4、5月會有好幾個公眾假期,身邊朋友都開始計劃外遊﹗朋友們都知我地愛規劃旅程,所以總有口痕友鍾意掛係口邊:"下次去邊叫埋我"、"搵次一齊去旅行"。我地都係無所謂既人,過往都有試過同朋友一齊去旅行,最多個次係一行9人。網路上其實已經有好多人分析過誰是最佳旅伴﹗不過親身經歷,又有另一種體會﹗ 年紀輕時,最怕識平日麻煩多多既百"彈"齋主,覺得哩類人要求多多,好難相處,平日無咩必要都唔好咁多接觸。但無意中試過一齊旅行,先發現其實哩種人都有可取之處﹗當然,首要係睇你對哩個朋友有幾了解啦﹗ 首先,一般既百"彈"齋主都查實係好倚賴人、比較膽少既人,所以先會話哩樣唔好,個樣唔試,又揀飲擇食(如果有主見既百"彈"齋主型,一般都唔會假手於人,應該係會自己規劃個個,皆因人地所做既野永遠唔會合佢心意﹗)。相處久了,你大概知道哩類百"彈"齋主到底要求既係咩,雖然係計劃行程時多左顧累,但好處係你大概知佢底線,一路商量行程既時候你先縮窄範圍比佢地揀,講明限制,假如真係你好想去而佢又唔想去,我一般都會搵定可以放低佢既地方,然後話佢知我幾時去接返佢﹗嘻,不過哩類朋友的確係比較細膽既,假如要被掉低幾個鐘,又無人陪的話,佢會死死地氣跟埋你去﹗如是者揀完揀剩既都會係佢能接受既範圍之內,於是旅程上出現爭拗既機率會相對地少﹗佢地其實知自己麻煩架,知道自己唔太受朋友歡迎,假如佢知你盡力迎合,佢地會打從心底裡體諒,好少會再有不必要的要求﹗﹗ 你問我,我反而好怕個種講到明跟團既朋友﹗有種朋友,平日會話你知無所謂無所謂,你決定得架啦﹗姐係你平時約食飯,你問佢食咩,你揀啦﹗去邊度食,無所謂喎,跟住你約,佢就反問你,點解唔咁咁咁呀,個尐人哩﹗﹗我好好彩地亦試過同哩種朋友同行,平日相處其實都知會係咁,所以計劃行程時已經會一路話佢知我諗住去邊度,行程安排如何,而佢永遠都係答,我無所謂喎,你決定就得架啦,信得你過﹗為免中伏,於是都係做哂行程表比佢睇﹗結果哩,佢係一眼都無望過無覆過,依然係話得架啦,你決定啦﹗點知一落機佢就問你,我地去唔去個樹呀﹖吓,無計劃喎﹗哦,其實我問下架咋,無所謂架,但點解唔去呀﹗﹗如是者,你個日既行程佢會不停重復類似既說話,真心想爆粗﹗小姐,出發前我比哂行程計劃你睇架啦喎,你自己出發前話無所謂架嘛,你話我去邊你去邊架嘛﹗係呀,我諗住你會去個尐個尐地方嘛﹗ 真的給跪了,面對哩種人,頭兩日我會忍,我一般都會先完成當天既旅程,晚飯時再一次交待已訂好既行程表,問多佢一次到底佢想去邊,預告唔一定去到,但起碼你話我知你想去邊,比時間我重新規劃,我不停重申,我唔係叻應變既人,要不都唔使每次出遊都預早做行程規劃啦﹗佢地一般都會答你,唉吔,我無所謂架,按返你原本個計劃得架啦﹗﹗不過你最好有心理準備佢地第二日都依然會不停反問你九千幾條問題架啦﹗如果佢想去既地方係附近,都容易搵既,我都會盡量修改配合,問心,自己一個人計劃都諗唔到咁多野,有時都會睇漏眼,所以如果難度唔高既,大家一齊試下無妨,但你起碼比時間我搵吖嘛﹗ 再者,阿朋友,既然你咁有主意,你講得出你想去邊去邊,姐係你大概識路啦,不如你帶路吖﹗佢地梗係唔會啦,佢地跟得你團,就係唔想動腦筋花唔想心思去規劃,佢地純粹係想唔使費神,又可以去到特別既地方,返港後可以同其他朋友講,哩類人一般都係吹水叻既人,係朋友身上聽完既野就當係自己既跟住再同其他人講。 上次經驗,佢頭個兩日話想去既也方都偏離原訂行程有點距離,要坐好耐車,而且要留宿,如果去的話就要放棄原有已付款既酒店,根本無法配合,我有幫佢搵到係邊度邊度搭車,但我真的唔識路,到時你自己去到再搵啦,亦唔想浪費已支付既酒店房間,然後,自動消失去自己想去既地方﹗ 哩類人比起頭先講既百"彈"齋主更加無膽,所以雖則佢口裡講到幾勁幾勁,你又預先比左行程佢,佢係知你去邊既,但佢都依然唔敢唔識唔會去搵你﹗結果係,佢全日都只能在酒店附近徘徊,乖乖咁等你返泥﹗﹗哩個朋友都依然會話叫你陪佢去旅行,見過鬼仲唔怕黑咩,都係咪搞﹗ 有人會話唔鍾意尐唔參與既伙伴,我就覺得,睇下係邊種啦,如果係啱啱講既個種,最初唔參與,但事後多多意見既,梗係唔好啦﹗ 不過我有試過另外一種,又係出發前唔出聲唔參與,等你安排﹗雖則人地無意見,同行出遊,我都依然會定期匯報,偶爾遇到難題或決定唔到既都會出聲,哈,哩種唔參與既朋友,當你求救既時候佢係會有反應架,佢會比到建議你點樣可以解決﹗其實佢地唔係唔參與,而只係真心相信你,去到萬一你唔識咯,佢地反而能夠冷靜咁搵到方向,姐係話佢地私底下係有準資料架,只係以你為主,怕多加意見反而會引起混亂,到你需要時才出手協助﹗﹗問心,我就好鍾意同哩個朋友去旅行﹗ 其實一齊去旅行既朋友有好多,有尐本身工作好忙,無睱參與安排,但對你百份百信任,全程無意見;亦有尐沿途以為佢滿意,點知返到泥先話你知其實佢唔食哩樣唔食個樣 一_一"""你食哂落肚先話我知咁得意﹗﹖ 有時總以為同某某朋友好似都幾傾得埋,一齊去旅行一定會好好玩,其實每個人都有佢自己既喜好,平時行街睇戲食飯未必能夠完全知釋朋友既脾氣,要一齊困獸鬥相處幾日,萬一遇到有意見分歧,最緊要係開聲,與其自己係個心度埋怨對方點解唔體諒自己,不如直接話佢知其實你想點﹗大家係成年人,總有辦法解決﹗你同得佢去旅行,姐係你覺得對方都啱傾啱玩架嘛,何苦去完返泥無朋友做哩﹗﹖未必關對方事架,有時。。。好可能只係自己錯誤期待,一廂情願既想法累事﹗﹗ 唔好對一班朋友去旅行抱太大既幻想,有時未必係一件好事