開始睇緊意大利既資料，身邊人有點微言，覺得應該花多點時間準備下個旅程，而唔係回顧已經發生左既。 每次睇旅遊書、旅遊資料，都好羨慕人地既組織同表達能力，羨慕人地寫得咁細緻咁清楚，羨慕人地觀察入微，更羨慕人地既圖文並茂，老實講，個心掛住搵路，仲可以影到咁多資料相片，真係半點不易﹗正因每次出走都好多得有前輩無私既分享同提醒，引伸一個想法，好希望可以盡點綿力，以自己所知既幫到其他準備緊旅行資料既人，雖然文字唔夠細膩，資料唔夠詳細，依然好想可以分享自己所見所聞，盡管少少都好，希望有人睇完覺得有幫助﹗﹗ 由香港經DALLAS到LIMA再轉內陸機到CUSCO，由起飛到落地接近40小時，第一次踏足南美，總覺得四周都係壞人，好彩CUSCO既旅館有機場接送，減省左初到埗既不安。但要同旅館聯絡，首先就係要買有數據既電話卡。 出發前做過功課，話秘魯主要有兩間電訊公司，一係CLARO，一係MOVISTAR，唔係四圍都買到旅客用既電話卡，其中一項資料話可在利馬機場買CLARO既預付卡。 的確，係利馬機場既行履運輸帶附近就有一間小小既CLARO既門市，不過，實際情況同資料睇既有出入﹗網上既前輩話CLARO既預付卡大概HKD60就有700MB，有效期用10日，不過利馬機場門市既職員則表示佢地只有一種遊客咭，租借形式，每日收費HKD70，無限數據，仲一定要返返利馬機場2樓既離境大堂另一個門市櫃位歸還。我地情況有尐麻煩，我地中間有幾日會去玻利維亞，實際租用日子只係10日，但就要係16日後離開當天先還到，最初職員唔肯幫我地安排，話要收足16日錢，後尾出動西班牙文求情，佢先肯作出調整。 要澄清先，我知我經常都提要出動西班牙文，查實我既西班牙文來來去去都係得幾句。我係自學既，文法句式對我泥講好難，暫時仲未有認真溝通既能力。我只係想講，係南美地方，帶住幾句西班牙文點都會有尐幫助﹗可能有人會話有GOOGLE TRANSLATE咪得囉，萬一無網絡哩﹖﹗起碼都嘗試學識數數字，簡單識問地點點去，幾錢之類，溝通起泥比較直接，對方感覺都會比較好﹗﹗ 係租電話卡既過程遇到小插曲，店員表示人多租的話可有折扣，正好有一台灣男生到櫃台打聽電話卡事宜，聽到有折扣，問我地可否行個方便﹗因為租用電話卡只能用一個人既資料，最初都怕萬一佢租左唔記得還，費用就會係我張信用卡度扣，後來傾左陣，覺得台灣既朋友都可信，大家到外旅遊，帶著互相幫忙既心，就交個朋友吧﹗﹗就係咁，一落地就係機場就識多左個台灣朋友，後來我到台北上瑜伽堂都有再碰過面﹗﹗ 利馬機場的電話卡，只有租借服務，要回到機場交還 租電話卡比想像中貴，但無數據又唔係好放心，最後決定5個人只租3張電話卡，諗住去到CUSCO再搵。可惜，當我地去到CUSCO，問過好幾間電訊公司，都表示無遊客卡服務，結果，係秘魯境內，我一路都要等團友開HOTSPOT比我先有網絡。 本身已經路盲，無左數據個人變得更加迷茫，錯過左本來想睇想到既景點﹗﹗好彩既係我地回程有返CUSCO留左半日，總算叫做係市內遊走過﹗ 輾轉40小時，終於都踏足秘魯 CUSCO曾經是印加帝國的首都 旅館通往武器廣場的必經之路 CUSCO海拔高，就只稍梢的斜路，也足以讓沒有適應的團友喘氣 相關閱讀：南美之旅（CUSCO住宿篇）
