入住日期：10/29 -10/31 一直對新加坡興趣都唔算好大，所以咁多年都未有實際行動要去踏足哩個國家﹗今次之所以會考慮，純粹係因為早前去瑞士既機票，屬綑綁式銷售，要加多程新加坡/曼谷/台北或廣州既機票先會有優惠，要不就要依返原價。既然係附帶既，曼谷同台北今年都已經去左，廣州又無興趣，剩返既選擇就只有新加坡。 純粹諗住去下無妨，所以一路都無認真安排行程，問朋友借左幾本旅遊書但一眼都無望。住宿嘛，身邊朋友一係去公幹，一係就一家大細，再唔係就去探親，無酒店介紹，只好盲中中求其上HOTELS.COM搵間就算﹗搵個陣完全唔知附近有咩，只係見就係地鐵上蓋，雖然HKD1300一晚唔算平，不過我見大部份酒店都差唔多係哩個價，又有個景觀唔錯既泳池，反正只住兩晚，係無認真比較其他既情況下就隨手訂左一間﹗ 由瑞士返港唔夠一星期就再飛新加坡，臨急抱佛腳，叫朋友介紹左一堆食店，大概係地圖度BOOKMARK左地址，隨手搵埋係機場點出酒店，一心諗住，係地鐵上蓋，應該好易搵既姐，根據GOOGLE MAP既指示話應該係地鐵站既D出口出，實搵到啦掛﹗平時出門，安排好行程後，都會事先跟GOOGLE MAP個公仔行一次實景點，等自己大概對附近既景物有個概念，到埗時個人無咁迷失。今次諗住新加坡唔大，完全無望過地圖，只係DOWNLOAD左OFFLINE MAP，點知就真係出事啦﹗ 諗住信GOOGLE MAP就實無死啦 雖然有OFFLINE MAP，不過無網絡始終都係無咁準確，兩條友跟指示到站後搵D出口，發現係一條地下通道通往幾個唔同商場，係指示牌見到商場個名，但就完全見唔到我地住個間酒店既名，已經有點猶疑，不過仍然相信GOOGLE MAP唔會錯得去邊，抱住樂觀既心態選擇相信入到商場點都有指示掛，又即管搵下先﹗ 依照GOOGLE MAP既指示係站既D出口出 HOTELS.COM個張HOTEL VOUCHER又無顯示有尐咩特別事項需注意，有時有尐酒店，假如入口比較隱閉，一般都會係HOTEL VOUCHER度列明架，好似哩兩年住左幾次既台北德立莊，又或九月去上瑜伽時住既凡登東棧，佢地都會係HOTEL VOUCHER溫馨提醒客人前台唔係地下，教你點搵﹗ 點知兩個人行來行去都搵唔到指示，就咁係個商場度來來回回搵左十幾二十分鐘，又出街外搵過，始終未有發現，真係有尐燥底。好彩無行履，又係有冷氣既地方，搵過過程唔太辛苦﹗不停互相安慰話，我地無行程，又好肯定就係附近，就當行下街，慢慢再搵下先啦﹗終於發現係唔太顯眼既位置原來係有指示牌叫你去商場既LOBBY A度搭LIFT上10樓架。個一刻既反應係，等我上HOTELS.COM既酒店評價度反映一下先﹗ 初出茅廬個陣，收入唔錯，又叫做身居要職，成日以為自己好叻，都試過迷戀投訴，總覺得所有人都蠢，辦事能力低，動軋就投訴。好彩哩段日子唔算好長，面對培訓下屬既過程開始了解同埋心既重要，慢慢學會了包容同體諒，廿五歲打後就無再進行過任何投訴。每次想發難既時候都會先問左自己，其實自己有無責任哩。。。當按指示搵到電梯上酒店既時候，就開始問自己，其實係自己事先無睇清楚吖，定係人地指示唔夠清楚先，假如係前者，你就無資格去抱怨，就係咁樣，氣。。。又消了。。。哈哈，笨笨的阿豬媽就係咁。 