（繼續策馬特） 係Gornergrat既3100 Kulmhotel住左一晚，要落返山啦（因為住宿都真係幾貴，包早晚餐，一晚就3百幾瑞郎，肉都赤，生日就豪一次吧﹗） 3100 KulmHotel 其實得兩種房，一邊望Matterhorn，另一邊則望另一個雪山（唔記得叫咩名），一大清早，好多住客都開窗影相 為左影星，成晚無訓，跟住又一早起身出去影相 一落樓就見到哩個顏色，遲尐都無，美呆了！ 遊客泥策馬特，除左滑雪，行山睇湖係另一個主要活動，Matterhorn周圍有好多個湖，而湖都可以影到Matterhron既倒影，所以，既然已經係Gornergrat，梗係順便落Rotenboden影Rifeelsee（係車站落左車，都要行一段斜路落山先睇到架）。搭車時有個小插曲，我地無買通行証（計過唔特別平），所以決定每次買票，咁個朝兩條友通完頂影星，傻下傻下唔記得帶HALF FARE CARD就落左樓，票站叔叔有問，我地好無奈地表示漏左係酒店，唔記得帶，跟住叔叔就照收左我地半價錢啦，真係感激不盡﹗﹗ 等第一班火車落Rotenboden影Riffelsee(早尐個倒影會平靜一尐），假如你無通行証，又發覺無人買票，你可以直接爬入閘，搭左先再補錢，職員叔叔教我的，站前有對講機，你可以先話比山下既職員知 大家去西藏都要睇日照金頂，估唔到係瑞士都可以遇到 一早起身係為左落Rotenboden影Riffelsee既倒影，真係好靚 一早就行到身水身汗，大概玩一個鐘左右就要回程返酒店準備離開了﹗﹗ 食完早餐就要落山啦﹗ 搭返Gornergrat Bahn返落去策馬特，見天色好，死心不息，又再沿班霍夫大街走到尾轉入去Kirchstrass向河邊直走，係橋邊搵位再影Matterhorn，其實第四日到埗時已經有泥過，但之前一日好多雲，完全睇唔到山峰，見到有個外國男仔企係樹等左兩個鐘都要等﹗我地就梗係唔等啦﹗好彩，尋日影唔到，今日可以再試過 哩個位都係一個熱門睇馬達洪峰既位置﹗ 河既另一邊都幾靚架 終於都影到，咁就安心去搵今晚留宿既旅館，旅館正正係車站既另一端，所以又推返個篋返轉頭。 第二晚間酒店其實都幾遠，仲要係山腳，推住個篋上斜都幾係野架﹗但點解揀哩間係因為佢近另一個車站 - Zermatt ZBAG-zsb。我地10點左右落山，未夠1點又再上山啦，不過係另一個方向﹗﹗到訪策馬特既人好多時都會去行五湖，姐係Stellisee, Grindjisee, Gruensee, Moosjisee 同Leisee，行哂應該要預4個半鐘，但未到之前已經知道唔會行得哂﹗原因係如果要行哂五湖，本來既路線係係Zermatt ZBAG-zsb搭登山纜車去到Sunnegga，然後再係Sunnegga轉多程去Blauherd作為起點，行哂五個湖剛好返到Sunnegga，咁先係4個半鐘。出發前本來諗住搵定班次時間，點知發現Sunnegga到Blauherd個段車會維修，至11月先開返，怕唔夠時間，以只好作出取捨，既然只可搭到去Sunnegga，咁就行最近佢個兩個湖就算﹗﹗ 由Ｗelschen Hotel 一落樓梯就係去Sunnegga既車站 由Zermatt去Sunnegga既登山纜車，唔使5分鐘就到，來回CHF24，我地有半價 去Blauherd既車暫停，要11月26號先開返 瑞士既行山徑指示好清楚，唔使蕩失路，我地出左車站，先向Leisee出發 Leisee離車站唔算遠，好快趣就到 湖周圍有好多人係樹哂太陽，仲有小朋友係度玩橫水渡 馬達洪峰實在太實出，好似行去邊都可以見到佢咁 再依指示牌去搵Moosjisee 其實部份山路都幾辛苦，又窄，對於一個畏高既人都係一個大挑戰，唔敢四圍望，路基本只可一個人通過，好怕跌落山﹗﹗ 終於泥到Moosjisee，睇個哩個景，頭先行得再辛苦都值啦 馬達洪峰周邊既湖都可以影到佢既倒影，所以點解咁多人要泥行五湖 唔覺唔覺都行左3個鐘，回程去到Leisee如果唔想行返斜路上Sunnegga，可以搭Wolli Park Leisee既吊車（其實似升降機）返車站，再搭返落Zermatt 返到落山差不多五點，要搵野食醫肚，哈哈，有朋友問我，點解我既行程完全無食野既部份既，係呀，我唔食野架，朝早食完早餐我就可以完全唔使食野﹗不過之前一日發現左一間幾好食既燒雞店，所以今日再去幫襯，位置係班霍夫大街街尾，係教堂對面就會見到，CHF16一隻燒雞，如果係店裡食會有一塊面包，因為好多肉汁，面包係需要的，你亦可TAKE AWAY﹗老闆娘比較COOL，入舖頭後唔好咁快開聲催佢，等佢返左櫃台佢自然會問你要咩，坐落佢就會同你傾計﹗ 班霍夫大街尾，教堂對面的WILDE HILDE烤雞店 除左烤雞，佢仲有潛水艇賣 味道一流，所以我地食左兩次 班霍夫大街唔長，策馬特教堂都算係必經之路 留宿策馬特第二晚的Welschen Hotel露台的景觀，本來一流，可惜附近有工程，多左個天秤 食完野係酒店休息左一陣，明明已經倦到想死，但貪心既香港人都係不安本份，係都要拎相機出去行多轉 策馬特的夜景 要準備出發到蘇黎世既首都伯恩啦，影夠就好返酒店休息啦﹗﹗ 上一篇：鐵腳之旅 - 第四天 下一篇：鐵腳之旅 - 第六天
