依篇就分享下我剝牙既過程啦 其實我本身都係牙科診所返工 本來以為日日都見好多人剝牙會唔驚 但原來到自己剝牙會係咁緊張架!! 以下就係我剝完牙 即日用電話記低既過程同感受♥ 2016.07.02 今日終於要剝右邉上下兩隻小臼齒喇 食完飯返到去醫生就幫我打麻醉針 上面同下面打第一針時我已經開始痺哂 所以之後果幾針都無感覺 打完針半邊面好似腫腫脹脹咁 漱口都控制唔到 係側邊咀角噴出黎 抹嘴又感覺唔到 唔知自己抹唔抹得到都幾好笑 漱完口醫生就開始幫我剝牙喇 完全唔痛但會感覺到醫生用力 剝完無幾耐 就食定粒止痛藥 今晚食飯都就住就住 好驚趺左d飯落去 但到依家都冇痛 2016.07.09 今日剝埋另一邊喇 上次剝完之後果幾日都有小小淵淵痺痺 但未到痛 係之後一日食左次止痛藥就無事 不過會成日擔心d食物跌哂落個窿到 所以我都用哂另一邊食 今日剝埋左邊 唔知到時點食野 又係食完飯之後醫生就幫我打針 今次有小小感覺 但又係好快就痺哂 同上次一樣剝完就食止痛藥 原本要咬實紗布半個鐘止血 但我咬左十分鐘就冇咬 見今日早左放工 返到屋企諗住訓陣 點知訓到中途比d口水整醒左 一望勁大pat血流哂出黎 被又有 衫又有 件衫直頭大半件衫都係血 嚇死我 最後懶得洗就成件衫掉左 被就爸爸幫我洗 但就一直止唔到血 紗布又用哂 都係自己衰 冇等止好血先掉紗布又一時唔記得漱左口 好後悔:( 之後keep住含冰粒又食雪糕又飲冰水 都唔得 最後含完粒冰再忍痛大大力咬實張捲左既紙巾十五分鐘 夜晚11點終於止到血 傍偟左一晚係咁諗要唔要去急症室lol ♫ 小姑娘既溫韾小提示 ♫ 剝完牙當日切記唔好漱口同刷牙 因為漱口動作會影響血塊凝固 容易再引致流血 萬一再流血 就用紗布用力咬實多半個鐘 做少其中一樣 就會好似我咁架喇 所以都係要聽話:p ✿剝牙其實唔會好痛或者好恐怖 記得要趁麻醉藥未過食定藥 而剝完牙之後幾日 都唔會話痛 但始終有個傷口 可能會有小小淵淵痺痺 我自己都怕痛 但剝牙打左針又有止痛藥食 所以都唔會話好辛苦 如果黎緊要剝牙既你就可以放心喇 下篇就會分享上箍喇!!✿
