星期一行完山對大脾都仲係酸酸軟軟咁，今朝仲要教PT，真係體能極限大挑戰，好彩只係做體位治療，運動量唔太大﹗ 到外地旅遊，無論你有幾窮遊，即便係一餐半餐都好，你都會想試下當地美食﹗諗返過往既旅程，除左挪威同瑞士係餐廳用餐消費實在太貴唔捨得外出用餐之外，其他地方我地都會安排去較出名既餐廳試下﹗縱然未必全部都好好食，總算係個體驗啦﹗最重要既，就梗係要係社交網站同朋友分享一下呃下LIKE啦﹗ 特別係去東南亞旅行，我估大家都會忽然美食家上身，一日食足七餐，社交網站上載既相片，不外乎都係食、食、食同食既相片﹗最近有個朋友話要係社交網站同其他朋友絕交，原因係佢身邊好幾個朋友都不約而同咁係日本，又不停咁發放日本的美食相片，讓其不但沒能望梅止渴，反而痛不欲生﹗絕交當然係戲言，的確，朋友只可以係你分享既相片中幻想食物既味道，實在有點殘忍﹗ 對大部份要面對忙碌生活既都市人，食物似乎係一個好重要既安慰劑﹗有無諗過，除左食物相片之外，其實係真係可以將外遊期間品嚐到既味道帶返泥香港做手信哩﹗ 哩個係舊年去德國時買既，GULASCH 同ROULADEN係匈牙利同德國既家庭好經常會煮既餸，帶返泥比屋企人同朋友試下 哩幾款湯包超好飲，係瑞士我地有買到返AIRBNB煮，不過怕放入喼個包裝會爆，唔敢帶返泥做手信 係MERCADO CENTRAL DE SAN PEDRO, CUSCO入面我地食過一個小販攤檔賣既雞肉天使面湯好好味，去超市玩時見到有類似既，又帶返泥比朋友試下 今次係瑞士買到既食物包，餅乾唔好食，有酸菜同一尐即食意粉既料包 近哩幾次去旅行，如果抽到時間，我地都會走去超市行下玩下，睇既唔單止係朱古力餅乾之類，仲會走去調味料或即食料包一帶度睇下﹗點解忽然會走去睇尐咁既野﹗﹖ 事緣係舊年我去德國個陣，係當地讀書既朋友叫我幫佢帶點調味包，學生係外地讀書，為左慳錢要自己煮野食，咁偶爾都會掛住香港既味道，於是叫我幫佢帶點甜酸骨呀，麻婆豆腐呀，京都骨呀之類既調味包比佢﹗佢話個邊好難買到，就算買到，唔係好貴就係唔好味﹗個尐醬料包，有煮開飯既都知，通常都係十幾蚊三包咁上下價錢，又平又輕，佢一個人食，一包分分鐘仲可以用幾次，舉手之勞，何樂而不為哩﹗﹗ 咁樣一問，驅使左我地既好奇心，好想知道外地既醬料包其實係點既哩，又價錢會貴成點哩﹖於是又走去超市八掛下﹗平時去旅行，入超市頂盡係買朱古力餅乾返公司做手信，點諗到要去行調味架呀，罐頭個邊﹗﹗加上哩兩年我地開始會租AIRBNB住，自己煮食既機會高，就更加多左機會會入超市，點知一行就出事，真係井底蛙看世界，原來係咁好玩既﹗﹗ 又，我有一對鐘意煮野食既好朋友，因為某種原因近年不能一齊出門玩，平時除左明信片，未必會特別既手信買比佢地（主要係因為我唔鐘意買手信），去超市行行下就諗起佢地，於是就開始左買即食料包返香港做手信既習慣﹗其實都幾好架，價錢又平，可以買多幾款，一般都係粉狀，好輕身，又唔使怕會漏會爆，整污糟行履﹗返到泥香港可以乘機搵籍口約埋一班朋友聚一聚整泥食，分享下旅行趣事﹗ 今次去瑞士，係超市買過幾款好好味既湯包，液體狀，加熱即食個種，本來都想帶返香港比朋友，但好怕佢上機會個篋度爆，最後唔敢買﹗ 哈，其實仲有另外一個原因架，你有無試過，出門前屋企人問你，個邊尐人食咩架﹖無飯食咪好慘囉﹖食唔食得飽架﹖之類既問題﹖唔係講笑，哩尐問題我地每次出門都起碼要答一次，係每次，最好笑個個問題係，咁咪兩個星期無得飲茶囉（去茶樓食燒賣點心個尐﹗），聽到真係跌左係地，老人家既世界就只有屋企同茶樓，好難叫佢地想像其他種族既人係食咩既﹗我好羨慕朋友話我知佢地既父母係會參加旅行團去外地玩，但唔知咩解我地屋企既老人家，唔好話外地，你話車佢出九龍城食野都好似要帶佢去充軍一樣，成功率係少之有少﹗老人家無咩手信可帶，食既就最實際，哩尐料包帶到返泥，十居其九佢地都係藐架，不過係煮既過程當陪下佢地，煮下講下咁，好過買埋尐佢地用唔著既裝飾擺設吖﹗﹗ 如果要去遠門，又有時間，不妨去超市行個轉玩下﹗可能你都會有新發現﹗
