本來仲諗住星期三唔使做義工，可以靜靜地咁係屋企著手寫埋個幾篇秘魯同玻利維亞既文章，點知突然有朋友約食晏，出城走左一趟，成日時間又無左。 如常咁做完瑜伽同西班牙文練習就出門口，遇到件有趣既事，出門搭電梯個陣遇到個叔叔，其實哩個叔叔成日都會撞到，樓上樓下，有時熟口熟面既大家都會點頭微笑示好，相熟既什至會打個招呼，但哩個叔叔比較嚴肅，我既微笑從來都唔會得到回應(so sad)，咁但係無理由迫人地同你打招呼架嘛，大家都有選擇權。 叔叔係推住單車入電梯既，叔叔行動不算靈活，我都有按住開門鍵等佢出入，咁當然大家都係無眼神交流同任何示好既接觸啦！跟住離開住所大堂，佢就踩住單車穿過附近既公園，其實我要搵去銅鑼灣既巴士方向亦同，只係佢踩單車，我行路，速度當然唔同啦。 其實由我家行到去車站，唔使五分鐘步程，我行到去車站既時候，居然見到剛才個位叔叔係樹泊緊單車，當時反應係，係咪我應錯人哩？仔細一望，叔叔既單車坐墊係包左幾個背心膠袋既，所以肯定無認錯人，唔。。。可能佢想行下先哩，我無理就繼續行去巴士站排隊，企左陣回頭望，依。。。阿叔叔排左係我後面。。。意思姐係，叔叔專程在家踩左。。步程只需五分鐘路程既單車去巴士站搭車，哈。。。心裡滿是疑問，不過，都係個人選擇啦！ 等左一陣，見到我地要搭個架巴士迎面駛來，因為有另一路線既巴士先到站，所以停左係後方等待埋站，排係我後面個位叔叔二話不說咁走出馬路行去我地要搭個架巴士拍門示意叫司機開門。司機無理會，依規矩咁等前面架巴士走左先慢慢靠近車站，不過叔叔好急不及待咁一路貼住巴士行，司機迫於無奈咁停車開門比佢上車，然後善意咁提左一句，阿伯，你咁樣走出馬路好危險架，叔叔依然一句都無理就係下層坐低左。 我習慣會上上層，覺得無咁局促，巴士行左無耐我隱約聽到司機係下層大叫，阿伯，架車行緊，你咪四圍行來行去啦，原來，叔叔拎住佢個枝用尼龍繩包裹既木枝（應該係叔叔既拐杖）行緊上上層，係上層來回徘徊左一陣就係前方既空位坐低。其實哩架巴士，唔係繁忙時間一般都只得小貓三四隻，叔叔可能小出城（哈，我可能遲尐都會咁），有點不安咁四排張望，無意中，我發現叔叔戴住耳機（助聽器）。 男仕一般自尊心較重，上左年紀更會怕因為身體機能退化而被看扁，大概叔叔都有哩個問題，所以對身邊既所有人都不太友善，說到底，只是怕露餡了，怕被人視為弱者。 面對哩種自尊心過強的人，想要打開隔閡，一般都要先示弱，再示好。哩個係多年來參與義工活動所得經驗。有時陪老友記外出，阿姨婆婆們還好，佢地一般都會量力而為，反之是叔叔伯伯，多半都會死頂到身體不適才被迫停下，遇見哩種情況，我都會示弱話自己捱唔住要休息，撒嬌嚷他們停下來陪我。通常佢地都會邊鬧你無用邊停低休息。其實，人生誰勝誰負，又有咩關係哩，大家開心就好了。 自尊定自卑，其實真係一線之差。反觀，身體殘障既朋友反而來得活潑開朗，樂天知命（當然也可能只是部份吧！）我的兩位手語老師都是聽障人仕，其中一位是完全失聰的，最初也擔心在課堂上會難以溝通，而事實係，兩位都風趣幽默，完全失聰的那一位的課堂更是生動靈活，讓一班怕羞既同學不怕笨手笨腳的比手，課堂總是在歡笑聲渡過。我總懷疑兩位導師是過活兒，要不怎會對所有上山下海都活動都精通熱愛？！ 同朋友食完晏，去誠品睇左陣書，鼻水一直流個不停，難得出城，點解會突然唔舒服架，鼻水直流既程度係手巾仔都唔得，最終我係用光兩包紙巾。食左藥都不果，仲擔心聽日無聲講故仔添，點知返到家又半若兩人，睇泥，應該係耐無出城唔習慣銅鑼灣既空氣，係鼻敏感而唔係冷親。斃啦，原來哩一年來，我已完全同城市分離。。。。 雖然約左晚飯既朋友臨時甩底，但帶左本西班牙文既工具書返家，又睇左幾本意大利既書，作為明年旅行既準備，充實既一天，也不賴吖！！ 拉丁系既字彙都有性別之分，動詞除左要按時態變動，仲要按人稱而變動，一個動詞起碼有15種變化，要掌握實在不易 買左機票出年去義大利，又要開始準備資料
