（米蘭到策馬特） 米蘭只係過境性質，只係望一望個教堂就算，無係市內四圍遊走。行程泥到第四日，個人開始有點倦意，又有點熱氣。我出親門（莫論遠近）都好易會喉龍唔舒服，出現內熱既情況。可能都係舟車勞累，身體適應唔切。為左唔想旅行途中唔舒服，近年出門都會好婆仔咁帶埋積熱清既沖劑（所以點解一定要帶熱水煲），又可以有點暖飲，檸檬味既飲品可舒緩喉龍同身體既不舒服感，都幾好。 最初以為外國好多蔬菜食，但原來又未必，出門咁多日，為左自己腸胃，都係帶定清熱飲品好尐 米蘭酒店都係包早、晚餐，但同頭兩日既就差遠了，唯有安慰自己，大城市嘛，都係但求方便同價錢合理啦，食得飽就得啦﹗﹗ 酒店既賣店係近火車站，所以不能對食物有太高要高 出發前已係網上預訂去Brig既車票。 由米蘭到Brig既車票係出發前預先係網上買既，為指定席 出發時在米蘭車站遇見去旅行的小朋友 其實去BRIG或ZERMATT既車票係米蘭車站買都得，售票機指示都好清楚，但為左方便預計行程，出發前睇啱左時間就費事煩，直接係網上預訂就算 去Brig既車其實係以日內瓦為終點站，不過唔使怕，月台指示都好清楚，你搵啱自己要搭既班次編號就會知去邊個月台小插曲，我就係係度遇到個好心人忽然走出泥話幫我推行履，又帶我去月台（當時我得一個人），我即時say no，後尾見到有其他遊客被屈了 網上預定既係指定席，座位上方會顯示目的地資料，以茲識別 一如所料，一開車就落雨啦 要去Zermatt，Brig算係一個主要既交匯點，本來可以直接買到策馬特既車票，但咁買就享用唔到遊客既優惠﹗到訪瑞士既遊客係可以買一種半價票（HALF FARE CARD），有效期一個月，CHF120一位。一般人會較熟悉SWISS TRAVEL PASS，分3日、4日、8日同15日票，我地唔係全程都會用得著SWISS PASS，佢3日票已經要CHF336，假如15天就CHF704，貴過我張機票，對我哩尐只係偶爾要搭車既人，HALF FARE CARD較為划算﹗ 香港可以直接買到HALF FARE CARD，但人地都要賺錢架，所以點都會比當地買貴少少咁﹗ 由米蘭到Brig，大概2個鐘車程 Brig係去策馬特主要既轉車站，離開月台落地面搵SBB既office 買遊客用既半價咭 可能較多遊客，車站職員相對友善，英文也比較好 有左半票咭，基本接下來的車票都可以有半價優惠，為期一個月 知道Gornergrat落緊雪，咁早過去都無用，所以傻下傻下咁推主個篋係Brig行左一陣，一個好寧靜既小鎮，人就係咁衰，鐘意樸素文風，但又唔肯學人地既語言，頭兩日係Val di Funes,一路都覺得自己係外星人，只能作簡單的溝通，如果有人識西班牙文或英文，簡正係中左六合彩一樣，所以返到米蘭好開心可以用英文溝通，泥到Brig哩個小鎮，又變返外星人了。唔講野，就享受下四周古舊既建築物。 係Brig買完Half Fare Card同去Zermatt既車票（無指定班次），本來可以趕及10點40個班車（係VISP轉車），但知Gornergrat落緊雪，我地咁早過到去都無野做，於是決定係Brig四圍行下，下一班車係1122,仲有大把時間 一路都只諗住係Brig轉車，根本無諗過會係樹逗留，原來都幾靚幾舒服 好寧靜的小鎮 正式向策馬特出發了 全景觀既車廂，沿途都可以欣賞風景 好快咁個半鐘又過去，終於到策馬特了，天氣都幾好吖，有陽光 上山既纜車要係另一個車站，不過就係火車站對面 車站入面能睇到山頂狀況，落雪咩都睇唔到，咁早上去無用喎 雖則話班霍夫大街唔長，但推住兩個篋始終唔方便，火車站既地下室有儲物櫃，要放得落2個篋就要租個大既，多謝10CHF 你只要搵個無人用既，放野入去，關上，付款就可以了，連儲物箱編號都唔使記 真係比完錢就咩都唔使記架，因為佢會跌個牌仔比你，你泥拎既時候入返個個牌落架機度，相對既儲物查就會自動打開架啦 約一點鐘開始行，四圍影下相，又去超市玩下，行到4點左右就出發上山，記住出示半價咭，不過票站職員一定會問﹗單程CHF45，但我地有半價 睇返，其實佢仲有一隻優惠票叫Good Afternoon Ticket，但一定只能下午3點半後適用，又一定要係當天落山，其實都低用呀，56CHF 同車有個哥哥諗住上山踩返落泥，落雪喎，型呀 纜車由Zermatt上到Gornergrat全程約半個鐘，假如你想望下小鎮既面貌，就記住盡量坐右邊啦 上Gornergrat主要目的，係因為今晚會係哩度留宿 網上好多人話，住哩度會有高反（海拔3100），又貴唔抵住，唔，的確幾貴架，三百幾CHF一晚，但假如你鐘意影星，哩度真係一流架高反，我又無野喎 我好意外，酒店知我生日，除左房間有小禮物，餐廳（佢一樣都係包早晚餐）仲好有心思咁，專登留左張檯寫住我個名，仲有花添，忽然有上賓式既招待，好開心哩 上到山，天氣依然唔好，一路都落雪，但天氣預報話半夜2點後會好天，於是一路係度等唔敢訓，成晚無訓就係為左哩張相 多謝哂3100 Kulmhotel既安排，過左個很不一樣生日 上一篇：鐵腳之旅 - 第三天 下一篇：鐵腳之旅 - 第五天
