獨立枝頭 依家真係好怕睇新聞，尋日咁啱睇到兩單無法理解的新聞，有一單就明明有哂證據，無端端唔知咩理由撤消控罪；而另一單哩，完全諗唔到犯左咩事，就無啦啦比人拉左﹗每次讀到哩類新聞，都好希望只係個別事件，好希望只係無辜的一則，但結果哩﹗﹖就係你越讀只會越發覺那是僅為冰山一角，更荒謬、更可悲的情況，比比皆是﹗ 連日來都係朋友同朋友既聚會，席間難免梗係要傾計，一班人，各有各講，餐廳又嘈，自然不自覺咁越講越大聲，對長期聲帶發炎既我簡直就係惡夢﹗成班人一齊食飯，唔出聲又唔得，但出聲又係死﹗ 倦到爆炸，無諗過一個半小時既電視節目，拍攝工作要由晚上6點開始準備，一直到10點先完，仲未計後期制作既時間﹗ 其實今晚出席左個好特別既約會，手語老師星期二問星期四晚有無人有興趣整蛋糕，細問，原來係幫港台拍攝一個有關聽障人士既節目，難得有機會練習，又有得玩，梗係參加啦﹗朋友知我學手語，個個都好奇怪，身邊又無聽障朋友，點解要學﹗ 今日見到制作單位，佢地都有問，點解你會學手語，其實我自己都唔知點解，好細個已經好鐘意睇人地比手語，早年學學下無學，依家趁有時間又想再學返，其實真係未必用得著架，只係覺得比手語係一件好優美既事﹗雖然我程度還不夠，但真心鐘意睇人地比手語。起碼，一班人傾計，大家係真係會望住對方傾，依家同健聽朋友食飯，其實好多時都係各有各食，一般都係邊拎住手機邊自顧自咁講，到底係咪真係傾緊計﹖定係純粹搵人陪你坐﹗﹖ 與其睇讓人無言既新聞，我選擇跟一班無語的朋友一齊﹗ 原來短短半小時既節目，要拍成個鐘，對於所有攝制隊人員，真心佩服 迥左一個安靜又愉快既夜晚，仲有野食，真好
