我地好習慣講大眾市民，但係我地既社會，到底何謂之大眾，又何謂之小眾﹖﹗ 自己好似一直都在走小眾的路，有機耕種係小眾，環保係小眾，手語係小眾，依家，連想有公平自由，都變成小眾﹗ 一而再，朋友問我點解手語唔係全世界都用緊同一套既咩﹖依家耳機、人工耳蝸咁方便，佢地學識讀唇咪得囉，仲點解要識手語﹖小眾，我地總希望別人去改變自己來迎合自己，覺得自己必然是站在大眾的一群，無必要要為小眾作出配合，即便配合，最好盡量唔好影響到日常既運作模式，咁樣，真係仲稱得上為配合嗎﹖﹖ 有時去外地旅遊，你總會學一兩句當地話，同人打個招呼，其實人地再覆返你你係唔會明既，但點解你都會去學個一句半句吖﹖咪就係覺得想入鄉隨俗囉﹗﹗咁點解對於聽障既朋友唔可以哩﹖﹗話說星期六去幫手做義工嘉許禮既招待，席間有兩位聽障朋友，佢地見到有人識用手語同佢地打招呼已經好開心。其實香港電台好有心，每年都會拍攝有關聽陪朋友既節目，叫手語隨想曲，今年已經係第五輯，每集都會教簡單既手語，那怕只係學會一個半個，就好似你去外地旅遊時學個一句半句當地話，係一份尊重﹗今年節目仲有五分鐘增至三十分鐘，同朋友提起，基本無人知有個咁既節目，反而投訴宣傳不足，到底，係宣傳不足，定係不感覺趣而視而不見哩﹖﹖ https://www.facebook.com/Sign5 香港電台製作既手語隨想曲﹗每個星期日晚播，要留意啊（已經播左兩集） 聽障係小眾，環保大家講左咁多年，時至今日都依然係小眾﹗有好多朋友都仍然局限係講，好似之前提及過，有朋友出街食飯叫到一檯都係，然後好大聲咁話要打包，高呼環保，我既理念係源頭減廢，電視廣告有賣架，食得哂先好買，食得哂先好叫，咪做大哂鬼，點解你每次都要叫到一檯都係跟住唔食﹗然後係席間會嫌哩樣肥，個樣鹹，然後咬一啖就掉在碟旁，一餐飯用兩包紙巾，每日都總要去連鎖咖啡店買一杯有該舖品牌既咖啡，然後拎住四圍行﹖我先唔好講幫唔幫襯連鎖咖啡店，就算我當你真係要買，依家大家已經多左意識走杯，你既然唔介意將食物打包，帶個杯出街唔難姐﹗其實我既做法係直唔好買，自己帶飲品，假如你真係要飲咖啡，自己沖囉﹗ 朋友早前專誠送我一雙木筷子，話係環保筷子，用舊家具既木料做成，筷子原意係好，但係。。。我唔缺筷子喎，我屋企夠用了，如果你話方便帶出街，咁點解唔去搵尐唔用即棄餐具既餐廳用餐哩﹗﹖又。。。最近有人提倡用金屬飲管，買凍飲時拎枝自備飲管自覺特別有型。身邊人都鍾意飲凍飲，但與其四圍買凍飲，我會選擇帶保溫壼，出門前加入冰塊預先為他準備飲品，保溫壼的冰塊可保存一整天，只要到補水站加水，就一整天在外也能有冰凍飲品，身邊人也樂意接受﹗ 公司推環保，建議紙張雙面印刷，係呀，同事或者係會雙面打印，只不過，大部份時間打印出泥既都係無用既資料，電郵資料完全唔過漏唔整理，隨手就按全部打印，印哂出泥發現大半係無用既﹗﹗ 其實要環保，要愛護大自然並唔係新思維新議題，但卻到今時今日大家都依然站在原地﹗自問都仲有好多過往貪方便既漏習要一一改過來，只希望，這小眾會慢慢變多，慢慢變壯﹗ 講環保，好自然會連帶有機生活，有機飲食，食落肚，我以為大家既關注度會比較高啦﹗答案其實好易知，近十年，每年都會遮打花園舉辦全城有機日，我自己都將會準備參加第四次，諗住同朋友推廣一下，但得返泥既回應係，咩泥架﹗ 3月12日於遮打花園舉行的全城有機日 官方網站資料：http://www.hkorc.org/ 我懷疑應該反省既係我，應該係我所識既朋友有關題，係自己無選擇志同道合既朋友，又無認真咁去將自己既信念推介畀身邊朋友﹗ 全城有機日要再等一個星期，但今個星期日有樣好有趣既活動，雖然唔關環保事，但我自己覺得係一種文化既傳承，其實我經已唔記得點解會去留意一個唔係自己社區既活動，不過回頭細數，由第一年誤打誤撞到今年，經已過了五個年頭，今年將會係第六次參觀﹗ 並唔係對宗教儀式有興趣，只係難得仲有一個社區，居然可以街坊鄰里唔介意，係活動當晚將成條街既燈（包括街燈同建築物既燈）全都關上，點解﹖﹖想知（無論係咪攝影既朋友），都可以今個星期日去大角咀搵答案﹗ 大角咀廟會 我唔知其他區有無類似活動哩，應該多尐人知，多尐分享﹗ http://www.tkttemplefair.org.hk/b5/coming/activity.html
