7) - AMSETERDAM留宿三晚 話說27號KING'S DAY,交通應該會相當混亂,就安心留係市內,感受下熱鬧氣氛。 剩返兩日,假如星期一無去到睇鬱金香就要26號(星期四)去睇。其實仲有一個地方叫KERSENBLOESEMPARK,個度好似會有櫻花,假如有時間都想過去八掛下,唔知點分配時間好﹗﹗ 4月28(DAY 8) - MAASTRICH留宿一晚 點解要係馬斯垂克住一晚﹖當然係為左影相啦﹗ 4月29(DAY 9 ) - LUXEMBOURG留宿一晚 由MAASTRICHT過LUXEMBOURG,姐係要由荷蘭路經比利時再過盧森堡,既然我地買左比利時既RAIL PASS,當然要善用啦﹗﹗哩段路程,就可以買一張由MASSTRICHT去最近既比利時城市LIEGE GUILLEMINS,加一張ARLON(最近盧森堡既比利時城市)去LUXEMBOURG,跟住加我地既RAIL PASS,聽落好複雜,但實情係唔使轉車,只要預先預備好車票,安心登上一架由MASSTRICHT去LUXEMBOURG既火車就可以,搞咁多野,又慳到幾多錢﹖遲尐報告﹗ 4月30 至5月4(DAY10 - DAY 14) - BRUSSELS留宿五晚 離開LUXEMBOURG再返BRUSSELS,比利時唔大,一日係BRUSSELS(布魯塞爾)市內遊,一日過GENT(根特),一日去BRUGGE(布魯日),到時睇情況,如果有時間就過ANTWERWERP(安特衛普)同LEUVEN(魯汶)行下,咁樣來來回回,個張RAIL PASS 應該就用哂。 依家有人貪心,睇下可唔可以偷到時間過去PARIS到此一遊一下﹗﹗不過假如過巴黎就要搭貴車THALYS,係咪要訂左先哩﹖﹖哈哈,懶同貪心中間係要取捨既,都係時候認真安排行程,準備出發啦﹗﹗ 5月5日(DAY 15),中午1點就要登機返香港啦﹗﹗即使行程未開始,一諗到要回程,個心就沈一沈﹗ 除左比利時既RAIL PASS,DIABOLO FEE,荷蘭既OV CARD要研究清楚,其實仲有一個疑問一直都解唔開﹗﹗ 去外國玩,有時用票機買火車票,或去無服務員既油站入油,都需要用信用咭付款,而咭機會要求你輸入一組4個字既PIN CODE,但到底哩組PIN CODE係咩,一直都無法解讀。 我地試過入0000,入過1111,亦試過8888又或1234,同行朋友試過入銀聯個組PIN CODE,甚至唔入直接按ENTER都試過,結果都係付款被拒既﹗﹗哩幾年斷斷續續打過電話去香港各大銀行問過,結果係無人識答。上星期試下再打去匯豐問,個位姐姐仲搞笑,佢問,你有無上網睇過其他人點做呀﹖﹗哈,咁得意﹗﹗我無諗過一個CS會叫我上網自己搵答案﹗﹗ 網上眾說紛紜,有人話以上既0000係得既,之但係我地真係試過唔得喎,點先﹗﹗有人就話可以試入返信用信用咭個組現金提款個個密碼(6個字架喎大佬),再者,從來無諗過用信用咭透支,根本唔會記得自己密碼﹗好,既然有人咁講,我又即管搵返個密碼今次試下﹗﹗試到返來報告﹗(係外國,去自動售票機買車票, 正常泥講係會平過去服務櫃台買既)