有朋友早前買到AMERICAN AIRLINES既平機票（港幣8千幾蚊，連稅），準備出年4月去秘魯同玻利維亞，我地今年都係4月去，天氣應該（希望）差不多，所以借左我份行程表過佢睇，點知睇完成班友仔話唔使改照跟，哈哈，有無懶成咁呀喂﹗ 我出門咁多次，最認真同花左最耐時間就係哩份南美之旅既行程（共27頁） 雖側話依足我地既行程，始終事隔一年，再者，我個行程其實係2015年8月已經開始搜集預備，資料有機會會唔同左架啦喎，不如重新檢視一下﹗ 如果主要只去秘魯既馬丘比丘，同玻利維亞既天空之鏡（烏尤利鹽沼），秘魯部份相對容易，一來無簽証既問題，二來網上既資料比較多同詳細，疑問唔多，所以依度唔講住﹗反而最困惑既係玻利維亞既入境簽証問題﹗ 根據我地自己申請既經驗，相信港人去玻利維亞既問題己經解決，無論你持有既係特區護照定BNO，都應該唔再有一、兩年前既困惑，入境完全不成問題﹗不過，可能係西班牙文既關係，我到今時今日都唔係好搵到官網既資料，又或者係唔識搵﹗ 根據維基百科，https://zh.wikipedia.org/zh-hk/%E7%8E%BB%E5%88%A9%E7%B6%AD%E4%BA%9E%E7%B0%BD%E8%AD%89%E6%94%BF%E7%AD%96 玻利維亞將遊客分成3個組別，GROUP 1免簽証，GROUP 2可以做落地簽証，而香港屬於GROUP 3，要入境前辦理簽証。 下面個版面係我係一間叫BOLIVIA HOP既司搵到既資料，日期係2016/11/17 （網址https://www.boliviahop.com/） 哩個資料係20116/11/17我係BOLIVIA HOP搵到既資料，應該係佢同從官方得到既指引，但同我地經歷既不太一樣 我個人對哩間公司印象好好，我地今年4月起行時，本來諗住CUSCO到LA PAZ一段來回都用佢地既服務，只可惜當時佢地未做到日日都有車，我地又要趕行程，最後只選了回程搭佢地﹗﹗佢提供秘魯到玻利維亞陸路主要幾個景點既路線，遊客可自由選擇逗留時間，係中途站落車後，留兩三日先再跟返佢地既巴士繼續行程，彈性較大，收費合理﹗佢地係TRIPADVISOR既評分已相當高。 係秘魯入玻利維亞境，其他巴士公司真係只提供接送服務，而BOLIVIA HOP就會陪埋客人去辦手續，入境稅同船費亦已包在車資內，對唔係好清楚程序或準備不足既遊客，我相信感覺會踏實好多﹗縱然我地係回程，程序大概已心中有數，但有人代勞，依然樂意﹗最重要係佢地既職員英文都好好，路上好幫到手﹗ 不過我主要唔係想推哩間公司，純粹係我覺得佢地較可靠，旅遊公司所提供既資料該由官方而來吧﹗所顯示既似乎同我將會講既唔太相同，，所以我唔敢咁大聲講我地既做法已經係正式指引﹗不過我相信，佢寫個個STANDARD PROCESSING TIME IS 2 WEEKS，同我地預先網上登記個兩個星期都講得通既﹗﹗ 網上申請玻利維亞入境簽証 好，其實唔係咩獨到資料，如果你經已搵緊資料去玻利維亞既，應該係網上其他討論區都搵到類近既訊息﹗ 假如你用BNO的話，就唔使煩啦，直接拎BNO過啦，因為你係屬於GROUP 1﹗連黃熱針都唔使打﹗ 假如你係持特區護照入境的話，你可以入境前（唔知你行程係邊度去邊度，總之你計返你諗住去領事館申請前兩個星期啦﹗）去哩個網址做網上登記先 http://www.rree.gob.bo/formvisas/ 入到去會見到下面個畫面，唔使驚，佢係有英文既，只係西班牙文行先姐﹗ 哩個就係登入網址後會見到既畫面，佢主要只係問你電郵地址，然後寄返申請編號比你﹗ 其實佢只係問你拎左電郵，然後會寄一個編號比你，你依指示繼續完成登記就可以了﹗佢個組編號係有時效架，應該係12小時，過左又要再拎過架，記住香港同玻利維亞剛好差十二個小時，你唔好等人訓緊覺個陣先泥拎，佢個組編號似係人手回覆，我有個朋友拎左幾次都做唔到，佢成日吼人半夜先拎，到佢收到又已經過期，自己搵泥搞﹗﹗ 填表個陣佢會問你提交以下資料架 照片*1 護照影本*1 黃熱病注射證明影本*1（出發前最少一個月就好去打針，每四個人就有一個會有副作用，我地五個人當中有兩個打完發高燒） 信用卡影本*1 離開南美洲或離開玻利維亞證明影本*1 玻利維亞預訂住宿證明影本*1 我唔知有無記錯哩，佢好似全部都要PDF檔呀，完成申請後，份申請表要打印到時交返比領事館架，不過唔使太早做，佢份表有期效架，好似為期15天﹗大家填表時再望一望啦﹗我都驚記錯﹗費用USD30，唔係係領事館交架，係去銀行交，哩個我唔講住，因為我開始眼訓，講左另一樣我開手寫哩篇時最想講個樣先﹗ 持同一本護照進入南美國家 準備出發既朋友同時持有BNO同特區護照，又打算帶哂兩本護照出門，我知哩個係好普遍會出現既情況。 假如...你係打算經陸路入玻利維亞，而你又唔想花時間搞玻利維亞入境簽証，請記緊由你登機個一刻就用BNO﹗當你入玻利維亞境時，佢地係會翻查你入南美境既記錄，你唔好企圖用特區護照先入秘魯或智利等地，然後又拎住本BNO入玻利維亞，咁係唔得既﹗因為無入境記錄，佢地係唔會比你過，但到個陣時你先拎返本特區護照出泥，而你又未做簽証喎，咁你就只有好無奈咁返轉頭，等申請左先再泥過啦﹗ 而我朋友就有另一個情況，佢持BNO入秘魯境，但佢又好想申請個玻利維亞既簽証（有點集郵心態），佢打哂針，又預先網上登記哂，可惜佢拎住本無南美國家入境紀錄既特區護照比領事睇既時候，人地就拒辦，即使你肯比個USD30人地都唔肯做，就係因為你本護照無入境記錄﹗其實佢過關完全無問題架，因為佢用BNO入境嘛，只係佢集郵唔成功姐﹗無論你咩原因都好，記住由入南美境個刻，你要拎住同一本護照﹗﹗ 我有另一個朋友由香港直飛LA PAZ做落地簽証（費用USD100），其實又得架喎（我查實唔理解），官網無講架下，所以我真係唔敢咁大聲講話一定得﹗而且LA PAZ機場係全世界卜海拔最高既機場（4061m），我朋友同佢既團友全部都出現高症狀，行程被迫延遲，所以我自己唔建議﹗ 至於去到領事館既情況，真係要開多篇寫，好眼訓﹗ 下一篇：遊玻利維亞的二三事（下）
