又係時侯分享返上箍前後既小日記 今篇真係有小小多字( ・ิω・ิ) 2016.07.12 聽日上箍喇 剝完牙之後都無啖好食過 因為我本身好易生飛滋 上次剝右邊時 其中一個打針位生左幾粒飛滋 食野好痛 但又無得唔用果邊咬 然後脷底條根又生左粒 左邊嘴唇又生左兩粒大飛滋 總之就未箍牙就已經好痛 依幾日都用鹽水漱 但對我黎講好似都無乜用 唯有等佢自己慢慢好 依幾日都係食薯蓉做晚飯 零食都無點食過 我諗箍牙應該真係會痛到瘦 2016.07.13 今日終於終於上箍喇!!!!! 一去到姑娘首先教我之後要點清潔同講解舊蠟要點用 聽到已經覺得好攰 我黎緊兩年都要做咁多步驟去清潔 首先每次食完野要刷牙唔得閒就要用牙縫刷清潔粒粒之間既位置 然後夜晚刷完牙 就要逐個拿去清潔 再用牙線 臨訓就要用氟素漱口水 因為驚蛀牙或者有牙周病 如果清潔得唔好到時箍完 牙面就會白色一撻撻 所以幾懶都要做足 : ( 入到去 醫生就問我剝完牙辛唔辛苦呀之類 我就話生左好多飛滋唔係幾食到野 然後醫生就開始檢查我傷口同d飛滋 再問我: 我見妳都生左好大粒飛滋 驚唔驚會好辛苦?駛唔駛今日上左上面箍先 等休息好再上下面箍? 我就諗住橫店都痛開不如一次過痛 所以就堅決話唔駛 一次過都ok 然後醫生笑笑就話: 咁我地黎架喇 我地會盡量溫柔啲架喇 跟住醫生就用d粉幫我磨左牙既表面 然後就開始落釘 過程中一d感覺都無 係會有d酸味 到落wire果下就感覺到緊左 但都唔會痛 整左大約30分鐘就完成 整完之後成口都係野好唔慣 怪怪地咁 又驚d釘會hi到粒飛滋 係咁就住講野 突然好似痴脷根咁 同埋醫生用左d藍色物料浪起左我兩邊大牙 所以合唔埋口好唔慣 落完箍就去食野喇 今朝為左唔好成口食物殘楂 我竟然無食定野先去上箍真係好後悔! : ( 原本嗌左火腿炒蛋 五香肉丁通粉同奶醬多 但我最後只係食到炒蛋 因為大牙咬唔埋 所以咬唔到食物 最後妹下妹下 妹到好攰已經唔想食 返到屋企 媽咪整左蕃薯蓉比我 終於有小小飽肚感覺(๑´ڡ`๑) 夜晚都係食粥 再煎左隻蛋食 但都係要用梅既方法壓爛再吞 其實都幾攰 所以食到一半就放棄左 但上箍除左食唔到野之外 暫時都無想像中咁辛苦 唔掂到d牙基本上係無感覺 可能間唔中會有一兩下覺得酸酸軟軟 但就唔會痛 或者係d牙未開始郁所以先無感覺 跟住到夜晚刷牙時 嘩..一刷落去果下軟到震一震 好痺又好軟咁 但都要忍住慢慢細細力刷 突然好驚聽朝既來臨