環保，同個人修養一樣，都係一生既功課，唔係剩係做下垃圾分類，帶個環保杯出街就係環保﹗環保絕對係一種生活習慣，一般既城市人，如果想講環保，真係有排學﹗ 城市人，都唔好講衣服既物料同製作過程，齋講買少件衫都難過登天，網上購物咁平，個個都會覺得，環保都要靚架，係，環保都可以好靚既，你買左咁多，係咪真係用得著哩﹖當然，你可以送比人，舊衣可改做其他物品，之但係，我都依然係個句，買少件係咪比起拎去回收容易得多哩﹗﹖ 好似一般環保人都會係手作人，好可惜我唔係，對於手作、藝術完全零天份，既然善用資源，循環再用個部份做得無人地咁叻，唯有就係堅守第一關，源頭減費﹗查實來來去去都係著個幾件衫，但求乾淨整齊就得啦，唔使要太多款式姐﹗一個百搭又裝到野既袋，好過你日日都要換手袋襯衫，好過你因為換袋而帶漏野﹗哈，我的確係咁諗﹗ 環保真係一尐都唔容易，要學垃圾分類，學垃圾回收已經你寫篇論文﹗環保，其實都幾貼近各大思想門派既生活，簡約，過簡約既生活已經係一種環保﹗﹗ 由一覺醒來，你去梳洗已經可以同環保理念有衝突﹗你刷牙用緊咩牙刷﹖超市買緊個尐膠牙膠﹖兩三個月就掉一枝，你有無諗過一世人要掉幾多枝膠牙刷，即使你帶環保杯，帶不锈鋼飲管，唔用膠袋，你，都依然不停用緊又掉緊膠產品﹗ 市面有人提議用竹牙刷，老實講，自己用過覺得唔算好刷，而且住樓既人，廁所通風系統未必好好，於是個枝竹牙刷偶爾會有霉點﹗ 最近發現有一枝好有型既不锈鋼牙刷，手柄係一锈鋼，個刷頭可替換﹗而生產商報稱個刷頭係可以生物分解的，咁，姐係應該符合環保原則啦﹗雖然有尐貴，要HK$170一枝，我有認真計過條數，假設每兩個月換一枝牙刷計，前14個月，每月只需$18。以後只換牙刷頭，每個只需$16.7，計落查實都唔係貴呀，平過平時換牙刷喎﹗ 早幾日有朋友泥我家作客，入廁所見到枝牙刷會話，嘩，你枝牙刷咁型既﹗嘻，虛榮心即刻浮現，係架，都真係幾型﹗除左銀色，我知好似仲有金色同黑色，放係刷所唔再係個個一樣既膠牙刷，仲可以好理直氣壯咁向朋友介紹，哩枝野完全符合環保理念，係咪真心型先﹗﹗ 應該可以用一世既環保牙刷，係咪好型先﹗ 天然牙粉，唔使再用個尐有化學成份既牙膏啦 八掛既朋友仲好奇點解我無牙膏，係呀，我轉左牙粉一段時間，牙粉係天水圍街坊自己造的，成份只有鹽、小梳打同薄荷葉，天然得泥又有效，何樂而不為﹗朋友問，有無用架﹖﹗哈，我只係想問，你用左個尐化學成份既牙膏咁多年，你既牙係咪特別健康先﹖﹖有無蛀牙﹖有，姐係蛀唔蛀牙，牙齒清唔清潔，唔關牙膏事，而係你既個人衛生問題啦﹗ 嘻，老實講，我係懶人，夜晚訓覺前未必會刷牙，不過，我無蛀牙喎（TOUCH WOOD），咁，用天然成份既牙粉，點都好過牙膏掛﹗﹗
