我係一個超級路盲，嚴重程度係，讀書時返學放學，係公司落街食晏，都會行錯同蕩失路。所以無論去邊度，交通都係我最在意既部份，如果我要負責編排行程，就更如臨大敵，要好詳細咁寫好哂點對點既交通，點去，點買票，出左站轉左定轉右，減少搵路既情況﹗ 哩份係8月時家人去東京時為其準備既行程表。兩位年過半百既家人，從來未試過自由行，第一次自己出門，如臨大敵，佢地跟完行程表去完返泥話要再去﹗ 今次去新加坡無寫行程表，亦都無詳細了解乘車資料，好彩係新加坡既地鐵同巴士都超乘客友善，指示清晰，無出現過任何甩轆事件。不過有關車票問題都係唔太清楚，所以返到泥又重新再搵一次資料。 出發前見旅遊書介紹有遊客通用票，分一至三日，諗住三日票唔計按金都只係20蚊波紙，姐係平均一日都係7蚊左右，都抵吖。點知臨出發前兩晚，曾係個邊工作既朋友話我知通用票唔抵喎。哩個朋友出左名精打細算，諗深一層又係喎，大部份國家既遊客通用，除非你真係不停咁搭，要不一般都唔會特別划算。 朋友仲專登拎左佢張EZ-LINK 同電話咭比我，叫我去到當地買多一張就可以了。到底。。。TOURIST PASS, EZ-LINK同單程票又有咩分別哩。我返到泥香港花左少少時間研究，又分享一下。 EZ-LINK CARD 既然我地係用EZ-LINK，就講哩個新加坡八達通先。如果你去地鐵既票站買，就要比S12, 其中S5係不可退還既費用，卡實際可用金額只得S7。如果你係便利店買，則只需付S10，依然係有S5不可退還既費用，實際可用金額為S5。 增值的話你最少要S10，而又好得意，假如你張咭餘額不足S3，佢會鎖卡，你將無法使用，直至你再增值先可以用。（因為我最尾個程遇到哩個情況，亦係推使我要返泥睇返資料既原因） 張卡你仲可以去某些商舖買野時付款添，大至同八達通類近啦總之！我見佢地既EZ-LINK CARD全部都好CUTE咁，我朋友借我個張係LITTLE TWINS STAR，我到地後買到既係TSUM TSUM﹗返泥見佢網站仲有SUPER HEROS既﹗作為遊客，當然覺得可愛啦﹗不過根據網站資料，佢應該有正經樣既﹗如果你唔鐘意太可愛，可以問下票務員﹗ EZLINK既設計都好可愛，LITTLE TWINS STAR係朋友借我既，TSUM TSUM係我地到地時係機場票站買既 EZLINK 收費S12, 實際價值S7 EZLINK CARD餘額一定要有多於S3,要不你要先增值才能繼續使用 每張EZLINK CARD有效期五年，假如你預計唔會再去，可以去返票站退返餘額，注意啊，其中有S5係不可退還既費用啊。 詳情可以去返官網了解一下﹗ http://home.ezlink.com.sg/get-your-ez-link-card/where-the-cards-are-sold TOURIST PASS 我本來想買既遊客通用票，分一日，兩日同三日票，我地留三日，三日票係S30，其中有S10可退還按金，你可臨走前去票站退返，實際票值S20，係三日內可隨意乘搭巴士，地鐵同輕鐵。 返到泥睇原來佢仲有一張叫TOURIST PASS PLUS，得一日同三日，當然貴尐，三日票的話要S38，但唔收按金，可以去CHINATOWN HERITAGE CENTRE免費入場，同埋去一個叫HAPPY FACTORY既地方有一杯免費COCKTAIL﹗我無研究哩兩個係咩地方呀，如果有興趣既人可以考慮一下﹗ TOURIST PASS資料 想知多尐都係去返官網望下啦 http://www.thesingaporetouristpass.com.sg/about-the-passes/ STANDARD TICKET 正常情況下，遊客好少會考慮單程票，次次要排隊買票，未必係一個選擇，但當我去為EZ-LINK CARD充值時見到有人拎住張單程票去充值，覺得好好奇，又去了解一下。 單程票唔難明了吧，就係點對點既單次收費車票，但原來新加坡既所謂單程票係可以用六次架。所以可以充增，玩法係 假如你搭第一程既費用係S1，咁你就要比S1.1，個0.1係按金泥（記住記住，千萬唔好去票站買單程票，要去票機買，其實即便你排隊排到埋去人地都唔會理你，唔好浪費自己時間） 第二程，第四程同第五程車資係S1的話，就充值返S1就可以了 問題係係第三同第六程。第三程可以扣返個0.1按金，姐係車資S1的話，佢只會收你S0.9。第六程有0.1折扣，姐係你又係可比少0.1。有效期一個月。 單程票 單程票 新加坡地鐵官網係http://www.smrt.com.sg，如果你搵車資同地圖資料，佢會自動彈左你去http://www.transitlink.com.sg 佢有小童票，而且好得意，我見到佢話如果你身高唔超0.9米的話（不論年齡）都唔使付款乘車。 講來講去，咁到底用邊個方法先抵哩﹗其實睇到個收費表就有答案，用儲值咭搭車係有折既，而且折扣都幾高添。新加坡地鐵有五條線，另外仲有三條輕鐵，但我無見過。 新加坡地鐵圖 新加坡地鐵收費表 新加坡地鐵收費表 一睇收費表，當然係用儲值咭抵好多啦﹗之不過如過你唔會點搭地鐵，咁就梗係買單程啦﹗ 咁到底買TOURIST PASS好定EZ-LINK好，其實計返TOURIST PASS都OK喎﹗以我地為例，我地只係3日2夜既行程，我張EZ-link card只充值左一次，姐係比左S22，扣起S5張卡既費用，實際得可係S17，我走個陣係剩返兩個幾波紙，姐係我3日行程用左15蚊。而點解我知餘額不足S3會鎖咭係因為最尾個程由SOMERSET返機場我遇到哩個問題，當時唔想再增值多一次，所以走去買左一張單程票。如果用咭應該只扣S1.73，但單程票就要S2.5。 咁樣計返，姐係我地3日2夜，都用到S20，假如買TOURIST PASS仲可以退返個S10按金，而EZ-LINK就反而要比多S5手續費﹗分別只在於TOURIST PASS要比S10按金，你走個陣要預時間去排隊退款﹗我地諗住會再去，所以EZ-LINK就可以留返下次用﹗ 另外，我對新加坡既巴士都真係幾有好感，上落車都要拍咭，按距離收費，感覺踏實尐﹗我只係搭過一條線既巴士，但我見其他巴士既班次都好密，站同站之間既距離又近。 不過車廂內無報站服務，我搵過幾個APPS都只係列明巴士線既站名，而無落車提示服務，如果怕落錯車最好就開住GOOGLE MAP。後尾發現，佢地個拍咭機其實係有顯示即將停站既站名架，所以都可以放心﹗﹗唔想搭的士既朋友可考慮一下問GOOGLE MAP你要去既目的地，巴士會唔會就腳﹗ 巴士新落車都要拍咭，按距離收費 巴士車廂有顯示坐位資料 清楚知道下一班車幾時到 每個巴士站距離相隔好隔 每個站都有站名 雖然無報站服務，但原來拍咭機係有顯示站名架 延伸閱讀 迷失獅城 - 住宿篇 迷失獅城 - 飲食篇（上） 迷失獅城 - 飲食篇（下）
