已經接近2月尾聲，突然先泥凍，上星期落左第一場春雨，以為會開始踏入梅雨潮濕天，點知反而係轉涼，真係天氣不似預期。 半夜三更，巫婆製藥中 屋企人濕疹發作，諗住煲點食療輔助一下，但遇到一個問題，藥方寫要加紅糖，於是又心生好奇，紅糖？姐係片糖？蔗糖？咁黑糖又得唔得，平時一知半解，根本唔會去研究糖，廚房有冰糖片糖，方便煮餸，但突然話要紅糖，就滿頭問號，唔太肯定係咩，活左幾十年，知識實在太薄弱。 紅糖、片糖、黑糖，一大堆唔同既名，其實歸根究底咪都係蔗糖，只係煮法同時間唔一樣，於是又搵著我泥搞。 最近因為同朋友一個新計劃，開始去認識梳打粉，先知原來梳打粉係有工業用既，梳打粉唔係都係食既咩，何來工業用。。。有時真係難得糊塗，你唔去觸及就唔會知原來自己有幾咁無知。。 人心亦一樣，好鍾意認識新朋友，我係減分法既人，姐係。。。我識既每一個人最初都係一百分，都係好人，都會視之為好友，但每每走得越近，就越會觸及對方的黑暗面，有部份既黑暗面或能接受，又或從哩尐黑暗面帶我去認知另一個世界，另一種想法。但有時有尐黑暗面會觸及自己既道德價值，從而慢慢減分，從而疏遠。 我能夠接受朋友係花花公子，同性戀，但接受唔到利用別人既人，接受唔到恃財凌人既人。其他性格上既毛病可接受，反正我自己都係怪人，朋友相處都係互相體諒，互相遷就，但假如價值觀太唔同，我通常都會自動消失。 講起朋友，有無試過同朋友心靈相通。話說今日返學前我突然想起一個朋友，點知放學返家就收到佢短訊，哩個情況唔止一次，但有趣既係，同哩個朋友其實好少見面。 人既緣份真係好得意，哩個朋友其實係係2014年，我去東歐時認識既。當時去到Salzburg，無意中見到間中菜館，當時已經出左門成十日，既然見到，又即管試下。餐廳出奇地旺，餐廳職員示意我地唔好等，再追問下，餐廳職員叫左另一個女生過泥，個個女仔貌似9 混血兒，心諗外藉店員會推哩個過泥，莫非佢識講中文？於是大膽用廣東話問，係咪要等好耐呀？ 哈，緣份就係由哩句說話開始。果然，佢係識講中文既，仲係廣東謝添，佢一聽到我開口，又驚訝又開心，好似見到熟朋友一樣咁開心，叫我地稍等。過左無耐就幫我地安排座位。 奧地利朋友送我的貓頭鷹 我真係十萬個好彩，又有眼不識泰山，原來哩個“女仔”正正係餐廳既老闆娘，佢係香港移民去Salzburg已經有40年，難得見到香港人，所以只憑我一句說話，就換來熱情款待。我係Salzburg留宿左三晚，三晚都傾到佢收舖，又三晚都無比過錢，本來佢地係做自助餐既，但由第一晚開始，已經得到不一樣的招待，蒸魚啦，老火湯啦，叉燒啦，當地所有特色飲品。。。等等等等，真係搞到我鬼死咁唔好意思，但人生，又有幾回能遇到一見如故既朋友。 一個旅程，令兩個天南地北既人相遇而成為好友，15年我到德國，雖然行程緊密，都轉程安排再去薩爾斯堡探佢，整整一年無見，卻得到上賓，什至等同家人既款待，除左話銘記於心，我都唔知講咩好，臨走仲一包二包既吩咐我帶返香港。 有趣既係，雖然難見面，但總會心有靈犀，好多時大家會同一時間發短訊。有一次，心血來潮給她打視像電話，還真是頭一趟，但原來，朋友剛好受傷了，正需別人安慰，太巧了吧！ 雖然大家都會話，人大左，朋友會越來越少，而我，能在旅途上遇見知心友，夫復何求哩！
