到訪日期：2016/10/29 - 2016/10/31 其實係咪應該寫明慎入哩﹗﹖哈哈，真係唔好意思，我係一個唔食野既人，食物對我泥講只係維生既關係，我唔會因為食左一樣好好味既野而開心，亦唔會因為出遊時食唔到某樣野而感遺憾﹗同朋友出遊時，明明已經飽到上心口，佢地會覺得一場泥到，飽死都要食﹗而我哩....哈哈，我既回應係，好飽呀，你食啦﹗﹗ 美食當前，對我有若對牛彈琴，不過新加坡觀光既地方唔多，3日2夜既行程主要都係食，就當作做個記錄吧﹗﹗ 雖則話3日2夜，到埗當天同離開當日都只得半天，實際食用時間只得2日，頂盡都係食到7餐，其實有無哩，都要等我數下先敢肯定﹗﹗逗留日數短，唔企圖以時序去寫啦，不如泥個比較吖﹗﹗ 1) 肉骨茶 我地食左兩餐肉骨茶，聽聞新加坡有三間比較多遊客會搵既肉骨茶，一間係松發，一間係黃亞細，仲有一間係發起人。前兩間都有分店，但發起人好似只得仰光路既本店，對我地泥講唔順路，所以放棄左﹗ 松發，我地係烏節路地段既SOMERSET站住，搵過資料知道酒店對面既THE CENTREPOINT商場1樓（當地叫2樓，總之入商場上一層啦﹗）就有，啱哂，唔使煩﹗ 唔使四圍搵，酒店對面既THE CENTRPOINT就有松發肉骨茶既舖 係商場入面，環境都好舒服，我地下晝3點幾去食，唔多人，但店員都好欣勤招待 我仲以為真係只得肉骨茶賣既添，原來都好多野食架喎 哩個告示牌好好笑，香港都好多茶餐廳怕客人放電話係枱，或者都可以考慮一下﹗ 我地叫左兩份肉骨茶同一份豬手 新加城既食飯都會有濕紙巾比客人，不過要收費，幾毫子波紙，如果唔使用可以退返比店員 我地有去金沙睇水幕表演，知道個度既FOOD COURT（(B2)有黃亞細，反正順路，梗係要試埋，官網資料明明話開到2300架，我地第一晚仲大安旨意影完相先落去，但哩尐野，大家都明賣哂就無，第一晚我地9點幾去到已經洗哂煲﹗唯有第二晚去睇GARDEN BY THE BAY時再落去，不過啱啱食完蟹，仲係好飽，兩個人叫左一碗叫做試下就算﹗﹗ 價錢，我唔記得左黃亞細個碗實際幾錢，但一定貴過松發既7蚊波紙（貴尐唔知關唔關係酒店入面既舖位事），兩間都可以無限添飲，松發當然係店員幫你添，黃亞細係FOOD COURT入面，就要自己拎出去搵阿姐幫你添，如果唔想自己泥，就要去第二間舖喇﹗ 係松發，我地兩個人係一人一碗，都各自添左三碗湯，而黃亞細我地兩個人叫一碗而只加左一次湯﹗向朋友打聽過，黃亞細同發起人都係偏向於馬拉口味，所以藥材味較濃﹗如果要再食的話，我地兩個會傾向松發，原因唔係個藥材味，平日係香港都有自己煲，所以絕對習慣個種藥材味，問題係口渴，松發個湯頭入口好順，胡椒味好香，我地連飲三碗都唔會覺得秥喉，唔會有想飲水既感覺，而黃亞細個湯就好濃，飲左兩啖就好想搵野飲﹗ 至於個排骨，兩間都係每碗起碼有三條一字排，松發既肉質較嫰，食完唔會覺得滯胃，而黃亞細既肉比較老，大家一人食左一條已經唔想食﹗ 不過，BE FAIR，我地去松發既時間係下晝3點，而黃亞細就係晚上8點，好有可能係因為煲得耐左，湯變濃了，肉變老了﹗再者，去黃亞細個晚我地係去食完膏蟹，真心飽，哩個都可能心理上都有影響﹗﹗總之純粹個人喜好，唔代表黃亞細唔好﹗ 