到訪日期：2016/10/29 - 2016/10/31 咁樣一計，食左兩餐肉骨茶，兩餐海南雞，兩餐蟹，仲有一餐亞坤，金華魚片湯我當係同天天同一餐唔計，雪糕三文治咁小唔計，但都仲有328加東喇沙同沙嗲一條街既串燒，姐係我地係3日2夜既行程食左9號。一般遊客可能算少，但對於一個可以兩日先一餐既我泥講簡直係苦行，怪唔知我返到泥唔舒服，哈哈，真係犯賤﹗﹗ 亞坤 行程第二日我一早落左街買亞坤，一落樓就係，真係超方便，酒店樓下個間舖面唔算大（會唔會其他都係咁上下﹗），我仲驚會多人，點知都唔使等，或者係星期日朝早既關係﹗前一晚已經睇左想試咩，點左一個餐A一個餐C，收銀既阿姨一面煮一面落單，哈...我落完單，佢叫入廚房話加多一個A一個C比妹妹既，呵...妹妹，阿姨咀真甜﹗ 餐A姐係牛油咖吔多，餐C係咖吔西多，套餐，當然包埋兩隻半熟單啦﹗外賣都好好心機，蛋放係小杯入面，西多包多層牛油紙，咁外面個紙袋就唔怕化﹗不過，我想問到底點解咁出名，因為平﹖又唔算吖，個牛油咖吔多我覺得特別既，都香口，如果唔使排隊唔使等，我覺得OK，個咖吔西多，唔知關唔關外賣事，比較軟身，又唔係特別香口。至於個蛋，我鐘意食哩種煮法架，細個屋企都會咁整﹗成件事係，我唔係話佢唔好食，我只係唔識分有幾好食﹗哈....真係對唔住，有人話比好野我食係浪費資源﹗所以我好想知道其實佢受歡迎既原因係咩，好食之處係邊度，等我再慢慢去領會一下﹗ 酒店其實係鄰接SOMERSET@313商場，亞坤就係商場入面 朝早八點幾落泥，都多人買外賣 有單點有套餐，一般都係要餐A或C 証明我平時係唔做哩樣野既，好大部份食物相都矇 有意思 金華魚湯粉面 哩個其實係同天天海南雞同一日食架，我買完雞，已經見到有人買左，佢話都見到有人排，又走去排下﹗魚湯都好鮮甜，清清地，啱哂我﹗ 如果天天係第一條巷，金華就應該叫係第二條巷，都多人排隊 我食得少，只敢買湯，唔敢要粉面 我見林記油炸芎蕉都多人介紹，不過我地去既時候未開（個日其實係印度教既新年） 老伴豆花，朋友有叫我記得食，但我唔想太飽，所以無食到，不過好搞笑，我發現老闆始係長期維持哩個姿勢架 雪糕三文治 雪糕車叔叔係佛牙寺後面，唔難搵，呀，係地圖搵Chinatown Story Board遊客中心可能容易定位一尐﹗其實我見其他地方都有得賣，但咁樣好似人情味濃尐﹗兩塊薄威化餅夾住雪糕磚，好食過澳門個尐﹗我見有人拎住既係用面包夾雪糕架，我估都好食，不過....嘻，應該會好飽﹗ 雪糕車伯伯就係佛牙寺後面 自食其力既老人家，又友善又親切 我地仲食過咩哩。。。。突然諗唔起添﹗吖﹗﹗328加東喇沙，哩個係我一個有親戚係新加坡住既朋友推介架﹗大叔都鐘意食喇沙，所以又冒名試下﹗朋友話佢平日係搭的士過去，我搵過328都有幾間，問GOOGLE MAP佢教我係樓下搭巴士就可以去到門口，車程29分鐘（我地實際只搭左唔使20分鐘），由MIDPOINT ORCHARD搭到去OPP ROXY SQUARE落車就係﹗巴士又平又舒服，超正﹗ 我地係烏節路搭14唬巴士就可以去到加東喇沙，唔使搭的士 