由BRUNY ISLAND既渡輪碼頭開左大概30分鐘車，送左個幾個以工作假期簽証逗留既女生去BERRY FARM之後，就再向ADVENTURE BAY方向開車，搵到我地當晚既AIRBNB﹗不過，因為要騰空坐位比個幾個少女，係匆忙間原來整爛左幾隻雞蛋呀，嗚嗚。。。害我抹左一輪﹗ 哩間係ADVENTURE BAY既小屋唔係我地既第一選擇，其他近景點既全部都早已被預訂，好彩BRUNY ISLAND唔大，所以諗住住遠少少都唔緊要，搵左一輪，先錯有錯著搵到哩間﹗﹗因為屋主係香港人，所以溝通過程全程用中文，屋主知我地鍾意影相，仲推介左附近既景點，例如話我地知邊度可以影白色既沙袋鼠，另外，屋既附近有個叫TWO TREE POINT既地方亦可以影相，之類﹗仲提我地，島上只有OPTUS電話咭有訊號﹗﹗哈哈，確實，全程都好安靜既OPTUS電話咭，一到島上就突然變得活躍，反而係TELSTRA就收唔到﹗所以，再一次，真係唔好依賴哂一張電話咭﹗雖則話全程TELSTRA都收得好好，但偏偏到BRUNY ISLAND就無反應了﹗﹗ 講起BRUNY ISLAND既住宿，雖說好多旅客都會選擇以DAY TRIP型式玩BRUNY ISLAND，但相信亦有唔少人會係度留宿既，要不又點咁難搵住宿哩﹗可能本身供應就唔多掛，所以即使有都一早比人預訂哂﹗好似我地住既哩一間，一晚收費約AUD160，廚房設備齊全，有兩個房間，仲有大露台，上網睇返，未來一個月都差不多FULL哂咁滯﹗﹗真係唔講得笑﹗﹗ 在BRUNY ISLAND 租住的AIRBNB AIRBNB住人就這樣把鎖匙放在門外，治安也太好了吧﹗ 在BRUNY ISLAND留宿的AIRBNB 這晚的廚房，鬧出了笑話 這來有洗衣機，但只留宿一晚，所以沒有使用 晚上仍是有點冷，得靠火爐取爐 在屋裡能看到前園的景色 有兩個房間，我們就只兩個人，其中一間掉空了 有兩個房間，我們就只兩個人，其中一間掉空了 牆上都是手工掛畫 房東很貼心，即使在這邊多留幾晚該也不愁寂寞 好有心思，窗簾剪了星星點安，透光時很美 到埗後，抹左一輪係雞蛋蹟，稍稍整左個湯同小食，不安份守己既我地又走左出去睇日落﹗﹗如果睇地圖，你會發現BRUNY ISLAND既島型好有趣，驟眼睇會以為係兩個島，南北兩端好似有一條小橋連接咁﹗﹗我地住既ADVENTURE BAY係島既南端，係個條連接島兩端幼幼既路上面，有一個叫THE NECK LOOKOUT （TRUGANINI LOOKOUT）既地方，可以從高望到海灣既風貌。 THE NECK LOOKOUT係BRUNY ISLAND其中一個好受歡迎既CHECK POINT 哩度點解叫TRUGANINI LOOKOUT，好似係因為要紀念一個一直留守BRUNY ISLAND既原住民女人，所以以佢個名命名﹗﹗哩度既日落好靚，靚到我唔記得影相，哈哈﹗真係好靚，我覺得靚過朝早睇既WINEGLASS BAY﹗﹗哩度仲可以睇到企鵝添架，當日所見，好多遊客都帶哂望遠鏡係觀景台度等，只係我地無帶夠衫，所以影左陣相就返屋煮野食﹗﹗ THE NECK LOOKOUT 沿住樓梯上去就可以去到觀景台 要睇靚景，係要行下既 THE NECK LOOKOUT既日落 觀景台唔大，所以大家都迫住要企樓梯 真心覺得哩度既海灣靚過WINEGLASS BAY 觀景台可行落去近沙灘既位置等企鵝 THE NECK顧名思義，真係一條好窄既路，所以觀景台既兩邊都可以睇到海灣，所以既觀景台，其實只係木搭既小平台，可容立既人唔多，好多人都企哂係樓梯欣賞日落，亦有好多人專程過泥等企鵝，有興趣亦可踫踫運氣﹗﹗ 講起BRUNY ISLAND留宿既一晚，其實有件瘀到爆既事﹗﹗話說我地買左羊架作當晚既晚餐﹗屋內既窗全部都有一層紗窗，可以通風而又唔使比小昆蟲入屋，不過個晚仲係有啲凍，點住火爐無理由開窗架，但係個廚房度又搵來搵去都搵唔到有抽氣扇個掣﹗咁就出事啦﹗﹗ 哩左哩碟羊架，扛啲嚇到心臟病發﹗ 焗焗下羊架，突然屋裡面個煙冒感應器響，係好好好好嘈個隻，嘈到直頭耳鳴﹗又突如其來咁響，個下個心真係驚到震，唔知點算，又怕感應器係駁去消防局之類既地方，總之就係一大堆唔知點算既想法走哂出泥，搵緊電話打比屋主之際，大叔走埋去個響緊既煙冒感應器度拍左一拍﹗﹗阿車。。。。原來咁樣一拍，佢就唔響下﹗﹗兩條友真係笑左出泥﹗﹗原來咁兒戲既，嚇死人咩﹗﹗ 雖則嚇到差啲心臟病發，但個羊架就啱啱好，係澳洲玩，假如住宿有廚房，真係好抵架﹗係超市買肉，一般都係一百蚊左右，無論係牛豬雞羊，肉質好好，好新鮮﹗﹗好過出街食﹗﹗
