今朝起身睇返早幾日寫個幾篇野，有尐唔知自己寫咩，哈哈，因為全部都係係車上面寫既，有尐敷衍，有尐求其﹗﹗ 近期好多古怪新聞，好似每日都要花好多時間同精神去消化，去理解，再一次，小時候成日都以為人世界既黑白是非都清楚不過，所以時刻警醒，慎言緊行，怕做錯事被人批判品評，人越大，要重新學習大家對黑白錯對的界線同準則，以前睇完新聞容易作出評論，依家，為免多生事端，特別在網路世界，新聞都係自己睇完就算，無謂多加評論，反正，覺得錯既人點都係覺得錯，你又何必枉花唇舌﹗ 我有點正解王既傾向，鍾意講道理，鍾意尋根究底，咩都鍾意問點解，不得不認，有時都幾討厭﹗細個屋企拜神，好多古怪習俗，我係都要問點解，如果認真細想，不難發現好多禁忌其實係環境學或衛生原因，以前既人可能唔識解，只知道咁做好，唯有將之變成禁忌﹗ 連學瑜伽都一樣，學習多年，有尐唔熟既朋友會問，原來你學瑜伽既咩﹖點解唔見你係FACEBOOK放相既﹖﹗瑜伽係一種生活態度，一種想法，無必要係社交網站展示什麼高難度動作來証明自己吧﹗﹗與其展現高難度動作既技巧，我會傾向研究動作既正位概念（其實所謂既正確都只係相對，每個人既骨架唔同，同一個動作唔同既人做都應該作出高整）偶爾見過友練習，會試圖研究關節的重要，不過大部份時間得來既答案係，做到咪得囉﹗﹗唔~~~係既，要專重每個人既取向﹗﹗ 講起正解，今朝溫西班牙文既時候睇到樣好得意既野﹗於是又引來好奇心，花時間在網上找了點資料﹗ 話說今朝學西語教到兒時玩意，其中一樣係跳飛機 - HOPSCOTCH（西語係RAYUELA）。咁樣一講都幾得，原來哩樣兒時玩意，係世界各地既小朋友都有玩，維基資料顯示，世界各地既跳飛機，格數變化，由7格至12格都有，但基本形狀玩法都大同小異，細個既時候咪人玩我玩，根本唔會諗哩樣野係幾時泥、邊度泥，有無咩特別意思咁﹗ 大家細個都會玩過既跳飛機 到今日上完堂，再係維基百科搵下資料先知，有說話最初係羅馬士兵既鍛練方法，著住整副盔甲泥跳去訓練體力﹗而士兵所跳既有100呎咁長，老實講，細個玩跳飛機係覺得悶既，覺得無咩難度又無咩挑戰性，但原來原裝正版一尐都唔易﹗ 哩尐歷史野唔足以引起我既好奇心去搵跳飛機資料，吸引我既係跳飛機方格背後隱藏既意思﹗係課文裡面提到，跳飛機既每個方格都代表著人生所經歷的階段，由出生、長大，成年後遇到的種種困難，過程全都只能以單腳走過，喻意過程的艱辛，我地玩開個個版本，數字9咪大格尐既，意味係天堂，所以能以雙腳著地﹗﹗多左故事，忽然成件事動聽又有意思左，很有趣吧﹗﹗ 另外，古巴或波多黎各（PUERTO RICO）會叫跳飛機做LA PEREGRINA（意譯姐係THE PILGRIM GIRL - 朝聖的女孩），而個九個格代表住穿過煉獄通往天堂所要經歷的苦難﹗﹗ 不過，對一個大概經歷過人生種種既大人，哩種故事也許覺得動聽，對於少不更事既孩子們，又點會起到吸引力哩﹗ 最後，我見到網上資料，英國既跳飛機都幾靚架，每一格都有字，應該係一邊跳一邊有歌仔唱既，或者係英國長大既朋友會知，而對我哩個一直都係香港長大既鄉下仔就泥得特別動聽﹗ 我睇到其中一首歌既內容係咁既： ONE FOR SORROW, TWO FOR MIRTH, THREE FOR A WEDDING, FOUR FOR A BIRTH, FIVE FOR RICH, SIX FOR POOR SEVEN FOR A WITCH, I CAN TELL YOU NO MORE. 只係兒時打發時間既玩意，原來都可以演繹為咁有意思既故事﹗﹗ 跳飛機的故事- 維基百科