2) 海南雞飯 去新加坡點可以唔食海南雞飯，朋友推介我地食文東記，文東記都有好幾間舖，知道係酒店附近有一間，最正仲係佢開到凌晨四點（又係官網話，唔知真定假架﹗） 第一晚睇完水幕表演已經想去試，不過返到酒店附近開始落大雨，落雨濕濕又夜媽媽，費事搵，決定遲尐先﹗又係錯有錯著，雖然話屬同一區，行又遠，搭巴士又唔就腳，反而臨走個朝我地先搭巴士去E COAST ROAD個邊食左個328加東喇沙（容後再講）先再坐巴士返轉頭就仲變得順路左，今次行程對新加坡既交通相當滿意，佢地既地鐵同巴士都好方便，或者我開篇交通篇先再研究﹗ 落左巴士站行前唔使5分鐘就到RIVER VALLEY ROAD既店 由裝修睇泥，完全係做遊客生意既 哩間舖係唯一一間開到凌晨4點半， 可以考慮食宵夜先過泥 唔知有無記錯，我地叫左兩隻雞脾 除左文東記，我地仲試左天天海南雞飯﹗我估有去過新加坡既朋友對天天應該唔會陌生﹗我地到埗第二朝訓醒，施施然先出牛車水（CHINATOWN），行到去MAXWELL FOOD CENTRE已接近一點，加上個日係星期日，仲擔心會大排長龍﹗哈，又好彩喎，去到雖然已經有人排緊隊，但唔使十五分鐘就有得食啦﹗ 搭地鐵去到牛車水（CHINATOWN）站出，見到佛牙寺過對面馬路行上斜就會見到MAXWELL FOOD CENTRE架啦 如果係佛牙寺個邊上泥，根本唔使再花時間搵，一行近就見到人龍，應該就係天天架啦﹗ 熟食中心好大，有好幾行舖頭，雖然人多，但唔難搵位，有職員打掃，所以地方好乾淨整潔 雖然好似好多人，但我地等左唔使十五分鐘就買到 我地都係要左一份雞脾兩份翼 齋睇都覺得天天個雞滑尐 按時序，其實我地係食左天天先再食文東記架﹗最初仲以為天天係熟食中心入面，環境會較輸蝕，結果食完反而仲加左分﹗或者係咁，我地對文東記既期望亦變得高左﹗ 首先可能係我地好彩，我地逗留既3日都唔熱，每日都係廿幾度，大叔怕熱，我最初仲擔心佢要不停換衫，結果3日都有風，縱然係熟食中心入面，一尐都唔熱或任何唔舒服既感覺﹗以為要排好耐隊先有得食，又出奇地快，成件事都好加分﹗ 一個係熟食中心，一個係舖，價錢當然係天天比較抵食啦，最抵死既係，對我地泥講，平野係有好野喎﹗﹗兩間我地都要左雞脾，無論個飯定雞肉，天天既質素都比文東記好﹗天天個雞好滑好嫰，齋睇相都覺得係天天既滑尐（主觀相信﹗），雖則文東記有個個甜豉油，但天天就咁食已經好好食，根本就唔使任何醬汁﹗天天連個飯都好食尐，一粒粒好軟熟又有飯香，但文東記個飯好鬆散，感覺似舊米﹗ 當然，天天要自己搵位，如果夏天的話又可能會好熱，文東記就舒舒服服有人招呼，同埋多少菜，家家有求吧﹗﹗ 3) 蟹 點講好哩，其實我地只食左一間舖，不過去左兩晚，食左兩個唔同既煮法，胡椒蟹同辣椒蟹，所以純粹只可以講我地自己鐘意食邊種煮法多尐﹗ 大叔由出發開始已經表明一定要食蟹，見杜如風介紹左一間比較地道食蟹既餐廳好吸引，地點完全唔熱門。就係唔熱門先好，去旅行一般都想食得地道，假如成舖都係遊客，感覺好似無左個風味。 