話說，係網上學西班牙文已經有好一段日子，叫做識得一堆生字，叫做可以寫/睇簡單既語句，但係，一路只係自學，有好多野其實未必明，特別係發音，無人提你，無人幫你矯正，等同活係自己世界既井底蛙，無交流，無比較當然等於無進步，於是，總是，越學就越覺得舉步為艱﹗ 於是，早前機緣巧合，識左個教西班牙文既老師，於是膽敢求教，正式開展第一堂一對一既西班牙會話課。結果?更係挫敗連場啦，雖說去過南美，雖說當日慶幸自己識少少西班牙文叫做救到命，路人，擦身而過，人地聽得明你，都係求求其其過，好似係行過街有人用唔純正既廣東話問你野，你應該唔會咬文嚼字，走去捉佢文法，捉佢發音掛。同樣，旅途中，人地求其估到你問咩，答左你就算。而一上堂要認真讀，就知道失禮。要學一種語言真係唔容易，唔係就咁學識幾個單字，學會一兩句口語就算，要學懂，條路真係好遠。 又好似最近掙扎緊既手語翻譯，尋日都再隆重其事咁同老師傾，叫做學左一年，比段文字叫你用手語表達返出泥，問心，都未必得，仲話要踏上翻譯一路，到底會唔會太快。講說話，每個人交字發音用字都各有不同，你要精通一種語言，意思係你要能夠明白，當人地帶有口音，用緊不一樣既方言，引經據典，又或用粗俗潮語你都能聽出弦外之音，個中意思。同樣，手語都可以有方言，都可以有變奏，亦會有潮語又或別有用意的用詞，而我，只係學左一年，接觸少，未必個個聾人朋友既手語都睇得明，翻譯，真係可以咩？ 老師既答案，其實都同過往其他老師既答案一樣，無人能夠識哂所有野，都係邊學邊做，最主要睇你有無心。如果你真係想，就開始花多點時間，繼續去開展你既眼界，往聾人朋友既國度再往前走。其實，道理是懂，只是懶惰不想向前行。似乎，是時候重新起步了。 有人話，人生在世，要終生學習，只要你停止學習，就算同在退步﹗其實都係既，世界不停在變，每一份鐘都有新事物新思維出現，你唔向前行，沿地踏步，人地往前走了，也就是變相你落後了﹗﹗ 提外話，突然發現屋企附近有一家沒有跟上通漲的小店，生炸雞脾連凍飲，才24個大洋，哈，有時候，沒有往前走都未必係一件壞事吖。
