早前同朋友去左旺角一間韓國餐廳食飯 話說，早前同朋友去左旺角一間韓國餐廳食飯，平時去既韓式餐廳，都係較傳統那種，用緊銀色筷子，客人一點菜就有幾碟韓式泡菜奉客，然後，食既係石鍋飯，辣豆腐湯那一種﹗至於新式，食芝士食炸雞那種，我係未試過既﹗ 個日4個人叫左幾個餸，菜一泥到，大家都有同一個疑問，覺得唔就手，原因﹖﹗搵勻全檯面都無筷子既﹖﹗檯面4份餐具 - 有金屬夾同叉，ERRR...唔係唔識用叉，不過，唔係食西餐，無筷子好似硬係周身唔自在姐﹗另外，其中一個鍋，係有雜菜同粉絲，如果有筷子，好似會方便尐喎﹗ 當大家都論論盡盡咁開動既時候，我就好得戚咁，施施然係個袋拎左我對私家筷子出泥﹗哈哈，朋友們當然都問，點解你會有筷子既﹗﹖ 老實講，平時少出街食飯，又。。。如果出街食，都會去熟悉既小店，好少會出動到私家筷子﹗咁，又點解會有私家筷子係身哩﹗話說，2013年，泰國朋友結婚，佢既結婚禮物係對一好輕巧既筷子同埋匙羮，我見難得咁輕巧，加上個陣係公司食晏，無論叫外賣或出去食都好多時會用到即棄餐具，日日咁掉覺得好對地球先生唔住，咁不如自己帶定係身啦﹗就係咁，哩套餐具就一路都跟身，連去旅行都會帶埋架﹗ 朋友又會問，其實用到既機會唔多，成日放係個袋度唔麻煩咩﹗哈，話時話，確實都會麻煩架，筷子本身用布袋入住，但放係手袋/背囊，點都會有塵會污糟，於是，為左確保衛生，又會再加一個密實袋，雖然唔重，之但係佢點都有一定程度既體積，於是到底要點樣妥善咁放佢係個袋度，都的確要諗﹗講到尾，環保本身就係唔方便架啦，都係一種習慣，一種適應，可幸既係我習慣用大既袋或背囊，區區一對筷子，還好啦﹗﹗ 餐廳只提供叉，好彩我有自備筷子既習慣 一路都只係得一套餐具旁身，以防萬一，之但係，我經常都兩個人食飯架喎﹗好似最近有人愛上左一間日本鹽湯拉面店，但好奇怪，拉面店係用即棄餐具既，次次食都只得我有自備筷子，有人覺得我令佢尷尬，於是，唯有要諗下帶埋佢個份﹗ 咁點好哩﹗﹖我一路都好介意尐人將消費同環保掛勾，依家哩，市面推出好多所謂既環保產品，但總覺得有點巧立名目，我唔想為左買而買，亦好反對尐人買埋買埋一堆環保產品，但又唔用放哂係度。本來諗住就咁係屋企拎多對筷子放係袋就算，點知個日突然得到一套小兵既餐具喎，呵呵，啱哂﹗
