近排好多私務，無心機整理資料寫去旅行既野，所以只好講下生活日常，希望遲尐考完試會好尐啦﹗﹗ 話說，今年一月同朋友去左銅鑼灣一間食德國豬手既餐廳，當時只大概知道個間餐廳本店係筲箕灣，係電視既飲食節目有介紹過，覺得好似幾正咁，所以一月時就冒名同朋友去試下﹗ 當時食完都幾滿意，哈哈，除左豬手如傳說中既香脆，仲有自己好鍾意食既德國面包，所以，之後都去左好幾次﹗只不過，6月諗住帶朋友去食，打電話訂檯既時候發現電話無人聽，連續打左兩日都無人聽，打去總點打聽，只係話暫停營業，原因不明﹗ 當時只係諗，始終小店經營，可能維唔到皮所以關門大吉，皆因佢地一至四既晚餐無限用餐時間，可能人流唔夠掛﹗﹗當時係咁諗﹗ 點知過左無耐，就有八掛新聞出啦，原來銅鑼灣個間店係由一個選美出身既女仔入資開既﹗對唔住，完全唔記得叫咩名，哈哈，同性相拒掛，再者，比起老闆個名，我比較關心餐廳是否能繼續經營多尐﹗ 相關既新聞好似前後睇左兩次，大概只知老闆太過信人，入資後無認真參與餐廳營運，於是比人呃哂尐錢，之類之類咁上下啦﹗到上個月就突然出新聞話餐廳重開啦﹗感動中，係咪真架~~~ 星期五晚做完野，諗唔到去邊度食，於是就同大叔兩個人再去試下﹗ 餐廳改左名，我係星期五既下晝4點幾先突然決定過去食，打電話過去訂檯時店員表示要八點後先有位﹗啱哂啦，我做完野過去時間啱啱好﹗過到去，嘩，無咁誇張呀﹗ 餐廳係大廈既一樓，但樓上舖走廊狹窄，無地方比客人等位，所以要係地下大堂等，個晚居然企滿哂人喎﹗人多都好既，有生意先可以維持到落去嘛﹗嘻，咁我地先可以繼續有好野食﹗﹗不過人多，又無理由趕上一檯客走，於是，訂左八點，都依然要係大堂等一陣咁囉﹗﹗星期五個晚都幾熱，大廈既大堂好明顯冷氣唔夠，加上企滿一堆客係度等住，都幾熱架﹗ 上到餐廳，唔~~~發現唔止大堂熱，原來餐廳都好熱，後來向店員打聽過，話係近日大廈冷氣問題，的確，我地以前去係好夠冷氣既，希望，下次再去唔使一路流住汗食啦﹗﹗ 餐牌唔同哂，無左我最鍾意食既德國面包（暗哭中），又無左好好味既薯餅，連之前既特色飲品都無左，唉，真係有少少失望架﹗唔緊要啦，一餐半餐，即管食左先再落評價啦﹗﹗ 我地得兩個人，叫左一份豬手，加左個意粉，好彩店員醒目，不停幫我地加冰水，感覺無咁難受﹗ 個晚見到係全院滿座既，座無虛設，店員亦明顯比以前多，個個都好勤快咁走來走去﹗呀，頭先好似無講哂個故仔，報導話餐廳得以重開，係多得一班伙計肯齊心陪老闆一齊捱，所以，雖然係熱少少，假如報導無失實，就單憑哩個故仔都值得忍耐一下既﹗﹗ 餐廳改左名，希望可以堅持落去啦 餐廳改左名，連餐牌都轉哂，嗚嗚，我鍾意食既都無哂 應該係通風系統出左問題，個晚廚房要開住門 冷氣微弱，加出動風扇救援 雖說餐牌無左我鍾意食既野，但豬手質素KEEP到喎，肉好嫰滑，皮夠香脆 意粉中規中矩啦 豬手泥到，皮依然香脆，肉，依然嫰滑，KEEP到呀下﹗讚，個意粉就不過不失啦，合格﹗係用餐期間，見到貌似老闆既年輕女仕係廚房同樓面走來走去，哈，查實我都唔肯定有無認錯人架，只係係報導睇過一次，假如無認錯人，咁都抵讚吖，後生女無因為自己係老闆而袖手旁觀，亦無指指點點，自己好落力又好賣力咁幫手﹗ 不過鍾意飲酒既朋友要留意啊，因為餐廳改左名，要重新攞酒牌，假如諗住一邊飲德國啤一邊食豬手既話，暫時要忍耐一下啦﹗﹗ 相關閱讀：豬手的選擇
