出發前同朋友們提起將要到台北參加一連8天的瑜伽課,個個都問,點解要報咁遠學?香港無咩?好勁架?學瑜伽唔係要去印度既咩。。。諸如此類。。。 老實講,其實我都唔知有幾勁架,只知哩個講師都出名,同埋台灣,自己一個都去到嘛,又即管試下。比個機會自己學習獨處,又認真去考慮一下,到底係咪應該踏上導師蓆上。 一班有60幾人,據觀察,大部份都已經係瑜伽老師 上左兩日,肌肉開始有點投訴,最初仲驚會做尐高難度動作,好彩,全部都係能掌控既。人生第一次自己出門,然後第一次上瑜伽工作坊,大概預知班上會有瑜伽老師,但無諗到為數咁多。一班60幾人,但我估著左一半到導師級 。有時有尐理論,特別係講脈輪,講呼吸,唔好話英文,即使廣東話我都未必聽得明。。。何況仲係英文,所以有時都似懂非懂,有時做動作都會慢半拍。。。真係失禮人。但班導師級既同學就問好多好深既問題,完全覺得自己井底蛙,咩都唔識就走去學人上工作坊。。。。 再加上我有個古怪的缺陷,就係睇唔到就聽唔到,意思係,假如我無載眼鏡,即使對方講廣東話我都會聽唔到,聽唔明。有時導師叫閉上眼睛然後按指示做,我就企左係樹,因為我聽唔明亦聽唔到,唯有有時靜雞雞咁偷望到底老師叫做咩。。。 好彩,老師好有經歷亦很有智慧,雖然暫時只上左兩日,但已經獲益良多,佢真係認真地從解剖學既層面去解釋返每個部位,點解有時有尐動作做極都做唔好。以前遇過既瑜伽老師,都只會話你知,你做唔到呀,因為你唔夠練習囉,因為你唔夠認真囉,但原來只要做好少。既糾正,即使你係石頭人都有可能變得能屈能伸,問題只在於你有無用啱肌肉,同埋有無放鬆一個你完全唔記得關事既關節,只要你識哩尐小技巧,根本就無難度。 今次除左學左新概念之外,亦發現,原來好多瑜伽導師,可能佢地都做到好多高難度動作,但基本既動作反而未必做得好,亦未必了解。。。 我意思唔係佢地唔叻,只係原來我一路以泥對老師既定位同概念都太高了,其實教學都只係一種分享,你想去分享你既學習比你既學生知,但從來無人講過老師就都得樣樣皆精,樣樣皆能。