斷片既情況越來越嚴重，其實，應該做尐咩﹖以為自己唔介意，但原來發生了又會有點耿耿於懷﹗ 話說朋友知我HOME ALONE，怕我一個人係屋企，尋晚約左我出去將軍澳食飯﹗老實講，天水圍去將軍澳實在係天涯海角，如果唔係老友叫到，真係唔想出，加上其實尋晚大叔係會搭夜機返香港既，入到將軍澳咁遠，食完飯我都仲要搵車去機場﹗﹗ 雖說平時係路盲，都係搭地鐵跟指示牌搵既姐，點知係路上突然唔知自己係邊，真係企左係條街度一陣，回魂先記起自己係邊同埋做咩﹗﹖雖然唔係第一次，但個心依然唔舒服，好擔心真係有一日會完全失去認知能力﹗﹗活著，真的很無聊，明知記憶會消失，到底，還為什麼努力活著﹗﹖ 今朝同朋友傾WHATSAPP，發出短訊後佢問返我轉頭，你講咩﹖原來，我打左幾個完全無關聯既字，姐係再一次斷片了﹗以後，要多翻看才能確認自己思路無被騷擾。 尋晚去機場接機時遇上了小故事 腦袋的確有點怪怪，突然好似諗唔到野咁﹗希望快尐回復正常﹗﹗ 話說尋晚大叔本來係預計0010先返到香港既，但工作提早完成，改早左兩個鐘頭既機，於是就變左2230到地﹗預早去到機場等，坐在一角聽歌，突然有位中年既外藉男士拍我膊頭，我最初不以為意，佢拍左幾下我先知有人叫我﹗﹗ 中年既外藉叔叔，唔係白人，我估應該係印度人掛，表現得有點尷尬，用英語問我可否幫佢打個電話，佢比佢自己手提個WHATSAPP MESSAGE我睇，話想我幫佢打電話叫佢妹妹到機場接佢﹗ 嘩，街頭騙案呀，有點猶疑，但叔叔個樣都好老實同有點為難（拿，如無意外應該個個騙徒都係咁上下樣架下﹗），話佢係三藩市返泥，但手機沒有網絡，無法聯絡妹妹，他的確表現得有點不知所措同擔心，我懷疑我個樣真係刻住個蠢字係度，無論係香港係國外，好經常都遇到會突然有人過泥向我求助，只係好彩咁多次都無遇過壞人﹗ 好彩地，今次都一次，因為只係代打電話，覺得應該都安全，問左叔叔個名，佢妹妹個名，就按電話號碼至電對方，表明我係機場遇到佢哥哥，想佢過泥機場接佢﹗哈，原來妹妹亦一早係機場等候，所以聽到來電就歡喜若狂，話等左成個鐘都未見哥哥，好擔心之類﹗ 一個鐘。。。不是吧﹗叔叔，你做咩唔早尐搵人打電話呀﹖還是，叔叔已經試過搵人幫手而無人敢理佢哩﹖﹗原來兩人一個係HALL B，一個係HALL A，於是天各一方﹗總之就係相遇啦﹗兩兄妹連忙道謝，妹妹仲開心到攬實我不停講唔該，其實我都無咩幫到手，唔使咁誇張掛﹗﹗ 直到佢兩人相遇，開心擁抱，我先發現原來仲有一位老人家，原來叔叔係同佢老爸一齊，只係我之前無發現﹗兩兄妹相認後，叔叔好趕急咁去搵廁所，哈，好明顯係之前未搵到阿妹，太緊張唔敢走開唔敢去廁所﹗後來佢地仲送左個小食比我以表謝意﹗ 只係打左個電話，無任何損失，但就見證左一個失魂又溫馨既小故事﹗人與人之間，有時簡單一點，總能遇上好事﹗
