2016年11月14日，大家有無探頭出窗望下個超級月亮﹗﹖係可喜定可悲﹖﹗其實月亮晚晚都係樹，但城市人，人閒心不閒，如果唔係超級月亮哩個話題，有幾人會有閒情抬頭望天﹖﹗ 上班族，每日營營役役埋首伏案，大家都好歡迎有城市新熱話，色髮唔再重要，侵侵侵亦唔再成為話題焦點，連超級月亮都過埋，仲有咩熱鬧可湊哩﹖﹗ 我尋日都有份去湊熱鬧，仲打孖一齊泥﹗﹗ 除左超級月亮，我仲去埋大東山影芒草﹗唔知咩解，孩童年代隨處可見既芒草，近哩幾年忽然走紅，一入秋就個個都湧去影芒草。周末過後，社交網站都唔難見到朋友去完影芒草洗版﹗ 大東山係一個影芒草既熱門勝地，朋友話我知，周末旺過旺角，行山好似行花市一樣，行山客接踵而至。 尋日適逢有個做醫護既朋友休假，問我有無興趣去行下山﹗其實我好少係香港行山，香港既山徑無咩吸引到大叔，無靚景佢係唔會啋我做尐咁辛苦既活動，難得有人陪我行，梗係去啦，仲要係我未去過既大東山喎﹗好彩義工活動搵到人手調動，二話不說就答應了﹗ 本來諗住星期一，行山客應該會無咁多人，又...早幾日天氣轉涼，尋日應該會舒服，但哩尐應該，全部都無出現到﹗ 一早約左朋友十點係東涌站出發，先搭巴士去伯公坳落車，不過某人手腳慢，搞到成12點先落車，伯公坳一開始就係石級上山，真係自己攞泥衰，正午時份，尋日仲熱到爆炸，仲唔哂死~~行左無耐就要抖﹗好彩唔係剩係我地係咁，沿途同我地起步既行山客都同我地差不多，大家邊走傾搭訕，行山最開心就係咁啦﹗ 伯公坳上山既一段，芒草較零星，無咩特別風景睇，不過唔使心急，行30分鐘左右，停低休息時不妨回頭望望對面既鳯凰山，雖然鳯凰山一般都好怕羞，成日都躲在雲霧間，未必見唔到佢全貌，就當踫碰運氣嚕。 山上既天氣真係可以變化好大，頭個一個鐘明明哂到失哂魂，點知都未行到上山頂，四周就開始被雲霧包圍，咁有咁好，感覺比較清涼。 本來無諗住爬上山頂，因為個條路真係好陡好直，沙石路，好容易跣腳，不過朋友話要挑戰難度，又奉陪到底﹗有對情侶想跟我地上，手腳並用去到半路，上不得，回頭也難。 奉勸各位，假如唔係行開山就唔好直上，寧願繼續係鳳凰徑行多陣，係爛頭營個邊上山頂會容易尐。 話哂大東山都係全香港第三高既山（869米），梗係要係山頂個牌度影張相啦，點知朋友為左耍帥扭親腳，除左抵死之外我都唔知講咩好﹗（嘻嘻）教左佢做基本護理，順道休息一下，人潮開始多，有一班大媽好開心咁係石邊影相，又跳又叫，好不開心，偷聽到其對話內容，似乎係常客，真心拜服。另有一班紀律部隊人員趁休假來尋找芒草，鬧哄哄的，實在羨慕。 其間最有趣係4個外籍的銀髮族，年紀雖大，但活力不比其他山客遜色，見佢地影相影到興起，打趣問要唔要幫佢地合照，影完又八掛問多句，是英國人吧？其中一位很奇怪問，點解我會知?點解唔係美國，唔係澳洲，我答話因為口音，另一位就好開心，洋洋得意咁自命字正腔原，回答既係蘇格蘭人，另外兩位係英格蘭，仲有一位係愛爾蘭，愛爾蘭的一位被取笑口音不夠純正，幾位老人家為左口音問題你這樣你一言我一語的聊起來。原來幾位來港已超過30年，大學教授，不過已經退左休，都住大埔，好明顯係好嚮往鄉交生活，每星期都會相約行山，實在充實。 