我一再強調,我好怕被商業化既節日活動,好怕被消費既"溫情"﹗ 係你朋友當中,你認識其家人既有幾個﹖﹗如果識得屋企人既,十居其九都會係讀書年代既同學,放學後一班學生仔無地方去,如果同學屋企比較闊落,或其家人比較開通,一般都會成為同學間既基地﹗久而久之,自然會同同學既父母變得熟落,年少時候總會比較,覺得人地父母比自己既好﹗﹗ 長大後,能夠認識其父母既朋友亦相對減少﹗ 我咁問,係因為母親節,突然係社交網站見到好多朋友既家人,當然特別係母親們﹗我無意冒犯,見到人家開開心心,當然亦心感安慰,替其欣喜,能夠享天倫樂當然是美事,之但係,點解突然個個都要擺阿媽上檯哩﹖係咪唔擺就不孝﹖﹗莫非你一年先見你母親大人一次﹖咁點解平日又唔見你同母親大人合照既哩﹖﹖﹗ 我哩尐不孝子孫,雖然成日話唔想被消費,但過時過節點都要順應下民意,陪下食飯,仲食左幾餐添﹗之前為齊人提早食既唔講,就講今日,其實個個星期六日都去茶樓飲茶,今日明知多人,點解都仲要去同人迫哩﹗﹖唔。。。嚴格泥講我係無份迫既,因為家人同酒樓相熟,每次去親酒樓都唔使排隊直入,哩個亦係令我個心唔舒服既一件事﹗平日如果人唔多,跳過左排隊,無影響到其他人我都可以扮唔知﹗但今年真係成個商場都企滿等位飲茶既人,我地又個個星期六日都飲茶,點解要去同人爭位﹗當門口企滿幾十人係度等緊位,而你係一去到酒樓就可以直入有位坐,個種感覺唔係超然,而係罪疚,完全好似打左人尖(查實唔係好似,而確實係打左尖,對唔住呀,今次有份係個間酒樓飲茶既人﹗) 跟住酒樓會有各式各樣既母親節特別點心,唉,可唔可以比返多少正常既點心過我呀,我只係想安安靜靜咁同屋企人飲個茶,各位部長支客唔使不停過泥問要唔要哩樣,又要唔要個樣﹗你好似平日咁對我地得架啦﹗ 到晚飯,查實平日既星期日一般都會在家食點簡單的,好讓身體準備新一周的工作,但母。親。節喎,你無理由唔陪屋企人食飯呀嘛(唔知幾時開始母親節係重要過哂所有其他既傳統節日,如果你唔現身就係死罪),於是假如你外出食飯咩﹖要預早訂檯,什至預早落訂啦﹗又要被限制食"母親節套餐"啦﹗如果係屋企食,去街市亦唔好受,每一檔既小販大姐阿哥都同你講,阿妹,母親節呀,今晚食好尐,不如買哩個吖,不如試下哩樣啦﹗個街市迫人到好似團年飯一樣既情況﹗ 救命呀~~~阿媽呀,我唔係唔孝順,但點解要係母親節先泥做比人睇哩﹖﹗