哩幾日天氣突然轉冷，最好既節目係留係屋企，㩒住張被係屋企張梳化睇下旅遊書同網上資料，準備下個旅程既行程同住宿。奈何有義工活動，仲要一早出門，唯有食個暖胃既早餐應付一整天既行程。 如果工作壓力大既時候，我會一口氣食兩個菠蘿油，加兩支全脂鮮奶，以應付忙碌既工作。 最愛菠蘿油 食菠蘿油係生理需要，係精神受壓時身體會發出訊息，想要高脂肪高熱量既食物以維持動力。但天氣凍，心情又無特別低落，心裡掛念既係另一種食物 - 糯米包。 讓人懷念既糯米包 同朋友講起，先知原來好多人都唔知係咩泥，係咩既樣，鹹既甜既完全無認知，但糯米包對我泥講係一樣充滿回憶既食物。 以前食到既糯米包，一般一個蒸籠都會有三個，每個都係用類似燒賣皮既黃皮（唔識整，所以純粹靠古，感覺應該係燒賣皮掛），叫得糯米包，饀料梗係有糯米啦，一粒粒好有咬口既糯米飯，夾雜葱花、蝦米、花生，仲有咩哩，我都唔太記得啦，大概係咁上下啦，嚼勁中滲透鹹香，份外滋味。對於我，糯米包除左鹹香，仲有濃濃既爸爸味。同爸爸相處時間少，無咩具體既經歷，沒有具體既回憶，因為家貧，媽媽又外出工作，由細到大都係我負責準備早餐比兩個哥哥同細佬，通粉，米粉或粥之類，只有爸爸行船返港，又或從澳門休假回港，先可以得到外出食早餐。後來爸爸開始留港工作，就開始每朝返學前帶我地去樓下茶樓一盅兩件先返學，雖然只係短短既一年時間，但起碼哩一年我唔再需要晨早爬起身煮早餐。而個陣最經常會食到既，就係糯米包。對於平日唔會得到出街用餐既人，哩幾個糯米包已經係人間極品，仲係爸爸既陪伴，雖然最後爸爸不辭而別，但糯米包依然係能夠帶比我支持同鼓勵，什至被寵既感覺既食物。 只可惜，唔知咩原因，糯米包越來越少地方有得食，早年係蓮香食過，但已經完全唔係個回事，包入面既飯好糊，完全無左個種飯香同鹹香既味道，實在失望。每次同朋友提起，大家都會誤會左係糯米包什至糯米雞，原來真係咁稀有既咩？ 糯米卷係白色既蓮蓉包奶皇包個種皮，而糯米係甜既，完全唔係個樣野。依家無得食糯米包，的確會退而求其次食糯米雞。可能年輕一輩未必知，只係奇怪地連同齡既朋友都唔知，不過，縱然未必個個都識，反而顯得哩份記憶更加特別，更加珍貴，當然仍無法認同爸爸離家出走，拋棄家庭既做法，然而記憶始終沒法修改，也許無緣再見，仍希望能偶爾品嘗一下那份回憶！ 依家大部份人都著重食物既價值，會不惜千里迢迢去外國一嘗美食，又者排長龍等上幾小時但求食到人氣食品，即便人間美食，一剎那既味道，未必能留下深刻記憶，除非，食物同某個人某件事聯上，才會變得珍貴，你懷念的味道，會係係邊度，同邊個一齊品嚐的食物哩？！
