每日行成十個鐘（無聊睇過手機，我地一日行萬五至兩萬步，真係痴痴地），夜晚返到酒店其實真係虛脫，但又好心急想記低沿途經歷。 話說旅程第二日又係羅馬車廂遇到扒手黨，個日一入車廂，有兩個女人跟住上，雖然車廂有點人多，但未至於要人貼人，但個兩個女人，一個坐低（有位坐，証明車廂唔算太迫啦），但另一個就好奇怪咁靠近我地，我地下意識閃開，當時有個黑人男人已經望實佢，跟住佢就扮去摸坐低左個個，然後又兩個人交換位置，期間總有意無意係大叔身邊有所動作。雖然我地兩個都帶背囊，但所有財物都放哂係我度，仲係袋內暗格，非常安全。大叔雖然帶住相機，如果要拎野一定要完全打開，無可能係唔察覺既情況下做到，今次亦幸保不失。到站有一個著西裝既男人刻意係我地面前經過，口中不停重複話be very careful, be very careful，落左車後仲回頭向我示意叫我小心，真心感激當地人既提醒。 好好彩，兩次都無損失，但都有排驚，搞到我地每次再入地鐵都要搵角落企，盡量去避免被觸及。 我用既背囊，靠背位置有暗袋 仲有電腦格，夠深，可放重要文件 仲有個隨身袋 要打開先可拎到野 仲有一個拉鍊格 大叔用既相機背囊 也有貼身既拉錬格，而且夠深，唔可以輕易取物 第三日去梵帝岡，唔使搭地鐵（哩個係我地揀位Lepanto站住既原因，算係最近梵帝岡），又係行左一日，係附近餐廳坐低食晚飯。去過歐洲既朋友大概都知，佢地好鍾意坐戶外。 其中有一枱客，應該都係遊客，席間以英文交談，而且好嘈，雖然我背住佢地都大概知發生咩事，大叔就可以望到佢地。期間都會有小販拎住絲巾呀，紀念品呀，玫瑰花呀過泥兜售，佢地都會講哂粗口咁喝令對方行開。後尾我突然聽到席間有個女仔話，where's my phone, where's my phone,跟住就知同枱既男仔跋足進左出去。 當時我個電話都係枱面，好驚，即刻收起。後尾大叔話，當時係有個黑人靠近我身後個張枱，但是次唔係小販，只係示意想要煙仔，刻意伏落張枱度搭訕，當時枱上有手機同相機，但相信攞相機太明顯，於是只選手機。好彩發現得快，同枱男生亦夠機警追得返，我都無諗後尾過會咁順攤肯比返佢地喎，個男仔一追到捉住個黑人就自動交出電話。 個女仔有叫過話報謷，但同枱既其他人就話攞返就算。後尾其實仲有小插曲架，個女仔不停話要搵個黑人出泥打。後尾每有小販經過都會比佢鬧，又不停問係咪你係咪你，好明顯係飲醉酒。 平時食飯我都習慣將手機放枱面，睇泥，哩個國度實在太危險，每一分鐘都要提高警覺，都係個句，財不可露眼。 上一篇：驚險羅馬（上）
