雖然我唔鍾意過節，但除非你完全無屋企人同朋友，要不，你幾怕煩都依然要過﹗儘管你幾唔想去街市同人迫，老人家話想蒸糕，你再忙都要現身，陪佢拎住十幾斤蘿蔔返屋企，然後刨到手都斷，蒸起一盆又一盆唔知食到幾時既糕點﹗蘿蔔糕年糕都仲好尐，起碼有人食，油角油器先搵泥搞，唔知依家仲有幾人會自己係屋企整糖環，應該係問有幾多人知係咩泥﹗搓完面團仲要放作木模，用刀砌斷粉團又再拍佢返出泥落油鑊炸，功夫之多我真係寧願畀錢人賺，最慘係無人食，老人家就係咁，傳統，年年做開，唔做唔安樂，總覺得你唔做或做得唔夠好，來年就會有唔好既事發生﹗ 好矛盾，我絕對同意傳統習慣應該係要保留既，應該係要有人識有人繼續傳承落下，不過我真係太懶﹗假如要解究點解我唔鍾意食野，主因一定係我懶，我覺得反正食落肚都係化作一團，只要健康同飽肚就可以，何苦花咁多功夫時間同心機去搞一大堆名目﹗事前同事後都要做餐慒執餐慒既，我情願唔食﹗﹗ 媽媽雖然目不識丁，但對住傳統手藝好認真；問心，味道唔算出色架，只係佢肯做，裹糭、炸油角糖環、蘿蔔糕年糕、雲吞水餃，佢樣樣都會，只怪有個又懶又唔鍾意食既女，我恐怕佢既手藝都係會被迫失傳架啦﹗真係對佢老人家唔住﹗ 講起傳統習俗，除左年廿八洗邋遢、年廿九洗碌柚之外，唔知仲有幾多人會謝灶哩﹗雖然唔贊成媽媽迷信，但當故仔聽下都幾得意既﹗ 拜神上香既人都相信廚房由灶君看管，會負責照顧各家各戶既飲食平安，而灶君因為只係打工仔一名，所以都係有年晚收爐哩個動作，話會返上天庭稟報玉帝民間疾苦，而點解我覺得得意，可能係因為感覺上灶君唔算係神，阿媽唔會用"拜神"之類既字眼，而係謝灶﹗而謝灶既用品唔係雞唔係肉，係糖，哈哈，好搞笑，話要畀甜頭灶君，等佢唔好返上天庭亂講野喎，仲要趁佢收爐之前做，咁阿灶君到底幾時收爐既哩﹖又幾時開工﹖每次問哩尐實畀阿媽鬧，話你搞搞震，好明顯係因為佢唔識答而發惡﹗簡單理解就年廿四開始可以謝灶，要係年卅晚前做，咁姐係阿灶君大人會卅晚會收爐啦，而初二開年，我又理解為佢初二開工﹗感覺比較人性，無咁神化，好無聊﹗ 我最鍾意駁咀，我自己會咁理解，所謂謝灶，每次都會放片糖呀、麥芽糖或湯丸之類既甜食，我有尐懷疑，以前衛生環境無咁好，會唔會係年尾諗住做清潔，於是專登放尐甜食係度，引尐曱甴老鼠出泥承機纖滅一番﹗ 早幾日行超市，見到係收銀附近放左尐旅行裝既碌柚葉，我估假如仲有家庭要維持洗碌柚既習俗，十居其九都會買哩樣野取締，有幾多個仲好似我母親大人咁仲年年走去買碌柚葉，到食團年飯個晚係都要迫我地煲泥抹身﹗依家家家戶戶都係用煤氣或電熱水爐，有源源不絕既熱水，有幾多人會肯等個煲碌柚葉水沖涼﹗﹖諗起細個沖涼要拎住個又重又大個，載住啱啱煲滾水既水煲係廚房同浴室中間走來走去，都幾得人驚﹗就算你個煲有多大，煲一煲水要沖完個涼，都幾菲以所思﹗依家的確係浪費既﹗ 阿媽成日覺得碌柚葉可以將衰運沖走，阿媽，咁假如個年你行緊好運仲要唔要洗碌柚呀，細個就最鍾意問哩尐令阿媽哭笑不得﹗假如以現代科學諗，我估只因為以前既人唔會成日沖涼，更加唔會有香皂沐浴露啦，又一般民工都係年晚先有得回鄉渡歲，風塵僕僕，用碌柚葉水沖涼又醒神又消毒咁解既姐﹗ 一家人就係咁，無無聊聊，話唔做唔做，又每一年都依然鬧住做，然後又重重複複講翻同一番既說話，一樣既駁咀方式，咩年初一唔好掃地，唔好洗頭，係自己屋企都依然會照做無疑，返到阿媽屋企，又會一一執行，傳統，或者係一個模式，但亦可以係一份感情﹗﹗
