古人好有先見之明,早已有好事不出門,壞事傳千理之說,BBC news 既一個視頻訪問突然來了兩位不速之客,轉迅間就係社交平台被廣傳,其實對那位教授沒有帶來任何負面影響(我個人覺得),反而覺得那兩位小客人挺有趣的,只是事件被廣傳,日後也許會為他帶來尷尬的話題。 相信好多人都有哩種經驗,一邊鬧大台既電視劇無聊,但實情又晚晚都追,繼續晚晚無聊。我從小就唔多睇電視劇,一來小時候已經開始要做家務,無咩機會睇;二來係一般好快已經估到劇情,真心覺得無聊,於是索性唔睇。 依家每日睇新聞,感覺就似人地睇電視劇一樣,又要鬧又要睇,每日都會重複問自己,到底係咪自己既邏輯思維有問題,點解咁多不可思議既新聞同評論會發生。 香港既新聞有樣有趣既情況,就係傳染度好高。例如個排興跌窗落街,就會三日唔埋兩日有同類事件發生。有一輪興墮樓,於是又日日都會有人墮樓。又好似亂輪案,我成日都覺得哩個世代唔應該再出現類似悲劇,又唔知點解最近排山倒海咁開審、舉報,簡直叫人髮指。 又例如醫療事故,近幾日其實開緊醫委會改革會議,那邊廂換錯心啱啱先開完死因聆訊庭被判死於自然(好老實,我印象中既死因聆訊庭,結果除左死於不幸或死於自然,我好少聽到有其他裁決結果),新聞又剛剛報導有病人被開錯腦。新聞似乎真係會傳染,病人組織正在為醫委會改革爭取,卻接二連三再爆出難以理解的醫療事故。 唔想好似人地睇電視劇咁,邊鬧邊睇,越來越怕睇新闐,唔想睇,唔想鬧,於是今日做完野就走左去荃灣食日本野。有人因濕疹問題,早排一路都忍口唔敢食蝦蟹,要一個鍾意食野既人戒口,我都明白係難事,所以見病情稍有好轉,就同佢食餐好既以示獎勵。 其實唔係咩大餐廳,都只係荃灣廣場既一間小店,每次都要企係人地後面等位,但食物質素同價錢都好合理,值得等下既。無去一排,今日點個二人餐居然仲有野送添,真係胃口細尐都食唔哂。下次可能要帶定食物盒去帶走,好過夾硬食得太飽。 荃灣廣場裡的小店,都幾有日本味,燒物處理得好好,行過實會被香味所吸引 二人餐既份量好夠,其實B餐都好出色,只係有人為食,所以要左佢既A餐 本來已經好豐富,今日買單時居然發現免費送多客赤魚 每次都好貪心,B餐既燒魚鮫其實好香好滑,但又想食佢A餐既海鮮丼 佢個燒龍蝦真係好正 仲有個蝦,離遠都聞到個個香味,肉質又爽口又彈牙 個餐本身已經好豐富,今日仲送多個赤魚,真係飽到反艇 本身個餐已經係兩個海鮮丼,一隻龍蝦,兩隻海蝦架啦(仲有兩碗三文魚湯無影),佢今日仲送多條魚,最初諗住送既可能只係細細舊,點知係成條喎,真係飽到反艇。 食完好倦好眼訓,個尐荒誕既新聞,都係擺埋一邊算。