去歐洲旅行,一般我地都會揀住近當地既中央車站,以便到達/離開時既交通。不過今次係羅馬我地並無咁做,而選擇左要搭幾個站地鐵既地方,至於點解咁做?不如睇下地圖先: 羅馬主要景點地圖 中央車站係圖既右手邊,梵帝岡係圖既左手邊,而主要觀光點,鬥獸場、威尼斯廣場、萬神殿、四河噴泉等等等等全部都係中間,而我地住既旅館Isa Design Hotel,就係哩堆野既上方。 我地既計劃係係羅馬逗留4日3夜(有少少後悔,覺得唔夠),到地當日已經時近黃昏,無咩地方可去。然後有一日去梵帝岡,離開當天要搭下午一點鐘火車過拿波里,姐係實際係羅馬市內觀光只得一天半,加上我地貪心,好多時同一個地方,日景夜景都想影,如果仲花太多時間係交通上面,就更加唔夠時間用。 羅馬治安差(真心差,我地逗留期間遇到3次小偷),好多旅遊書會建議住係羅馬中央火車站附近,一來選擇多,二來夜返都安全尐(介紹話咋,唔肯定)。但若住中央車站,姐係出入都要靠地鐵,我搭左幾次地鐵都有扒手埋身,好驚,自覺好彩無唔見野,假如日日都要搭幾轉地鐵,真係命都短幾年。 假如住近市中心,姐係個堆觀光點附近,酒店全部都過二千蚊港紙一晚,而且質素好參差,如果想住得舒服尐就要過三千蚊晚。我成日都話,係酒店逗留時間唔多,但求乾淨,我地餘下旅程既酒店全部都只係一千蚊一晚,但羅馬真係搵唔到。最慘係歐洲既酒店,可以真係好舊好求其。要確保乾淨同安全的話,就無法唔同金錢掛勾。我有朋友舊年去德國啤酒節,一班人諗住住間平少少既旅館,結果外出時比人入房拎哂尐貴重野,然後酒店話個管房走左佬唔關佢地事,當時啤酒節,報警都要等左30分鐘先有警察到場,後尾仲話唔知去邊度搵,於是不了了之。係外國地方,唔理你溝唔溝通到,熟唔熟悉法律,都係盡量自保比較好,皆因你只係過境性質,即使對方再友善,你逗留時間有限,無謂花時間係不必要既經歷。 又想交通方便,又想住得舒適,搵左一輪又睇埋入住comment,最後選擇左我地入住既酒店,位置係中央車站搭A線往Battistini方向既第五個站Lepanto。出地鐵後搵Via M. Colonna出口轉左直行五分鐘左右就到。老實講,意大利石仔路多,推住個篋行五分鐘都幾倦架。 出地鐵之後搵Via M Colonna出口 到埗當日,放好行履就行左去影夜景。離開酒店轉左行五分鐘就可到一條叫Ponte Umberto I既橋,係個樹你會見到有一堆遊客聚集,皆因個個都係個樹影緊相,唔難搵。 係酒店五分鐘步程就可以睇到聖天使堡同梵帝岡既夜景 係酒店行去聖天使堡約10分鐘步程,去梵帝崗也只是20分鐘左右,我知可能有人覺得我變態,做咩唔搭車,一來沿途可以行下影下,二來,我真係唔係好敢再係羅馬搭地鐵。我地第二日去鬥獸場個陣係搭地鐵架,但係車上又再遇到有扒手埋身,搞到我選擇回程都係行(唔計停留,其實25分鐘就到),去大部份既景點都可以徒步去到,我自己覺得位置算是理想。即使你話你唔擔心扒手,搭地鐵都好方便,行返去地鐵站,5分鐘就到。酒店附近超市、餐廳咩都有。 酒店餐廳係6樓(頂樓),個景觀都幾好架,千六蚊港紙一晚,包早餐,不過千萬唔好忘記,歐洲差不多每個城市既酒店都要畀city tax ,每個地方收費唔同,好似又會按酒店既級數而有所不同,我地住左三晚,最後畀左36Euro,姐係按人頭每人6Euro一日(比起同一個行程既其他住宿,暫時哩間個tax 係最貴既)。 房間夠寛敞 浴室設備齊全耶 滿心歡喜看到有我最愛的發熱毛巾架 酒店房間望出的景觀 從地鐵站過來,差不多要走五個街口 酒店大門不算明顯,很容易錯過 酒店的自助早餐,挺豐富的耶 酒店的自助早餐,挺豐富的耶 除左有一般既Cold cut, 穀物早餐,仲有香檳,查實點解早餐要飲香檳既哩? 餐廳的景觀也很好 酒佔附近有間特色多士店,可以試試啊 其實酒店大堂也很雅緻,不過就讓住客自行發掘嚕。還有一點(純粹係我個人比較怪),平時住酒店,只要你掛住請勿打擾個牌係門外,管房一般都唔會騷擾人客,然後放底便。條係門口話因為你不想被打擾,所以無幫你執房,假如有需要再通知佢地之類。但原來意大利係唔會理你架喎,我明明掛左牌,諗住費事收喼,仲掛哂尐洗左既內衣褲係毛巾架,點知佢地照入泥執。老尷尬的,不過我知純粹係我個人喜好,一般人唔會有哩個習慣。 相關閱讀: 向薄餅國出發 - 準備篇 向薄餅國出發 - 行程篇 驚險羅馬(上) 驚險羅馬(下)