返到泥睇返尐相先發現我唔係好識用手機影相，點解張張都鬆郁矇既哩，真係唔好意思﹗其實朋友話我知新加坡搭的士唔算貴，純粹係個人喜好，係香港我都什少會搭，何況出門﹗﹗（講起的士，個日同朋友講開睇極光，諗起當年去挪威搭過一程人生最貴既的士，HKD1,500，一小時車程，有機會再講） 哩間328係離我地酒店最既，其實問唔係遠係，而係附近無野行，如果叫我專登搭的士過泥食完又搭返的士走，好似有尐無謂，所以既然有巴士，當然係巴士啦﹗車資唔使2蚊波紙﹗ 講返食，我睇GOOGLE話佢開10點，點知原來人地星期一係開11點既，泥到其實係要等左一陣，好彩都唔止我地兩個等﹗﹗呵 個湯頭好鮮甜好惹味呀，朋友果然無介紹錯，但我知當日離開之前我係要去食文東記既，唔敢叫兩碗細，而係叫左一碗大既兩份分，有人貪心話叫多個椰漿飯試，唉，我都明，咁遠泥到吖嘛，OKOK﹗ 白痴事件，我返到香港，朋友問我佢個獅蚶係咪好正﹗獅蚶﹖無呀，有獅蚶食既咩，朋友先有氣沒氣地說，湯呀，人地個湯有獅蚶架嘛，要不點會咁鮮咁甜，跟住有份食個個話，係呀﹗一_一...姐係係我唔知，好明顯我真係唔識食好野架﹗ 椰槳飯，普通啦，有尐炸脆左既魚仔，加辣醬泥食，裏腹幾好架﹗不過唔係好習慣飯唔熱，嘻~~~食完行返過對面馬路搭巴士就係，不過搭車都係遲尐先再講﹗ 我睇GOOGLE話哩間舖開10點，點知人地星期一開十一點，泥到有人在等開門 我睇GOOGLE話哩間舖開10點，點知人地星期一開十一點，泥到剛開門 大鄉里，原來人地食喇沙係用湯匙食，唔用筷子的 朋友果然無介紹錯 椰漿飯 哩個告示牌好好笑，唔準帶榴槤內進 食完過返對面馬路搭巴士走 沙嗲一條街 第二晚，我地去睇完GARDEN BY THE BAY（姐係食左膏蟹、食左內骨茶），諗住去影下個隻噴水獅子（人地其實係叫MERLION魚尾獅），咁朋友又吩咐我地一定要去食沙嗲串燒同魔鬼魚喎，反正都係個邊，就搭地鐵去到DOWNTOWN站行去沙嗲一條街（老巴剎個度），食完再去影魚尾獅，跟住返RAFFLES PLACE站搭車走就最順路﹗ 唔知點解上傳左幾次尐相都唔得哩，全部變哂黑色﹗ 其實我地只叫左一碟串燒，其實都無咩相要睇﹗哩個沙嗲一條街被商業大廈包圍，係個度食野既感覺完全係夜晚係遮打道食大排檔一樣，環境氣氛都似﹗個度由街頭到街尾有好多間舖，朋友話7號8號檔好食，網上有人話6號好食﹗其實都好難定斷﹗個度既檯係隨意坐既，沿途每間舖都會拉生意，最衰係佢唔可以一兩串買，全部都有套餐限死哂，如果得兩個人就根本唔會試到第二檔﹗無食到朋友吩咐既魔鬼魚，個個所謂XS既串燒套餐（10串牛10串雞），我只係食左3串就放遮了，嘻，實在太飽﹗所以唔識答好唔好食，風味囉，食風味﹗ 十點幾既老巴剎原來係無人架喎，我仲以為好旺既添 我地揀左7&8號檔 個晚又食左蟹，又食左肉骨茶，好彩佢有個XS既餐，其實都廿串 3日2夜既迷失獅城所食過既野應該數哂﹗無買斑蘭蛋糕，只買左林志源返泥做手信﹗未返泥已經有人話可以再去，姐係都滿意食物啦﹗無咩準備，最初仲諗住會不停蕩失路，好彩只係到埗個日搵酒店耐左少少，然後都順利﹗如果真係有機會再去，想試下尐細舖﹗希望有機會~~~~ 上一篇：迷失獅城 - 飲食篇（上） 延伸閱讀： 迷失獅城 - 住宿篇 迷失獅城 - 交通篇
