好朋友係澳洲返左泥，佢每次返港都會去食日式放題。 日式放題，均一收費，咁就梗係用餐時間越長感覺越抵啦﹗﹗如果時間許可，我一般都會約朋友去尖沙咀食中午放題，一來比晚市收費平啲，二來食足三個鐘，舒舒服服唔使趕，可以慢慢傾下計﹗刺身熟食都好味道，選擇多。店員亦醒目友善，試過諗住慢慢食，於是入左一輪單就無入，店員無耐已經提我地，話你地廚房無單架啦喎，係咪有問題﹗真心抵讚，定額收費，我地叫唔叫野食其實對佢地無咩影響，但店員既體貼實在窩心﹗﹗ 近年好少食放題，又基本來來去去都係食同一間，唔敢講佢既食物質素/款式特別好，只係，自己食開有感情，環境又舒服，所以都無刻意再去試第二間﹗記得同餐應集團早前係尖咀開左"殿"系列，係呀，食物選擇好似高級左，多左，之但係好多野食都要自己出去拎，又要排隊等，姐係同自助餐差不多，感覺反而無咁好﹗我鍾意食放題放係想安坐席上細味品嚐，而唔使走來走去吖嘛﹗﹗所以，試左"殿"系列一次，都係去返"極尚"系列食﹗ 一般放題晚市都係分兩段時間，一係就好食，一係就好晏，大概係因為自己食野，主菜係同朋友傾計而唔完全係食物度，所以無咁鐘意食晚市放題﹗早排同家人食，大家都係港島工作，如果仲要花時間過尖咀，用餐時間會被迫縮短，於是，試左"極尚"系列係銅鑼灣開既新店﹗ 用餐時間，一係就5.30-8.30，一係就8.45-11.30。食第一節的話，一係你就自己提早放工，一係就選擇唔食足三個鐘﹗問心，其實根本食唔到三個鐘，純粹係個人貪心，覺得反正比左錢，梗係坐足三個鐘抵啲﹗食第二節的話，食完又分分鐘要點幾兩點先返到屋企，真係尷尬，於是，決定提早放工，為求可以盡情享受三個鐘既美食﹗﹗ 其實食放題基本只食刺身，好少食其他熟食 點擊圖片放大 +2 銅鑼灣既新極尚，除左放題選擇，仲多左一本磯燒，好鮮甜啊 銅鑼灣既極尚，裝修比尖咀既寬落，飲品任拎，好似仲有酒精飲品選擇，都有自助式既熟食（好似有乳豬）、湯同甜品以供選擇﹗我真係只坐係位食，無行過出去，所以實際有幾多野食唔係好知。 收費雖然比尖咀個間貴，但咀尖既屋企人全部都話覺得銅鑼灣極尚比尖咀既好，我估，第時應該會再試。 本來澳洲朋友返港，話要食放題，都諗住去返哩間，之但係，其實一個朋友唔可以咁早到，而又唔願意放棄並縮短用餐時間，話。。。食放題，起碼都要兩個鐘先夠喉喎﹗﹗ 都係既，咁點好哩，我又唔想食第二時段﹗以前有部份既放題餐廳，可以比貴少少，就延長用餐時間，不過依家好似唔係好覺有﹗搵左一輪，終於比我發現一間，雖然用餐時間只得兩小時，但就可以自由選擇入席時間，睇過網上食評，好似都唔錯，最近什至有人將哩兩間作比較，皆因兩間都係以極尚為名。 食兩個鐘哩間，相對收費較平，位置同樣係銅鑼灣既大街，所以感覺唔錯吖﹗﹗不如就試下﹗﹗ 點擊圖片放大 +4 哩間極尚都唔錯，哈哈，因為同唔同既人食，朋友叫每款野食都有影相，反之自己平時食就一般只係影第一盆泥既刺身，跟住就掛住食。完全唔係因為自己食開個間選擇唔夠多，只係自己無影﹗﹗ 哩間都一樣設有飲品同熟食自助區，除左凍飲，仲有熱飲同清酒，仲有軟雪糕同好多甜品，印象的確比平時食開個間多選擇﹗問心，刺身選擇唔算多，反而係壽司同熟食比較多﹗但可以自由選擇時間同埋價錢較平，感覺都唔錯﹗ 假如有時間的話，我都依然係會選擇返尖咀食中午放題，但假如朋友放工時間較嚴的話，就只好選擇可調動時間既﹗﹗
