哩一篇其實12月9號已經打好，但手機程式故障，無法選擇分類，當然更加無法上載，要等到用電腦先可以處理，咁樣一等，就等左個幾星期﹗ 期間唔係無開過手提電腦，只係思緒比另一件事佔據左，即便開左電腦，個心有點忐忑，有點焦慮，完全無法安靜落泥，再無心機同文字談戀愛﹗ 話說，12月9號個個星期五，突然有一間早年應徵過既律師搵我，話佢地需要請我平時做開既職位，問我今次會唔會考慮，如果有興趣就補返份CV比佢地﹗ 哩間公司我四五年前已經應徵過，當時已經受聘，只係當時任職公司既上司出面挽留，心軟又婉拒左哩一間，事隔幾年，佢地又打搵我，係巧合﹗﹖定係緣份哩﹗﹖ 好知道我能付合她們的入職要求，而對方既待遇亦相當唔錯，現職那位獲升遷轉到美國，所以要找替補，真係無諗過人地仲會記得你哩個當年忘恩負義既人﹗就係哩個電話，令我哩十日來陷入掙扎﹗ 哩年多，我完全無動機亦無意欲要再戰職場，都唔知算係退縮定係沈澱，總之就係本來已經無心戀戰既人，連工作都唔再需要，整個世界好似再同我扯唔上任何關係。 我並不討厭工作，只係當金錢對我泥講再唔重要，過左年多半退休既生活，去左好幾個唔同既地方，見過說著唔同語言既人，但我依然未搵到生命既答案，依然係同返工時候一樣，空洞既人生，空洞既驅殼。突如其來既聘請，係咪一個方向﹖ 好混亂、好矛盾既心情，人生，唔可以話關機就關機，但一路走來，行既每一步都只係理智上面覺得要做，起碼做左唔會令身邊人擔心，覺得你古怪﹗要裝作一個熱血既人但底蘊卻冰冷無比，實在可悲﹗ 常常安慰和鼓勵別人說，先裝備好自己，靜待時機，但一個冰凍的心，到底什麼會是時機﹖﹖ 有時候，與其摸黑上路，不如靜候光明
