今日天氣好好，有啲微風又出太陽，所以就同老公去左大埔行下，仲揀左間小店食午餐-溏串小町。店舖位於大埔同太和之間，搭火車到太和站，穿過太和村大約十五分鐘路程就可以去到。日式咖哩吉列豬扒飯$48 坐低落左單之後，待應會每人送上一碗豆腐海帶味噌湯同一杯茶。以為$48既吉列豬扒唔會有特別期望，點知佢一上枱黎到個吉列豬扒係熱辣辣既所以應該係即炸既，個吉列皮唔會好厚，入面塊豬扒雖然有啲薄，但係一啲都唔鞋又唔會痴牙，仲幾好味添。個日式咖喱比想像中辣，因為一般日式咖喱俾我既感覺都係偏甜，佢係有少少辣既。配菜有一碟汁煮白蘿蔔，正正常常冇咩特別。滑蛋吉列豬扒飯 $58 老公叫左個滑蛋吉列豬扒飯，每次食日式午餐，如果有呢個揀，我老公都好難抗拒。吉列豬扒就同我個個一樣，就唔再重複喇，個滑蛋汁既蛋有濃濃既蛋味呈半熟狀態，加上甜甜地既醬汁，配上一口飯，真係美妙的融合。舒適既天氣加一個簡簡單單既午餐，同老公拍下拖周圍行下，過左一個愉快的假日 :)
