以我一個咁多口水（文字上）既人，去旅行寄明信片是肯定的吧﹗﹗好想同朋友分享旅行中的所見所聞，儘管去台灣去日本都一樣會寄﹗好怕為左買手信而買，但文字就係當時最真切的心情，當然，唔係個個朋友都能領略你哩個想法，有部份朋友還是會以手信的平貴去衡量你對佢既友情有幾深﹗ 離開GRINDELWALD既時候先有時間去揀明信片，無係當地寄，只好係火車上面寫完，到左蘇黎世再寄﹗此舉令我想起去年遊德國的慘痛經歷，可算是人生一大污點﹗﹗ 每次出門我都要寄起碼20張明信片（唔計寄比自己個尐） Edelweiss（雪絨花）係瑞士既國花（我知奧地利都係），所以佢地既郵票會見到，但CHF1.4只係寄歐洲的，寄亞洲的話，舊年CHF1.9，今年CHF2.0 今年寄亞洲既瑞士郵票 話說舊年既德國之旅行程最後一天，我地搭早班火車由慕尼黑轉到瑞士的琉森，明明之前一晚向酒店職員買好郵票(0.9EURO)，準備寄出最後一批明信片，唉，白痴如我，第二朝掛住趕火車，退房時匆匆放低匙咭比大堂職員就走左，將明信片既事忘記得一乾二淨﹗直到火車臨開前一分鐘，團友問起我明信片既事才恍然大悟﹗ 個下真係想跳樓，火車站有郵筒，但火車馬上要開了，明明記起都趕唔切寄﹗跟住9千幾個想法出現，總之就係無法原諒啦﹗有諗過不如拜託車上的票務員幫我寄，但怕被拒；又有諗過成批寄俾在德國讀書既朋友幫我寄，一來無網絡問唔到情況，二來當日周六，郵局唔開﹗最後既解決方案係....係瑞士琉森再買當地郵票（價值1.9CHF - 未免太貴了吧﹗），所以德國之旅最後一批既明信片（共12張），係係瑞士寄出的﹗唉，實在係我人生既旅行蠢事之一﹗﹗明信片大概EURO 1.0一張，德國郵票EURO0.9 再加瑞士郵票CHF1.9，死未﹗﹗ 舊年本來已買好係德國寄既明信片 因為白痴既我唔記得左係離開德國時寄，唯有....係瑞士再買多次郵票係當地寄 不過，若果輪失敗，德國之旅既明信片都未算最差，起碼所有朋友都收到﹗﹗去紐西蘭個次就真係豬到貼地﹗﹗我地第一站到QUEENSTOWN，咁好開心去紀念品店買明信片順便買埋郵票啦（外國買郵票，有尐國家可以係酒店買，有時可以去便利店買，歐洲國家好似一般賣紀念品既舖頭都有得賣，大部份外國買到既郵票都係自動黏貼既添，唔使搵口水。）係紀念品店買既郵票好靚架，仲滿心歡喜。後尾再去ARROW TOWN想買，但紀念品店同我講，郵局係對面，你自己過去買啦﹗﹗好啦，但買到既郵票係好正規樣架。到哩一刻我都未發現有問題，直到掉落郵箱個一下，先至寄怪，點解郵箱有幾個顏色既﹗﹖ 左邊好可愛既DXMAIL既（紐西蘭私營既郵政郵票），右手邊既係國營郵局既郵票 我已經唔記得顏色既分別，但係我係好衝動咁掉哂第一批明信片落去公營郵箱個一刻先發現自己中伏﹗﹗其實DXMAIL（私營郵政）既郵票背後係有寫明提你記住搵返DXMAIL既郵箱投遞架，係自己大意，一心諗住郵票都係一樣啦﹗點會估到一個地方會有兩個郵政既姐﹗﹗ 後尾我問過當地人，DXMAIL雖然郵票較靚，但郵遞時間較長，我地返到香港收到既，係一份加貼左新加坡郵戳既明信片，好似要成個月，我地估計，DXMAIL係坐船去新加坡先再返香港﹗﹗唉，不過時間都唔係一個問題，最慘係兩家郵政係唔係互通架﹗姐係，我第一批明信片，有一部份係入錯郵箱的，永遠都唔會有人處理﹗﹗靠~~~~點解我買郵票既時候無人話我知﹗不過，關人咩事姐，郵票背後有寫，係你自己唔睇清楚，大鄉里亂咁寄之嘛﹗﹗ 舊年（2015）無聊記錄既各國寄香港明信片既郵費 瑞士 (Switzerland) HKD15⋯⋯ 德國 (Germany) HKD7 挪威 (Norway) HKD14 台灣 (Taiwan) HKD2 捷克 (Czech) HKD10 紐西蘭 (New Zealand) HKD10 匈牙利 (Hungary) HKD7 奧地利 (Austria) HKD15 中國 (China) HKD2 日本 (Japan) HKD4.5 各地的郵票，到自己係外地要寄既時候，就發覺香港的郵費原來好抵 今年本來想係玻利維亞寄明信片，但去到郵局先知全市罷工，寄唔成﹗哩尐係秘魯既郵票，上高係係CUSCO買既，郵票加郵費，下面係係利馬買既，就咁注有郵費既貼紙，咩公仔都無﹗﹗呀，不過順帶一提，秘魯既郵局辦公時間都唔可信架，佢都係睇心情開的 呀，仲有兩件得意事，一，唔係個個地方都有郵戳架，有尐地方收左你郵費比左郵票你就當係架啦，好似我地去挪威咁，貼完郵票掉落郵箱，點知收到既明信片係同寄個陣一樣，後尾先知如果你要有郵戳，係要你自己蓋上去架﹗好似仲有尐北歐國家都係咁﹗真係各處鄉村各處例﹗﹗ 另外仲有一個，我自己到今時今日都唔敢試，據聞世界各地都有個約定俗成的習慣，假如你係明信片上寫上STS寫樣，你就可以唔使郵費都寄到﹗STS代表STUDENT TO STUDENT，我有個係外國讀書既朋友話佢一直都係咁寄﹗但我每次買既明信片都好鐘意，好驚寄唔到返香港，所以一直都未試過哩個方法﹗﹗
