話說星期日上完工作坊，搭西鐵由尖沙咀返屯門遇到令人結舌既事，唔知，係自己變左，定係世界變左﹗﹖ 話說，星期日黃昏時間，由尖東站往屯門方向既乘客唔多，上左一日堂，搵左靠門既座位坐低﹗去到荃灣西，有兩家人推住BB車入車，應該係香港人吧，父母小孩都係講流利廣東話的﹗一對年輕父母拖住一個三四歲既小男生，推住BB車，另加一個年輕男士拖住另一個三四歲既小女生上車﹗ 佢地一入車，自己已經有點看不過眼，因為，兩個小孩係拎住甜筒入車廂的﹗我唔係站係道德高地既人，我經常都問，點解日本車廂容許乘客進食，但依然能保持環境清潔，點解香港唔得﹖﹗點解我地既素質仲未能達至自律既地步﹖點解依然要用法例，用罰款去控制﹖ 係車廂內飲水，比小孩食點乾糧，我估無人會怪你，但甜筒呀大佬，你係咪應該等小朋友食完先上車呀﹗﹖如果咁趕時間，咁不如去到目的地先食啦﹗都唔知係好彩定唔好彩，因為車廂唔多人，所以無人理佢地﹗結果﹖結果咪預期之內，其中一個細路跌左個甜筒囉﹗父母表現得好緊張，即刻拎紙巾出泥抹﹗ 曾經，曾經我心存過一絲希望，以為個對年輕父母拎紙巾係執返個甜筒，而事實係，佢地好緊張咁幫個細路仔抹衫抹腳，但就隨得個甜筒同個攤雪糕係地下恍動﹗ 好失望，真係好失望，點解我地真係咁自私﹖你係自己屋企，跌左落地你執唔執﹖抹唔抹﹖你識好緊張咁幫個仔抹身，但就唔即時執返個甜筒﹖﹗隨得個甜筒係地下，到時個個踩來踩去，整到四圍污糟腳印，係呀，係完全唔關當時係車上既乘客事，因為大家落左車就BYE BYE，苦果係下一手上車既人承受﹗但我地係咪真係咁低劣，咁無素質﹖ 唉，我都唔知點講好﹗我無破口大罵，我好清楚知道，我鬧係我多餘，我唔想係個咁既環境下上YOUTUBE，再者，我好清楚知道，我鬧完個對父母都係唔會有感覺﹗由荃灣站開始，我就一路睇住個個甜筒掙扎，到底我要點做，我係咪可以好似其他人一樣咁事不關己，我係咪都可以扮睇唔到﹗ 原來我唔得，越睇越嬲，越睇越心痛，於是，去到天水圍站，落左大部份既乘客，我就係袋拎左紙巾同膠袋，繞過個架BB車同個對年輕父母，當住佢地面蹲低執起個個好可憐既甜筒，同抹走埋個攤雪糕，然後掉左落個膠袋度﹗ 個個細路即時就推詞話，唔關我事架﹗係呀，唔關你事架，絕對無關，因為係你父母既責任﹗但個對父母哩﹖佢地只係覺得點解有個怪人出現，完全無半點內疚或自責（咪妄想，佢地點會﹗） 我唔係要別人為我鼓掌，唔係要別人讚許，只係，我接受唔到我地個社會既人係咁自私﹗我無影相，無拍片，無破口大罵，無指責，更無同佢地交談過，執完，就只係靜靜咁行返返位，拎返背囊﹗個對父母就係兆康站落左車，而我，就繼續係其他人眼中既怪人，搭到去屯門站﹗ 到底，我們的世界怎麼這麼壞﹗﹖﹖ 雪糕本來係令人開心既食物
