箍牙之前已經聽唔少人講 箍牙會痛到食唔到野 一日三餐只可以食粥 但我自己就唔太中意食粥 因為細個太多病痛 令我覺得粥係病到好嚴重先會食既 不過岩岩上箍同每次較完箍果個星期 啲牙都會好痺痛 用唔到力咁 真係有好多野都咬唔到 所以今次就想分享下自己係依啲時候會食啲咩 早餐: ❀紙包蛋糕 ❀炒滑蛋 箍牙後發現原來食麵包同三文治係件好困難既事黎 因為門牙用唔到力 就算搣到細細舊都咬唔到:( 所以依兩樣暫時係我最愛 好食又唔駛咬 午餐: ❀KFC食薯蓉 ❀即沖薯蓉 因為返工出去食 好難搵到自己食到既野 特別頭兩日想夾硬咬都唔得 所以我會搵啲有薯蓉既餐廳 而我就會去KFC 有時就會買即沖薯蓉返公司食 方便又好味 係超級市場買 大約$20一包 有四隻味 同埋一包份量好多 所以我會分兩日食 晚餐: ❀蕃薯 我自己本身好中意食蕃薯 箍牙後終於有籍口可以當晚飯食喇哈哈 試過幾款蕃薯後 發現日本小蕃薯比較適合箍緊牙食 因為比較”林”同埋冇咁多根 容易啲”妹” 我通常烚30至45分鐘 脫皮後再用壓薯蓉器整成蕃薯蓉 聽講好多明星用蕃薯減肥法架 唔知我咁樣食會唔會有意外收獲呢 ❀蒸豆腐 / 蒸水蛋 如果蒸豆腐 我通常買百福果隻蒸煮滑豆腐 因為比街市買果啲更加易”妹” 依兩款食物都方便易煮 落小小豉油好食又飽肚 ❀冬瓜 , 紅蘿蔔 如果屋企有煲湯 可以試下紅蘿蔔粟米冬瓜豬骨湯 味道清甜 而且紅蘿蔔同冬瓜都食到 我自己會將紅蘿蔔壓到變蓉先食 甜甜地冇咁悶 以上都係我每次較完箍至少會食一個星期既食物 有時食得多都會口淡淡 所以間唔中都會放縱下 例如可以食下西米露,芝士蛋糕,乳酪等 要注意箍牙後 其實都有啲食物最好唔好食 1. 咖喱 , 星洲炒米 - 好易染到啲牙變黃 箍緊可能唔會點覺得既 但如果一拆釘之後 發現痴粒粒果個位係白色 其他位都變左黃色就.......... 2.糯米糍, 香口膠 , 有糖既橡皮糖 容易會黏住牙既食物最好都唔好食 因為好難清潔 容易蛀牙 3.硬既食物 就算已經過左痺痛期 都唔好食咁硬既食物 例如蟹,堅果,瓜子 (真係有箍緊牙既人照食) 一黎容易整崩牙 二黎容易整甩粒釘 所以可免則免 如果有骨既食物 亦都要留意會唔會有碎骨係入面 雞翼,雞扒,豬扒等就最好去骨同埋剪細一粒粒先食 箍牙後 習慣左每日都會帶定把較剪 方便剪細啲食物 好似小朋友同老人家咁 有人話箍牙可以減肥 但其實除左較完箍果幾日 我都係正常飲食 有時仲會好似放監咁比以前更放縱哈哈 不過我箍牙後有樣飲食習慣改變左 就係食少左好多零食同飲少左好多甜野 依個改變都幾好 對身體健康啲又可以減肥 每次覆診 姑娘都會提我唔好飲汽水 因為汽水係最壞牙既 箍牙後 口腔清潔會難左好多 一偷懶小小就會好易蛀牙 如果係釘邊蛀牙就更加麻煩 所以我為左減少蛀牙風險 除左食少左好多甜野之外 刷牙亦都比以前更比心機 ✿箍牙既時候 口腔清潔要比以前做得更加足!! 所以下一篇我會分享下箍牙後既清潔程序同用品✿