說著說著，幾位老人家仲約我地行完山一齊去飲啤酒，唉吔，我都想，雖然我唔飲酒，但吹水我最鐘意，可惜尋晚要返家陪家人，只好推卻。傾完計，就向出名既爛頭營出發。 爛頭營係係大東山同二東山中間既一堆石屋，但點解係尐咁偏遠既地方有屋，就眾說紛紜，我有見過有人話以前一英資集團為左一解員工思鄉之苦專登起既，亦有見過話係日軍佔領香港時英軍用泥監察日軍舉動手既，又見過話有個爛頭營居民協會，其實只係一班旅居香港既外籍人仕起既，以前可以租用，但後來日軍佔領香港時失修而停止運作﹗搵唔到正式資料，所以唔好理啦，當係古蹟就算啦﹗﹗ 去到爛頭營就可以見到一山都係芒草，如果好彩有陽光，芒草就會好似閃閃發光咁，都幾靚架，不過尋日我地唔算好好彩，一係就喀光，一係就有雲。話到尾，係準備不足，我地係山上面玩左成3個鐘，再唔落山驚入黑就麻煩，如果早點上山，可以慢慢等陽光，應該會見到更加靚既芒草﹗ 落山我地經黃龍坑道返落去北區醫院附近搭車返東涌站，不過問心，如果再行我唔建議經哩條路走﹗黃龍坑道姐係去黃龍石澗一段，石階比較跣腳，而且石階有尺幾高，個幾鐘頭不停落石級真係腳力大考驗。 我知如果要上大東山，除左伯公坳（約個半鐘）同黃龍坑道（約兩個鐘），仲有南山一段，近梅窩個邊，路較平坦，都係約兩個鐘路程﹗如果再泥，我會選擇伯公坳上山，南山走，寧願早少少上山，會無咁斷腳﹗假如真係想行黃龍坑，都係上好過落，特別係如果無行開山既女孩子真係唔好諗﹗兩個鐘較平坦既路，同兩個鐘既石級，你唔會唔識揀掛﹗﹗ 連續個幾鐘落石級，又無行山杖，我去到尾段都真係腳軟，唔敢行咁急，怕突然發軟碲跌落山就好笑啦﹗ 我地最後五點鐘落到赤立角村，但都依然要行山半個鐘返出村口搭車，返到屋企，明明對腳倦到斷左咁，但有人話想影超級月亮，於是又出去走左一轉，不過八點幾，個月升得太高，屋企附近無咩建築物可以作陪襯，任務失敗﹗﹗ 伯公坳上大東山然後黃龍坑道走，GOOGLE MAP話2個鐘，但網上師兄話4個半鐘，我地就行左5個鐘 伯公坳既入口 一泥就係長命石級 我地去到已見到有人落山離開，唔知係尋晚係樹露營定係咁早行完哩 真係無諗到星期一都咁多人 真係無諗到星期一都咁多人 終於都開始見到芒草啦 天氣好奇怪，明明天晴，但好似梗係有一層雲霧咁 山到700米左右，開始多芒草了 開始多芒草，靜靜咁坐係芒草叢中傾下計休息下，幾有意境 開始多芒草了，美少女都忙於自拍 沿路除左芒草，仲有好多雞蛋花 係鳯凰徑上大東山頂既捷徑，比較直同多沙石，可考慮係爛頭營個邊上山頂會容易尐 如果天氣好，其實係可以影到爛頭營既屋架，不過我地到既時候好大霧 剛好有一對情況上到山頂，又偷拍一下 一班又風趣又健談既銀髮族 等左一陣，霧又開始散咁尐 銀髮族朝早十點係南山行上泥，準備係伯公坳走 點擊圖片放大 +10 好多美少女都泥影相 剛好遇到有一外籍女掫影師泥取景 點擊圖片放大 一係原路走，一係就行去南山 我地行黃龍坑徑走 沿路太辛苦無影到相 黃龍坑道入口 落到山仲要行大概半個鐘行返去馬路搵車走 落山會見到赤立角村 尋晚影既超級月亮，不過無襯托，比較唔到
