FARIY WREN係一種塔斯好經常見到既雀仔 本來今日應該係開始寫，離開SWANSEA出發到BRUINY ISLAND既事，BRUNY ISLAND，你問我，最深印象係要搭汽車渡輪，然後一到埗就見到好大粒，真係好大粒既車厘子，香港人趨之若鶩既車厘子﹗ 自備盒去買車厘子，店主有啲驚訝 到底有幾大粒﹖ 之但係一早起身出左去返學，放左學又去左搵朋友食TEA，返泥又掛住搵4月份荷蘭/比利時旅桯既住宿，都係唔寫住﹗﹗ 但我好驚一停又唔知停幾耐，咁點算好﹖﹗不如又講下下晝同朋友食TEA個間餐廳﹗﹗ 話說係葵芳上完堂，行過葵興搵個朋友傾下計﹗佢係工廠區工作，等佢做完野都已經2點半，佢話附近有間唔錯既餐廳，又即管試下﹗﹗我既概念都仲係好老土個隻，工廠區既食店，都係但求醫肚，唔會有咩驚喜，應該亦唔會有咩"格調"﹗ 哈，我哩隻井底鞋當然係錯架啦﹗餐廳就係朋友公司對面，係工廠大廈附近有個清新格局既餐廳，其實都幾格格不入，當然，亦因為咁而份外搶眼﹗﹗諗返起，之前其實都有到過附近工廠大廈樓上舖既CAFE，好似都係行清新優雅路線，大概，都係想擺脫工廠大廈既格局。 雅緻既門口，完全忘記了自己身處工廠區 入口當眼處就張貼有關食物營養既海報，應該係有心人吧﹗ 連走廊都明顯翻新過，絕不馬虎 光是早餐都好多選擇喎 茶餐都有六頁 茶餐都有六頁 茶餐都有6頁 餐廳裡裝條就是清新雅緻 好可愛既壁畫 餐廳環境都好寬敞 好似曲奇一樣咁脆口既薯蓉，不過個田螺都好味既 明明係卡邦尼架，點解變左白汁蜆肉意粉既 要經過一條長走廊先到餐廳門口，連走廊都有裝修過，都OK WOR﹗門口有早餐既餐牌，使唔使咁多呀﹗﹗因為已經過左2.30，正好係下午茶時段，下午茶餐牌都有6個版面，全部都只係卅十幾蚊，連飲品，凍飲唔使加錢，果然係工廠大廈既價錢呀下﹗﹗唔錯唔錯﹗ 係門口已經見到下午茶餐有焗田螺，好耐無食過，不如就要哩個啦﹗朋友就間單咁要左個卡邦尼意粉﹗餐廳裡面既佈置都算骨子，有點簡單但顏色醒目既掛畫，有一邊有玻璃，上面畫左有趣可愛既圖案﹗ 同朋友坐左個幾鐘，客人流轉都快﹗不過哩~~~~等一陣陣，食物上檯，點解我地個卡邦尼意粉變左個白汁蜆肉意粉既哩﹗﹖細問，店員話因為無哂卡邦尼﹗哈，你真係得意，查實個白汁蜆肉意粉都好食，之但係，你係咪應該事前話聲我知，咁哩﹗﹗﹗ 又，一向唔飲奶茶咖啡既我，咳左三個星期，又唔想飲凍檸茶，於是就梗係叫熱檸茶啦，但泥到變左杯熱咖啡喎﹗個店員話我係咁叫，我話無可能囉，你話我叫錯凍/熱都仲講得通，對於一個唔飲得咖啡既人，絕對無可能叫錯架囉~~~好彩，都肯換過既﹗﹗ 至於我最期待既焗田螺哩~~~薯蓉質地幾近曲奇，而唔係平時食開好滑個種，我唔太肯定，係廚師有心想個薯蓉脆口尐吖（真係似食曲奇），定係熰過左時﹗﹗OMG~~~不過味道都唔錯既﹗ 同朋友坐左個幾鐘，整體感覺都良好既﹗﹗味道唔算好出色，中規中矩，34蚊一個茶餐，包飲品，抵食吖﹗﹗算唔錯﹗下次星期六上完堂應該可以再泥﹗﹗
