今日我估大部份人都有得放早﹗最初節日放早既原因係想比你早尐返家陪下家人，但依家好似變左係比時間你塞車咁，除非你放半晏，要不，早放一兩個鐘，分分鐘塞完車返到屋企，其實同平時入屋既時間唔會差得好遠﹗﹗ 又，今朝一早有朋友傳來短訊投訴無得放早，而另外則有朋友話佢地得到今日，星期五（23號）同30號都有得放早，唔係過節，只係接近假期，又點解要放早﹖﹗放早喎，當然開心，只係唔明，幾時同點解節日放早變成必然﹗﹗ 做冬，實在又有幾多人知道點解要做冬﹗其實仲有夏至，但我地又唔會慶祝夏至，偏偏冬就大過年﹗我只知冬至係全年日照最短既（北半球泥講），過左哩一日，理應日照時間會開始長返，姐係象徵嚴冬快要過去，或者係咁，所以要慶祝掛﹗﹖真係唔係好識﹗ 到底幾時開始，冬至去到咁大，一早你就會係手機收到朋友們四方八面傳泥既祝賀短訊同圖片，好似唔同人講冬至快樂係一種罪過﹗不過我既經驗人，唔係所有人都慶祝冬至，我既上海同北京同事都唔做冬既，早年傾計提起，佢地都好奇地點，點解香港人咁重視冬至，點解要講冬至快樂﹗原來，佢地既冬至係祭祖掃墓既日子，所以佢地會覺得我地好奇怪，整咩要慶祝﹗ 星期六同屋企人提早慶祝冬至 我對節日並不感興趣或興奮，但上周六都預早同屋企人出左去酒樓食飯﹗電話訂檯時，酒樓話怕節日客人訂枱後會NO SHOW，要求落訂﹗訂枱食飯都要落訂，有無咁嚴重呀﹗如果唔係同屋企人食，我真係啋你都傻，寧願去第二間，同屋企人食，無法啦﹗去到酒樓，當然只係得套餐，無得散叫﹗好彩食物質素都好，要不真係一肚火﹗﹗節日，明明只係為左想同家人朋友相聚，點解會變左商業活動﹗﹖ 節日明明係想同家人、朋友相聚，點解我要比錢跟風﹖﹗明明平日都見面，點解要羊群心態去做一式一樣既野﹗﹖莫非真係只得我覺得奇怪﹗﹖就泥聖誕，朋友們聚會都被迫要買一堆為買而買，好似好有用但實際又唔會點用既野作為禮物﹗商場四圍都貼滿聖誕套裝、聖誕優惠既野，我見到一大堆人我已經唔想埋去，點解我要迫餐死然後仲要比錢買埋一堆無用既野哩﹖ 我都會趁節日約平時少見面既朋友食飯，但唔會去大酒樓大餐廳囉 我知我真係好估怪，大家都覺得過節要大肆慶祝既時候，我偏偏要反其道而行，我唔係想扮特別，只係，我真係唔明，我既慶祝，我既喜悅，要受制於商家同大財團﹖﹗係咪，我唔跟風，就得唔到快樂哩﹖﹗