雖則我成日都話GOOGLE MAP係本世紀最偉大既發明，不過有時都幾低能架，好似我搵巴士站，GOOGLE MAP會教我繞過座大廈行一圈先過到對面馬路，但實際我係可以穿過商場行過去架嘛﹗去永發個情況都係一樣，好搞笑，佢教我出左地鐵圍一圈行返出大路，所以話要成20分鐘（藍色線），但實際係一出EUNOS地鐵站既C出口行出大路轉右行五分鐘（紅色線）就到﹗ 搭地鐵去到EUNOS站，由C出口出，行5分鐘就到永成餐廳架啦Z難 我地連續去左兩晚，老闆娘都認得我地，你話無遊客咩，其實都唔係，不過係外國遊客多，我唔係好覺有香港人，呀.....其實唔止永成，今次好奇怪，我沿途都唔係好見到香港人喎，我仲以為會一街都係添﹗ 講返食，真係人都癲，第一晚我地6點半左右去到，已經FULL HOUSE，好彩剛有人走，唔使等位直入﹗第二晚諗住會去老巴剎再食串燒，所以提早左一個鐘，姐係5點半去到，都係坐滿，真係唔講得笑﹗ 連續兩晚去，老闆娘一眼就認出我地，我地完全無睇過餐牌（唔知有無），第一晚一心諗住食胡椒蟹，都無詳細問，老闆娘一泥就話幫你搵兩隻細既，炒碟菜﹗哈，因為有人好鐘意食，本來仲諗住兩隻唔夠，原來都有斤幾一隻，兩個人（實在得一個半人既食量），已經好夠﹗埋單唔使90波紙（唔計啤酒） 嚴格泥講，又唔講得上係大排檔，似係香港既冬菇亭，後尾發現其實食店唔係叫永成，而係第一海鮮﹗ 平時我地兩個都唔飲酒架，個晚突然身痕 兩個人兩隻蟹一碟菜已經好飽 個蟹真係鮮到不得了，新加坡好似都係用斯里蘭卡蟹，好飽肉好新鮮，雖然胡椒味好重，反而更顯鮮甜。點講先啱哩，係香港，你食惹味餸會想飲凍野，個胡椒蟹越食越辣，係會想飲啖野清下口，食完停口就無野，唔會繼續想搵野飲﹗係香港的話，有時食完重味野，事後係依然覺得好口渴，感覺明顯有差﹗ 其實間舖實在係叫第一海鮮既，根據四周環境推算，永成餐廳係大舖，佢入面係簡開好多個細檔口仔，有唔同招牌，我估入夜後就拎哂全個場食海鮮，純粹個人推測 價錢同第一晚一樣，90波紙有找（連飲品） 掛住食，原來對唔到焦 第二晚既辣椒蟹，多膏到癲左 第二晚再去，本來想叫一隻胡椒蟹一隻辣椒蟹試下，點知老闆娘話每款煮法起碼要兩隻蟹，雖然好好味，但食唔哂囉，只好叫左一份辣椒蟹，又係加碟菜，辣椒蟹有汁，所以老闆娘加左個面包比我地﹗ 第二晚既蟹多膏到癲左，成個蟹蓋蟹身都爆哂膏，見到雖然好開心，其實好滯胃架，我都係鐘意食肉多尐﹗個汁好味到想清乾潔個碟，好彩有面包，要不就哂哂﹗﹗ 兩個煮法，我地傾向胡椒蟹多尐，一來可能肉蟹，無咁滯胃，二來胡椒蟹比較香口惹味，突顯左蟹肉既鮮甜﹗ 永成餐廳，其實你就咁係GOOGLE MAP打個名就已經會搵到，不過我懷疑間舖實在係叫第一海鮮既﹗永成係成間舖既大招牌，入面見到細分左好多檔口仔架，其中一間係第一海鮮，我見佢既單據同濕絲巾都係印第一架（依然個句，如果你唔想比錢用佢既濕紙巾，你可以退返比舖頭架﹗），所以我估佢應該係叫第一海鮮﹗記住佢地星期三例休﹗ 其他無咩特別野食過，都係亞坤、另外MAXWELL既金華魚片湯、牛車水街邊既雪糕三文治，沙嗲一條街既串燒，呀，仲328加東喇沙同椰漿飯，好長，另文再講﹗ 下一篇：迷失獅城 - 飲食篇（下） 延伸閱讀： 迷失獅城 - 住宿篇 迷失獅城 - 交通篇
