細個讀到介紹香港既文章,價廉物美係其中一個好經常見到既形容詞。以香港一個彈丸之地,點解會吸引到咁多外國人遊客﹗﹖就係因為佢地覺得香港抵玩,就好似我地鍾意去澳門、台灣或泰國之類既地方,都係因為物價比本土低,但卻得到不錯的貨品或美食。只可惜,有人誤解了香港的吸引力,把本來價廉物美、貨真價實的美食天堂變成了連鎖店、大財團的商舖,從前的賣點變得不再可愛、不再吸引。 香港到底係咪仲係美食天堂﹖﹗再一次,要一個唔食野既人去講評定"美食",說服力好像有點不夠。好食,對我泥講有兩個層面,開心愉悅可以令一樣平平無無奇既食物變得好食,而另一方面,食物既價格也可以影響食物既味道。 你同鍾意既人一齊(唔一定係戀人,可以係親人,可以係好友,總之係你在意既人)一齊去食一樣野,氣氛唔同,感受唔同,即使係同一味菜色,當你心情低落既時候,食不知味,正所謂食龍肉都無味,但你心情愉快,有心神去咀嚼細味口裡食物,自然會多一份享受,多一份美味。 又假如食物賣相可愛,擺碟精美,即便係簡單普通既菜色,你都會覺得特別可口,願意多付幾文錢去換取這種可愛,這種精緻,坊間食一個飯五、六十蚊都覺得貴,但一個五、六十蚊既甜品個個都願意排長龍去食,不就是這個道理嗎﹖﹗ 又有一種美味,係因為價錢相宜而令你覺得好食。例如舊既港式扒房,大家都知佢地既鐵板扒係用鬆肉粉醃製,然後加上濃郁惹味既醬汁去刺激你既食慾,假如食開靚牛扒既,大家都知食緊既唔係靚野,但有見價錢,大家又好樂意去感受下另一種情懷。假如你抱住食dry age既心態去食鐵板牛扒,抱歉,好明顯係你既問題,搵錯地方。 大家都知街邊十蚊幾粒既燒賣唔係咩高檔食物,但有時行過你都依然會想拎十蚊去買,拎住個膠兜企係條街度,邊行邊將沾有甜豉油辣油既一舊二舊粉團放入口,然後好味好味咁以九秒九既速度放哂入口,到底係咪真係咁好味?街頭小食既好味,多少係同佢既價錢同醬汁有關,並唔完全歸功於個種食物。哩種情況,我都只會以抵食泥形容,怕身邊朋友抱著“好食”去搵,但卻只得到一般既味道。 尋晚正正發生左哩個情況。話說朋友推介係深水埗南昌街附近有間新開既串燒小食店,相約一齊去食好野。因次朋友介紹,主要係朋友既朋友新開既,一心諗反正傾計,一口答應,無刻意搵資料。按地址去到朋友所介紹既“餐廳”,確實有點恍住了。朋友相聚,我最初諗住盡管係小店,起碼都係有幾張檯個種吧,方便傾計嘛﹗點知去到,才發現真的是小店,店呈長條形,只有兩張靠牆既檯,大概可招呼6個客人。我並不介意小店,只是一心諗住傾計,無諗過係靠牆長檯。店主熱情,食物不過不失,真的是小店風味嚕,相對起同類的店舖,收費算抵,所以今早係交友網站有略略一提,一直只用抵食一詞,完全無提過"好食"之類既字眼。 誰不知另有朋友睇到後下晝即刻去試,食完雖未至於埋怨,但總帶點責備,覺得有被騙之嫌。這可真寃枉,小店價錢,小店食物,真心覺得抵食,要求別太高啦﹗﹗ 又有種食物,味道又好,價錢又大眾化,哩種情況,通常都會配以排長龍。因為食物質素夠好,有時老店什至不在意裝修,其中一個經典既例子,一家粉嶺既老店,舖內完全無冷氣,無裝修,但依然日日排長龍,店裡只買三數樣招牌菜,其他別的充充欠奉,天氣涼還好,天熱的時候,個個客人都汗流夾背,還是樂意在頰小的店裡等上半句鐘,才能找到位置坐下,然後大口大口把熱呼呼的美食送進口裡。 當然另外仲有一種美食,打正旗號話你知係高檔次餐廳,但收費不菲(真係神經病,我以為尋晚打哂,原來倦得滯打到半路訓著左﹗)唔~~~哩種情況,一般對我都唔特別吸引,山珍海錯,價值不菲,恐怕再美味你都不會日日幫襯吧﹖偶爾一次無妨,我想即便是富豪,日日大魚大肉對身體也不見得有益﹗偶爾因工作需要,或特別節日,到這些高檔次的餐廳,倒是無可厚非,但個人來說,我還是喜歡簡單的美食,較人性化的美食﹗﹗﹗