鐵腳之旅泥到第6日，個人開始倦，個腦依然不停好多文字閃過，可惜身體唔聽使，無足夠既氣力整理，所以寫下其他先。 香港去歐洲，最少都逗留10日8日，行履篋入面既污糟衫都幾令人苦惱，成日都覺得焗咁多日，會令污糟衫更加污糟，更多細菌。去到每個住宿既地方，我最開心就係見到浴室入面發熱既毛巾架，內衣褲同埋襪放係上面，一晚就乾，減輕左歐遊時污糟衫既量，不過我唔敢講所有歐洲國家都有，我自己所到之處（挪威、捷克、奧地利、匈牙利、德國、意大利同瑞士）都有見到。當然，如果太厚既衫，而你又只留一晚就唔好諗啦，要不乾唔切唔好賴我。同埋，佢地未必成日用，用之前當然係自己搵野抹一抹佢好尐啦！ 歐洲好普遍既暖管 另外，除左香港濕度輕高之外，好似出親門都會好乾燥，又無湯水飲，個人總係覺得好乾，喉嚨好唔舒服，所以盡量都會搵尐甜野食下飲下咁，哩個當然係個人體質問題啦，以前會帶京都念慈庵既枇杷膏，但發覺效果都係唔夠，所以依家附左Vit C,我仲會帶埋積熱清，每日飲一杯，感覺對腸胃都好尐。 最初以為外國好多蔬菜食，但原來又未必，出門咁多日，為左自己腸胃，都係帶定清熱飲品好尐 天氣乾燥，加上水質不同，習慣去東南亞玩既朋友，最好都係帶備自己用開既洗頭水護髮素，特別係一頭秀髮既女士們。一向自命瀟灑既我，平時出門帶少一樣得一樣，但去歐洲都要跪低帶潤膚乳，要不實爆擦死。仲有，縱然酒店有護髮素， 但牙膏牙刷一定無，所以唔該記住帶。有朋友話我，平時都帶加啦，用慣左自己個尐，哩尐野咁個人，我哩。。。就覺得，用少幾日唔係自己用開既幾日，你棚牙唔會咁快黑，頭髮又唔會咁快甩既姐，所以如果去東南亞，我真係唔想帶。 未必所有歐洲住宿都有護髮素同潤膚乳提供，最好都係自己帶 呀，廁紙，好怪，完全無諗過去旅行要帶廁紙，真係癲癲地，但試過去挪威/捷克小鎮，佢地都仲係用緊草紙架原來，質地好粗糙，如果你有幼嫩既肌膚，出遊前試下了解下，又或。。帶多幾包紙巾囉。下圖係一個好有趣既設計，如果唔係睇旅遊節目介紹過，我估我r爆頭都唔會知佢係咩。座廁隔離，無廁板個個原來係一個洗屁股器，好似話以前既人未必日日沖涼，所以就會洗屁股以保個人衛生，好老實，我理解唔到，又。。。我只係意大利見過，其他地方又無喎。最妙既係，如果係古舊建築物有佢我理解，我係米蘭住個間型格酒店係新起架嘛，佢都有喎，係對姐係話，依家都仲有人用哩?好有趣。。。 如果有睇過ViuTV既歐遊全世界該會知這是什麼吧 歐洲人都飲自來水，佢地又好似唔係好使飲熱飲既咁，所以住宿未必有熱水煲，我知可以問前台借架，但去西藏時添左一個，所以依家一般出門都會帶埋佢，不假外求，嘻，其實係費事問人。 好少旅館會有熱水煲 另外，歐遊搭火車是常識吧，上到火車都有票務員查票，我成日都好佩服佢地既記憶力，火車咁多卡，每個站咁多人上落，乘客又會四圍走，但我從來都無經歷過佢重覆查票架，每個站上上落落，佢地好似都有能力辨認出邊個查左票邊個未查，好神奇。 今次由意大利坐火車入瑞士，因為經歷兩個國境，所以係有查兩次票既，所以車票最好都係身上好尐，我知有人會好好手尾查完就放入袋，唔想四圍搵，最好都係放係就手既地方。今次一入瑞士，仲有軍警上車查証件添，好認真架，只要洗手間有人，佢點都要捉你出泥查左先比你再去，哈哈，如果辦緊大事就尷尬了。 瑞士對入境火車的管制比較嚴謹，大概怕難民湧入，其實，佢地個生日水平咁鬼高，走難都唔揀瑞士啦 講起搭火車，除左之前提過既自由席同指定席問題，最初係歐洲搭火車最令我迷惑既係點分車廂既級別，一般遊客既價惠票都只可以坐二等車廂，但到底點先知自己有無坐啱車廂哩?有時有尐車就上下兩層都係同一個級別，但又有尐係上層就頭等，下層係二等，有部份就以車卡計，最初唔識分時真係好困惑，有時什至有部份車廂會好似日本既火車一樣，去到中途站會甩開去第二個目的地，如果無為意上錯就真係喊都似，後來先知原來人地係月台顯示屏會寫明車廂既分配，只要淡定留意一下月台上既告示板或顯示屏就會有答案。 上車前記住望真車廂級別至好上，免生誤會 歐洲火車一般都係自由席，如果想肯定有位座最好預先訂位，但就會貴尐。假如座位已被劃配為指定席，座位上方會有客人的目的地什至姓名，假如你無訂位就唔好坐左人地個位啦，無顯示既就可以坐 突然醒起，如果你住小旅館，記住望清楚旅館有無指示話幾點後無人。有些小鎮既住宿唔係哂店，前台唔會24小時有人，如果你遲過晚上7點或8點後到，好可能係搵唔到人serve你的，哩個亦係我堅持要買有電話服務既電話咭既原因，假如知道會夜，最好打去旅館講聲，問定到時點搵鎖匙上房。 以去年去德國既國王湖為例，我就遇到一家由泰國泥既人，佢地晚上10點先到旅館，旅館唔係民宿，可以搵到屋主出泥問，佢地真係放左工就放左工，一班人係門口好傍惶，又凍又黑，我食完晚飯返去見到，好彩既係，我本來都預計會遲，所以問左旅館，知道佢地會將你既住房資料貼係門口然後按密碼去開key safe取房間鎖匙，如果唔係預先知，我都唔知點幫佢地，亦因為咁，同佢地做左朋友。 小旅館未必有24小時的前台服務 每個地方文化習慣都不一樣，帶著學習見識的心情出門會較開心，好似。。。挪威同紐西蘭既住宿要你自己舖床單同入枕頭袋，我個同行朋友面有難色。 人生，本就是一場學習。