兩隻傻鴨係商場度行左十幾二十分鐘，終於都搵到有關酒店既訊息啦 幾經辛苦先搵到原來要係商場既LOBBY A搭LIFT 即使依指示上到10樓，都仲係要左拐右轉先會去到前台，真係燥底 其實，出開門既朋友都知，想知點去酒店，最可靠既方法當然係去返酒店網站度望一望，酒店官網一定會列明到達方法，成件事問題真係在於自己今次太懶，望都無望過酒店個網頁，先會發生哩件事﹗﹗ 酒店網站其實有清楚既指示，教遊客點樣由機場搭地鐵到酒店，成件事根本就係自己去過人地網站睇，所以唔好賴人 去到酒店先知，原來酒店係香格里拉集團成員，大堂有免費檸檬水同小食，遊客係外邊返泥，可以係大堂飲杯冰凍既飲品抖一抖先返房，都幾貼心﹗一入大堂就可以接到WIFI，唔使密碼，好少酒店咁大方﹗﹗ 房間都算闊絡，雖然唔係靚景，但景觀都開揚 訂酒店個陣真係只知酒店近地鐵，諗住新加坡唔大，完全無諗住酒店位處咩區，哈，誤打誤撞又比我地撞啱喎，HOTEL JEN ORCHARDGATEWAY，故明思意，就係係烏節路（ORCHARD ROAD）一帶，地鐵DHOBY GHAUT，SOMERSET同ORCHARD都屬烏節路地段，附近都係購物中心。我地住既酒店就係SOMERSET站，官網話C係要經商場，實際B出口先最近，係地鐵出口一出地面轉左手邊就係，右手邊就係亞坤（313@SOMERSET商場），朝早落泥食早餐唔使同人迫又唔使排隊。 酒店正門一出轉右手邊就係地鐵站，再行前尐就係亞坤，朝早食早餐超方便 酒店仲可以免費租用單車 酒店其實係鄰接313@SOMERSET商場，亞坤就係商場入面 酒店正門一出係SOMERSET ROAD，穿過商場就係ORCHARD ROAD，兩條路都有巴士站，因為係單程路，所以唔會搞錯方向，好易搵，我地後尾去食328加東喇沙同文東記海南雞都係搭巴士，超方便，哩個遲尐先講﹗ 一出返ORCHARD ROAD就係遊客資訊中心，對面既THE CENTREPOINT商場就有松發肉骨茶（我好白痴唔知道原來可加湯，後來店員過泥幫我地添先知），THE CENTREPOINT商場樓下仲開左間人氣韓國甜品店，唔記得叫咩名，但見排長龍﹗ 烏節路既遊客中心 唔使四圍搵，酒店對面既THE CENTRPOINT就有松發肉骨茶既舖 如果要買手信，什麼林志源，什麼班蘭蛋糕，行前去ION ORCHARD（我諗正常人係會搭地鐵去下一個站ORCHARD而唔係行）就有﹗對我地只係泥食野既3日2夜之旅，實在太方便﹗ 開頭提過，揀哩間酒店既其中一個原因係泳池，雖然得3日2夜，難得可以係室外泳池遊個水哂下太陽，何樂而不為哩﹗﹗酒店既泳池係19樓，同層仲有健身房，每星期四晚有免費瑜伽班，仲有一個小竹林，環境相當唔錯﹗﹗最初GOOGLE MAP話係機場去酒店要成個鐘，我發現其實地鐵大概半個鐘左右就到﹗ 酒店泳池係19樓，唔算好大但都好游，細長既泳池分開兩段，頭段應該唔夠一米，啱小朋友玩水，另一段就大概140左右吧 其實可以望到金沙 原來都好多遊客鐘意入住期間做下瑜伽架 <img class="size-large wp-image-2829006" alt=" 除左健身房，仲有一個小竹林，可以比住客泥坐下休息下，都幾舒服 本來諗住去一次叫做見識過就算，點知去完有人話第時如果就到有平機票，可以再去喎，好過去澳門﹗點解，梗係為左食啦﹗得3日2夜，到底我地食過尐咩足以吸引大叔想再泥，且看下回分解啦﹗﹗ 延伸閱讀： 迷失獅城 - 飲食篇（上） 迷失獅城 - 飲食篇（下） 迷失獅城 - 交通篇
