尋晚大叔開左冷氣訓,於是中招冷親發燒,食左藥到下午先恢復活動能力,下晝見精神好尐,於是整理下相上傳到社交網站,咁就出事了﹗﹗ 唉,以後唔清醒都係唔好亂咁係社交網站發帖﹗﹗ 話說,我4月到大阪時,係八幡市既背堤偷影左一張人地既婚紗相﹗吸引之處係相中主角帶埋四隻毛小孩一齊影佢地既緍紗相,可見一對新人係愛犬之人﹗ 而我張相個主題係:我好睇唔起個少話關注動物權益,但轉個頭去BREEDER度買狗返屋企養既人﹗並寄望哩對新人將來唔好因為要生小朋友而棄養這些見証他們婚禮的毛小孩﹗ 2017年4月攝於八幡市的背割堤 其實確實係真心話,但我醒唔起我面書有幾個"朋友"正正係哩種人﹗試過有未婚前愛貓如命,點知一知自己有左就掉左兩隻貓仔出街﹗ 亦有到今日今日都係面書大大聲聲話關注動物權益,又話支持領養﹗但佢屋企既毛小孩係係BREEDER度買既"純種狗"。 我成日都好好奇,哩尐人係咪精神分裂,定係佢地唔記得自己講過尐咩既哩﹗﹖ 我明每個人都有佢既自由,有佢既選擇權,亦好理解有好多野無啱定錯,更明白每個人既價值觀係無可能係別人講一兩句就會改變既,實在無意多生事端﹗ 正所謂明就明,唔明既你講一世都唔明﹗但求自己知道自己既價值觀就好了,不打算去改變別人的觀念﹗正如素食跟環保的信念也一樣﹗同邊人自然會繼續走,不同路的,何必糾纏﹗﹖