話咁快又一個星期，周末要陪屋企人，可能要停兩日都唔定﹗ 成個快閃南美之旅，係UYUNI逗留時間算叫做長，共4日3夜﹗ 好多外國遊客去UYUNI，會報3日2夜團去睇FLAMINGO，去睇火山，但我地雖則話逗留3晚，基本只做過一件事，就係要去搵傳說中既天空之鏡﹗因為好好彩有影到想影既倒影，所以後尾我地係有報到一日團去睇什麼火車墳場同埋仙人掌島架，觀光部份同報團心德遲尐先講﹗﹗ 離開PUNO，經COPACABANA到LA PAZ，再直接轉機去UYUNI﹗一落地，五個人就帶埋行履連旅館都唔返，直接搭的士去網路上話專門幫人尋找天空之鏡既旅行社HODAKA，報名當晚0300出發既SUNRISE團去搵倒影﹗﹗ 話說為左趕1720由LA PAZ飛UYUNI既航班，我地摸黑就要離開PUNO既旅館，搭的士去PUNO既巴士站搭0600出發去LA PAZ既跨境巴士﹗本來預計係1330會到，做資料搜集個陣已經聽聞哩段路況比較差，一般都會遲到﹗內陸機，只需係航班起飛前1小時到達即可，咁巴士應該係係市中心停，再搭返半個鐘的士過機場，言下之意我地最遲要3點半前到達目的地﹗ PUNO去LA PAZ個程8個鐘既巴士，真係唔講得笑，前後上上落落轉左兩次巴士，又渡過一次湖，入左玻利維亞國境，路況比較顛簸，感覺同係西藏既通墨天險無咩分別﹗ 本來諗住，如果巴士唔太遲到LA PAZ市中心的話，應該可以順路搵埋找換店同電訊公司。當然，依我既性格，凡事作最壞打算，所以一早係PUNO換左少少Bs旁身﹗真係想唔讚自己都唔得，因為結果係遲大到，莫講話找換店，我地根本連市中心都無去到﹗ 原訂1330到達，但我地當日既點半，係完全未進入LA PAZ既範圍，好彩手機無數據都可以用到GPS，又預先DOWNLOAD左OFFLINE MAP，真係不得不再講一次，我愛GOOGLE MAP﹗到2點半，發現都仲有一段距離，個人開始急，其實車上其他乘客亦唔見得冷靜，大家都有點微言，只係明知出聲都無用，又只好乖乖繼續等﹗但我地唔同喎，我地要趕飛機。 諗諗下，巴士係會先路經機場附近，之後再入市中心，其實。。。可唔可以同司機叔叔講聲比我地係附近落車哩﹗唉，司機叔叔唔識英文，我既西班牙文又係有限公司，點算﹗﹗大家都怕瘀怕好似好多事咁，一路有哩個想法又唔敢行動﹗眼見真係遲，如果錯過左航班，再買過機票事小，我地今晚要流落LA PAZ喎，最好唔好啦﹗﹗為左唔想訓街，於是硬著頭皮走出去同司機叔叔講，好彩佢明我既意思，係附近搵位停比我地﹗ 大家無數據，落左車都有點迷茫，唔知點搵路去機場，五個人拎住五件行履，唯一既辦法就係搵的士﹗﹗我經已唔記得幾錢，但合理架，司機無開天殺價，真心慶幸之前有換到波利維亞錢(Bs)係身，如果唔係都真係頭痕﹗ 本來坐4個人既的士，司機叔叔好人比我地五個上哂，唔好唔記得仲有行履喎，唔想分開有咩差池，迫下沙甸魚都要架啦﹗﹗ 去到機場大概3點鐘，去櫃位CHECK IN，寄埋行履都仲夠時間去搵找換店，唔知咩解，五個人係機場行左幾轉都搵唔到，反而搵到ENTEL（國營既電訊公司），都算好彩吖﹗﹗不過我有點後悔，就係因為買電話咭，差不多用哂之前換既Bs﹗搞到餘下幾日有D尷尬﹗ 電話咭同換錢，我應該係遊玻利維亞的二三事都有講過，所以唔長氣講啦﹗ LA PAZ機場是全世界海拔最高的機場，超過4,000m，假如是從平原直接飛過來的話要份外小心 機票也是簡單的一張感光紙 UYUNI機場既規模，係我暫時見過最細既，落機之後，旅客係要集中係大堂個度等執返自己件行履架，完全無行履帶哩樣東東﹗ 出左機場，我唔記得找換店係已經關門，定係兌換價唔靚，總之我地就無換到啦。由機場搭的士出市區，每人Bs10，頭先講左，我地想報當晚既星空日出團，而旅行社8點鐘關門，我地落機好以7點左右，出市區約10分鐘車，仲唔即刻撲過去咩﹗ 我地有五個人，唔使擔心開唔成團（一團最多6人），而旅行社又好樂意收美金，老實講，匯價仲幾好既添，所以我地諗都唔諗就即刻報左當晚0300出發既SUNRISE團，每人承惠USD15/BS120，留底左姓名同旅館資料(等導遊-姐係司機當晚泥接我地）就慢慢行返去旅館﹗ Uyuni好細，以黃色教堂做地標就最好認，由出左HODAKA向右行兩個街口就返到去TONITO HOTEL，大概5分鐘左右，都算方便。