又係另一個自己攞黎衰既周末,星期六明明可以好好在家休息,無性格既我,收到好耐無聯絡既朋友既一則短訊又走出街玩左一日,仲玩到半夜三更先返屋企。大叔就話可以星期日朝早訓返夠本,問題係我要出中環做全城有機日。 大會預計10點開始,我地擺攤要預備,所以約左其他工作人員8點半係遮打花園等,呵,姐係六點就要起身準備,死未,等你前一晚吹水吹到唔願走吖啦! 雖則我係個種鬧鐘一響就即刻起身既人,但落雨濕濕,又似暖還寒既天氣要早氣,仍多少靠點意志,可幸既係可以在巴士上補睡片刻。 全城有機日不經不覺已經十周年,自己也參與了四年,每次都會嘗試在社交平台推廣一下,會有熱心朋友九秒九按讚好,但同一班人尋日係面書問我,咩活動泥架,係邊度,點解無宣傳,無聽過既? 其實好明白,如之前講過,哩尐都只係小眾既活動,關心既人自然會知,唔關心既人,睇到既時候都只會好下意識地想比人知佢好有態度而按好,實際有幾關心,有幾熱衷,大家心裡自有評價。 尋日係第四次出席,由朝早8點半開始準備,一直到下午5時多,期間仲要不停講解,確實係體力大考驗。 好耐無試過清晨7點就出門 大家都好早就到場準備 大家都好早到場準備 連放假既家傭姐姐都好早就去佢地既集散地準備 十周年啦 點擊圖片放大 +2 四年了,感覺參與既人多左,參觀既人亦多左,講解既過程發現大家對有機耕種,大家對環保意識,對永續生命既概念,大家都似乎有所提升,不過,依然有點流於表面,能強求嗎?雖然進展有點慢,但有進步起碼好過原地踏步。 今年最深刻既係見到好多聽障或傷殘人士到場參觀,睇攤位既偶爾會給我們打氣,給我們鼓勵的說話,感覺不枉了。 講左一日野,又約左另一個好耐無見既朋友,無意中發現原來銅鑼灣既L Sqaure好多野食,雖然每層都好細,但食店遍都都唔錯。我地自己係14樓食完晚飯再落8樓食甜品,兩間都出奇地出色,搭電梯時見到仲有間食牛排同食素既好似都唔錯咁,下次可以再試其他。 餐廳既招牌薄餅,很出色耶 帶子意粉,帶子處理得相當好 豬鞍的醬汁很特別,讓人胃口大開 好喜歡餐廳的佈置 食完晚餐,由14樓轉戰到8樓食甜品 招牌既火焰薄餅 餐廳有最低消費,指定每位客人一定要叫一份 晚飯既餐廳中規中矩,可以再食,反而係突然轉戰既8樓既法國餐廳更有驚喜。 餐廳除了甜既煎餅,仲有鹹食,入座時近關店時間,但仍有客人到訪。自己第一次食煎薄餅,被煎餅軟軟煙靭既質地所吸引,雖然有最低消費,每人最少要點一客,但絕不膩口,晚餐八後每人一客絕對沒有負擔。估唔到哩座係內街,面積細細既大廈有咁多好野食,下次約朋友食飯多個選擇了。