本來想一日只出一篇，但個腦停唔到。今次鐵腳之旅遇到既變數比較多，感覺幾有趣。我唔鐘意怨命，我總覺得心情取決一切，所以，遇到了變數，就去享受她囉。 或者我地係悲觀主義者，或者你話我地係堅張大師又得，總之每次出門前都會預哂最壞打算，諗好如果突然變掛會點。起碼出事變數時唔會手忙腳亂。有時見到其他遊客，係旅途上會為左好少既事既爭執而嘈交，何苦哩，哂左個旅程嘛！出現突變，大家都難免會有情緒，一人少句幫忙解決件事比起嘈交泥得有具體幫助一尐。 講返變數先，天氣係其中一個不可抗力既因素，好似去到伯恩，今晚泥到蘇黎世都落住雨，又唔算好大，但想要影相，想四圍行下都幾狼狽。我地都依然有出去影相架，不過變左無心機行咁耐囉，轉影黑白，轉影timelapse，都幾得意吖。 係伯恩個日又凍又雨，其實真係唔係好想行架，但唔行又點會遇到市政廳個光影表演，幸與不幸，都係自己揀既 我習慣用行履帶，其實係後尾出門次數增加，覺得加條彩色既行履帶係個篋度會突易認尐，但今次唔知咩解，有一個喼既行履帶去到米蘭間酒店時壞左開唔返，我地兩個都試左好耐，其實都真係有尐忟憎架，無理由無端端唔得，但好彩兩個人好快有共識，整爛佢囉，再買過之嘛。。。好小事既，無謂因為咁而唔開心。 又。。。好似本來諗住去策馬特行五湖，好彩臨出發時諗住搵定班次，先突然知道佢有一段登山纜車唔開，有左心理準備，又加上天氣唔算太好，佢唔開都未見得係一件壞事，如果，佢開，但因為天氣行唔哂，反而會覺得可惜，依家五湖睇左兩個，都夠心滿意足了。哈，而且。。。可能都真係傻人有傻福，我啱啱再睇，我地已經好好彩，起碼我都可以行到兩個，原來10月17號開始，連Zermatt去Sunnegga個段車都停埋，準備去策馬特既朋友注留囉。 策馬特既部份登山纜車會暫停行使，該是作滑雪季節前的準備吧，10月17至11月會去策馬特既朋友可能要重新計劃一下行程了 至於突然又令我講一大堆廢話既原因係今日（10月17，有人提我原來今日係拍拖30周年紀念），我地離開Grindelwald返蘇黎世，如果你就咁查票機，佢會教你行上路，姐係經Bern返 如果你就咁係票機輸入你要由Grindelwald返Zurich,佢會幫你揀哩條路 好彩之出發前有研究過，知道可以經Interlaken過，但票機唔識幫你買票，你要教佢先去Luzern，佢先識顯示，但今朝出門口前發現路線多左少少野，點解突然唔同左既 我想想由下路返Zurich，因為沿途風景較美,可以欣賞Brienzersee既湖景 資料突然顯示，中段要轉一程巴士，點解既哩，明明個段全程都係火車泥 係Grindelwald想睇既野基本都睇哂，舊年又因為航班延誤，Zurich市內既景又基本睇左，唔趕時間走，都係傾向睇湖多尐，都唔理得咁多，到時上到車先算啦 沿途湖景都係用GoPro拍片，所以無得閒用手機影相呀，遲尐先再補返 上到車見到告示，終於都明白，原來由10月17，無錯，姐係今日起，有一段路有工程，火車無法通行，所以要轉巴士 原來有工程，所以去到Giswil個個站要轉巴士，都幾得意吖，無試過係瑞士坐巴士，如果唔係佢有段路唔通，我地都未必有機會搭。最初當然都有點不安，怕唔識搵，但SBB安排得好好，指示好清楚，而且職員亦多返提醒，所以唔會有咩甩漏。 只要跟指示，哈。。又跟人潮走就得架啦，係Giswil個個都要落哂車 工程應該會維持兩個星期，我相信係Luzern去Interlaken,Grindelwald既情況亦同，準備出發既朋友要注意嚕！ 到車站已經有三架旅遊巴等緊，職員好友善咁幫忙，完全令你放心，唔使迫唔使趕，亦唔會無位坐 一落巴士就見到火車等緊你 再上返火車，其實都只差一個站，再坐20分鐘左右就到了 雖然上上落落咁，又落緊雨，個成個過程都幾得意，反正未試過，如果真係要經Luzern去Interlaken或Grindelwald，哩個都算係一個唔錯既經歷吖！ 哈哈，講完，安樂哂，可以訓覺了。其實仲有明信片事件想寫，都係留返聽日先。