郵局，找換店，手信舖就係後面街﹗HODAKA附近好多餐廳，不過....我地食過其中一間，真心難食﹗﹗ UYUNI地方不大，就只有兩三條街 旅館離大街約5分鐘路程，旁邊是軍營，治安可靠 我們的房間 其實沿途旅館的廁所也差不多，幸好全都提供穩定的熱水 明明話講住宿，點解講左一大堆無謂野﹗﹖哈，唔無謂架，有關架﹗﹗我地報完名行返旅館已經8點幾，係UYUNI，除左旅行社既人會用英文同你講野之外，旅館、餐廳同店舖既人都係講西班牙文既。我地返到旅館，唔想再出去，諗住求其係旅館既餐廳醫肚就返房休息，以準備當晚0300出發，哈，原來一尐都唔求其架喎，旅館餐廳既野好好食，但比完個餐，我地就真係無哂Bs啦，食完先算，聽日再諗﹗ 我地訂左兩間房，一間雙人房，一間3人房，3晚共USD492包早餐，姐係每人每晚要HKD250，相對地貴，無法啦，遊客區﹗有樣好，佢係正軍營隔離，哈，應該相對地安全掛﹗ 管房雖然唔識英文，但好友善好幫忙，例如個晚我地0300出發，旅行社話會開車過泥等我地，管房個哥哥知我地出去，真係專登起身開門陪我地，等我地上哂車先返入旅館﹗後尾團友想拎衫去磅洗，雞同鴨講講左一輪，佢都好好人幫佢地搞掂，不過好貴。 旅館的餐廳 沿途最豐富的早餐 完成第一晚既SUNRISE團，又即刻報埋當日既SUNSET團，返到旅館係第二朝早上9點幾，好彩仲有早餐食，哈，都相當唔錯喎，印象中係整個旅程最好味又最豐富既﹗食完早餐又即刻返房休息，準備下晝再出發﹗如是者，掛住玩，我地係無得閒去過找換店既﹗連日來既SUNRISE, SUNSET團都係比美金，最尷尬係第二晚個餐晚餐，諗住係旅館餐廳食左一晚，試下係出面既餐廳食，點知就中伏啦，我對食物質素既要求真係好低，但個餐我都不得不講，好難食﹗最慘係佢唔收咭，唔收美金，但我地又無Bs，搞左好耐，最後佢係要問隔離舖頭借信用咭機，先有得走咋﹗ 第三晚係點解決哩﹖就係多得旅館﹗第三晚我地又係玩到好夜先返旅館，最初問管房可唔可以幫我換少少美金，答案係NO。NO~~~唔好啦，唯有扮可鄰扮無辜搏同情，搞左一輪，佢叫我試下問餐廳，餐廳個嬸嬸又係扭頭，咁搞法我地會餓死架，後尾嬸嬸願意收美金，但找返Bs比我地，嘩，太感動啦﹗﹗我地就係靠找返個少少零錢，捱埋最後個日﹗ 旅館的餐廳的食物，好像是整個旅程最可口的﹗ 旅館的餐廳的食物，好像是整個旅程最可口的﹗ 因為逗留時間長，也有空拍一下旅館的面貌 因為逗留時間長，也有空拍一下旅館的面貌 因為逗留時間長，也有空拍一下旅館的面貌 因為逗留時間長，也有空拍一下旅館的面貌 UYUNI的旅館是整個旅程逗留時間最長的地方，有舒適的中庭，背包客不愁寂寞 我地回程係搭夜車返LA PAZ（搭完我會話你知，最好唔好，哩程車真係唔好坐，我地已經搵左間叫做有規模既巴士公司架啦，但車廂無之前搭個兩程巴士咁舒服，我都訓得辛苦，其他人就更加難受﹗），所以朝早有時間四圍行下，買下手信，同埋換錢，唉，但係我地走個日係星期日，找換掂唔開囉SORRY﹗除左前一晚旅館餐廳個嬸嬸找返個尐零錢，旅館退房個陣我都只能比美金，都有找返尐Bs，總算有錢旁身出倒La Paz﹗﹗佢地全部都好老實，都係用返找換店個價，所以值得加分呀﹗﹗ LA PAZ到UYUNI，機票約USD100，陸路的話USD30，除非你的預算真的很緊，要不，還是飛機比較好 從UYUNI回程到LA PAZ，我們選擇了陸路，雖然車上有晚餐供應，聽起來好像不錯，但我還是建議選用航空服務為妙 旅館無咩特別，都係同前段係秘魯既差不多，雖然入左玻利維亞講多左西班牙文，有點無助，但當地人個個都好友善好熱情，感覺良好﹗呀，哩度同秘魯既住宿唔同既地方，係房入面放左額外既毛氈，同埋有暖爐，我相信，入凍後既玻利維亞應該都幾凍﹗同埋，有兩個團友，入左玻利維亞之後開始腹瀉，我估係水肚不服，真係記住要盡量飲瓶裝水呀﹗﹗ 上一篇：南美之旅（PUNO住宿延續篇） 延伸閱讀： 遊玻利維亞的二三事（上） 遊玻利維亞的二三事（下） 遊玻利維工的二三事（完）
