哩排掛住西班牙文同手語，莫講話旅行資料，連瑜伽都懶左練，真係要盡快回復平衡﹗﹗今日落雨濕濕，本來應該係乖乖留在家既好日子，但唔知點解，反而興之所至，一路都係外邊﹗ 係屋企附近既新商場有間唔錯既米線舖，最初只係諗住落街食個晏就返屋企，所以連水樽都無帶，點知食完又諗住去買點日用品，買完路經戲院，又諗住不如睇埋套想睇左好耐既電影﹗睇完又已經7點幾，哈哈，於是懶唔想煮，又開車去左大埔搵野食兼買苦茶，就係咁，一整天就係條街度四圍遊，係咁食食食，同埋食﹗﹗ 屋企附近間米線舖，之前一直都係食佢地既招牌米線，但老闆娘推介話佢地個蕃茄湯底都好得，於是又試下，呵，又真係好正喎，湯頭好濃好鮮甜，唔會太酸太甜﹗早年好鍾意去銅鑼灣一間火鍋店度打邊爐，都係因為佢個蕃茄湯，之但係，此情不再左好多年，近年已經食唔返個個味道﹗居然，今日係自己屋企附近食到，好滿足哩﹗仲有就係雖然舖頭好忙，但每次向店員提出走飲管既要求，阿姐咁多次都無甩拖，次次都成功走到飲管﹗﹗唯有美中不足，就係舖頭好熱，走個陣忍唔住同收銀阿姐反映左幾句﹗呵呵，八掛聽到有客係屯門專登開車過泥食，話寧願熱都食﹗證明，味道不錯吧﹗﹗ 真心推介，佢既豬膶係薄切，好香酒味，因為薄切，變左更容易掌握，唔會過熟過硬﹗仲有佢個香茅豬扒﹗﹗ 無諗過天水圍既小店都咁有驚喜 蕃茄湯米線，仲有成功走飲管既凍檸茶 唉，落雨又無得游水，瑜伽又無，仲不停係咁食，真係唔可以繼續﹗食飽飽，本來只係諗住四圍行下買點日用品，點知又遇到新鮮出爐既菠蘿包，忍唔住又買左個兩份食﹗新鮮出爐，個皮好脆，面包好軟熟，牛油夠凍夠硬，加左落個飽度都仲食到牛油，正到爆炸﹗﹗ 新鮮出爐菠蘿包配冰凍牛油，絕配 行下行下，行過戲院，見到個套想睇左好耐既戲，於是的起心肝睇埋佢﹗睇完發現已天黑，於是又直接開車去大埔搵野食﹗ 其實哩間舖又係幫襯左幾次，第一次係路過食下午茶餐，發現超平燒鵝瀨﹗跟住就忍唔住耐唔使都要去食下﹗﹗ 正式皮脆肉嫩 下午茶餐好似45蚊連野飲（好似） 食完仲可以行去街看食豆腐花，問你肥死未﹗﹗
