話說上星期一約左朋友食晏，大家都係食素既朋友，係懶得諗既情況下，於是又約返係銅鑼灣登龍街個間樓上素食館，哈哈，食物好味就梗架啦，但點解又要再寫，總有原因既﹗﹗ 最初仲擔心午飯時間既銅鑼灣食店會多人，一齊食飯個幾位朋友都唔趕返工，所以就約左一點半，但最後始終都係一點鐘就到齊人，可能係樓上舖掛，客人比預計既少，餐廳只得三四檯客﹗啱哂，唔使迫，又唔怕會阻住人做生意﹗之不過，哩啲咁既情況，就始終都會擔心，一間咁有質素既小店，假如客人唔夠，無法繼續經營就慘啦﹗﹗不過，作為一個只係耐唔使幫襯一兩次既人客，都做唔到啲咩，唯有用心去細嚐老闆娘既手藝﹗﹗ 銅鑼灣食晏，HKD88一位唔使加一，係咪抵食先 我要左個南瓜湯 朋友就點左沙津 黑松露蘑菇意粉 日式海苔蟹味蘑菇意粉 我既辣豆乳芝麻野菜意粉 星期一限定 - 糯米糍 真係一食難忘 正式既皮薄饀靚 主菜依然對味可口，我試左個辣豆乳意粉，意粉軟硬度啱啱好，我好怕食個啲糊仔意粉既，最初想轉烏冬，好彩老闆娘都KEEP到，意粉依然係AL DENTE既質地，加埋辣辣地既汁，份外惹味﹗﹗ 最初都無諗住加錢要甜品，亦無唯意甜品係咩﹗點知食完傾傾下計，老闆娘問要唔要糯米糍﹗咁得意﹖甜品係糯米糍﹖﹖又即管照要當支持下﹗ 嘩，拎上手已經知道老闆娘無介紹錯，個糯米糍既皮好軟綿綿架，一咬落去，個皮薄到哩﹗﹗入面啲饀已經湧哂出泥﹗﹗花生黑芝麻，唔太甜，就就炒得好香﹗﹗真係唔比手指公都唔得﹗﹗ 後來老闆娘話，原來係佢媽媽親手整架，原來一直幫忙樓面個位老太太就係老闆娘個媽媽，真係有眼不識泰山﹗﹗最初諗住佢最多七十，後來傾下傾下，原來老太太已經年屆八十，真係睇佢唔出，仲好精伶，動作又矯捷﹗老闆娘話，糯米糍只係星期一限定，皆因又想比佢媽媽有啲勢藝，但又唔想佢太操勞，所以佢周末整完，周一就放係舖賣﹗﹗ 繼佢晚市個個炸薯波之外，真心覺得哩個糯米糍都無得輸﹗﹗後來買左兩個返屋企，夜晚煮完飯先同大叔慢慢食，一直都放係室溫，但到夜晚食都依然係咁軟滑﹗感覺真好﹗﹗ 相關閱讀：滋味素食
