第一篇關於箍牙既小分享 想首先分享下自己對付痱滋既產品同小心得✿ 其實無論有冇箍牙 相信唔少人都受過痱滋既攻擊 我自己未箍牙前 已經好易生痱滋 而箍牙後既依幾個月 情況更加嚴重 所以累積左幾個小方法 希望幫到大家♥ 方法(一) : 用漱口水 Corsodyl 痛既程度:♛♛ 舒緩通楚程度:♛♛ 加速癒合程度: ♛♛♛♛ 依隻漱口水專門治療牙肉發炎、口腔潰瘍既 牙科手術後好多都係用佢黎防止傷口發炎 殺菌效果好好 我上次口入面生左3,4粒痱滋 用佢漱左大約2日 其中2粒大痱滋已經開始好返同冇咁痛 最近幾次都係漱左兩三晚就已經開始癒合 唔駛再漱 但依隻漱口水有小小副作用 有部分人用完牙齒可能會起漬 所以我自己只會夜晚漱一次同埋唔會連續用超過五日 雖然依隻殺菌好 但絕對唔建議因為預防痱滋或者牙周病而長期使用 如果真係想試但又驚有漬,可以用纱布浸小小漱口水 敷係痱滋上面大約一分鐘 最近上網見到原來依隻出左痱滋噴霧 不過去左幾間藥房都搵唔到 遲D試完可以再分享;) 方法(二): 日本大正製藥痱滋貼 痛既程度:♛ 舒緩通楚程度:♛♛♛♛ 加速癒合程度: ♛♛♛♛♛ 我近期最愛 簡直係我既痱滋恩物❤ 係朋友係日本買既 上星期嘴角生左粒大痱滋 講野同埋笑都超痛 我只係貼左兩次 粒痱滋已經唔痛 但因為日本先有得買 所以我每次都係忍到冇得再忍先用 而最好既係 除左貼上去果下會痛之外 其餘時間都冇感覺 如果去開日本 記得要買定一盒看門口❤ 方法(三): 艾福達治痱滋貼 痛既程度:♛ 舒緩通楚程度:♛♛♛ 加速癒合程度: ♛♛♛♛ 依隻我係普通藥房買既 大約四十幾蚊 同大正果隻比係無咁勁 而且比較厚 上次用完有小小橙色啫喱狀既野痴左係D釘到 不過整體效果都算OK 用左大約兩日 痱滋已經有好轉 同埋對箍緊牙黎講 有野隔住粒痱滋 唔比D釘整到 已經好幸福 方法(四): Kamistad-Gel N 痛既程度:♛♛ 舒緩通楚程度:♛♛♛♛♛ 加速癒合程度: ♛ 上次生左3,4粒痱滋同埋太大粒既關係 牙醫開左依隻藥膏比我 依隻藥膏入面有麻醉藥成份 所以有藥物規管 要醫生處方先得 搽完會有小小麻痺感覺 可以舒服一陣 但一日只可以搽兩次 每次藥力只係維持到一陣 所以我通常係啲痱滋痛到我訓唔到時或者痛到食唔到野既時候先用 因為我覺得始終有麻醉藥成份 所以如果唔係忍無可忍都唔會太依賴依隻藥膏 方法(五) : 保治靈痱滋膏 痛既程度:♛♛♛♛♛ 舒緩通楚程度:♛♛ 加速癒合程度: ♛♛ 透明啫喱狀 有小小薄荷味 搽落去果下係會勁痛勁拿 其實依隻藥膏對我冇乜效 但我見證住屋企人用完依隻之後好快好返 上次同呀哥差唔多同一日生痱滋 明明同佢一齊早晚搽 佢第三日就好返晒 但我果粒就愈生愈大 最後兩個星期先好返 可能因為每個人口腔入面既細菌都唔同 所以效果先咁唔一樣 不過網上都見好多人都話依隻藥膏好 所以都分享埋 可以一試 方法(六) : 食維他命B雜 之前未箍牙 成日都突然生痱滋 醫生就建議我試下食維他命B雜 食果排痱滋真係生少左好多 但依家箍牙成日比啲釘整損 所以好似已經冇乜用 不過如果冇箍牙但又易生痱滋 我就建議可以試下 *生痱滋時 記住要更加注意口腔既清潔 唔好因為怕痛而唔刷牙或者求其刷啊 同埋有時抵抗力差或者熱氣都會令痱滋有機可乘 所以生痱滋果排亦都要多加注意自己身體健康:) ✿以上都係我個人經驗 如果嚴重既最好都係問返專業人士✿
