話說 7 美絕對係資深滑雪初學者，都初學左有十幾年，而家都初學緊，呢期主力初學 back country 同跳台。就等 7 美黎同大家分享下自己0既小小心得啦！ 但講真，7 美都有小小自知之明，知道一定有好多人專對過我，所以純粹分享下自己知識，所以叫"不專欄". 然後點解叫 7 美？對手咁 7 ，我又忍唔住度氣回佢，只有自己都 7 埋一份。 初學快上手小要訣 如果你係初學 Ski 又想學得快D上手，建議你去之前可以多 D強化大腿肌肉，踩單車、拉筋或者去溜下冰、踩下 Roller 都係唔錯選擇。 如果你想初學 Ski 就拉爆膝頭 （ACL、半用板之類），建議你之前乜運動都唔好做，D肌肉無力，然後玩到勁疲累都要頂硬上，咁樣你應該會快好多攪掂個膝頭，以後乜野都唔使玩。因為你大腿唔夠力剎停時所有壓力都會去晒你膝頭度，玩多幾玩你呢世都唔使玩了。 然後滑雪中途建議袋定朱古力或者可樂係身，雖然呢個世界仲有樣野叫紅牛，但唔夠體力時可以補下血糖補下熱量加下油，但肌肉補唔補到就另作別論呀。 正如本身 7 美同朋友玩前雪場旁邊D side country （入門版 back country), 例如二世古山頂時會帶啤酒。視乎個人喜好。 購買滑雪裝備方面 至於購買滑雪裝備方面，初學者... 其實... 點解唔租呢？你未知自己喜唔喜歡，不如租吧，起碼唔喜歡唔使處置佢地。通常初學一日、頂晒龍二日後就知道自己喜歡唔喜歡，到時才買吧？ 然後到了喜歡又無乜 budget既朋友，時間夠多的話 （通常無錢就用時間搭救）不如去睇睇各大二手群組？有時有好多又正又平既野... 不過建議如果你你係買得自己裝備不如做下功課？滑雪衫點解要咁多 Function 係因為有咁既需要。例如雪衫要防水得黎又透氣係因為： 除左要防外面的冰雪風雨（水份）之外，你身體0既水份都會令到件衫濕，件衫濕左貼住身，D水份會令到你個身散熱散得好快。係雪山散熱快會出事架！ 巿場上當然會有 over price 既野，但有時人地收得貴，係真係因為有 function 呀... 一對好既 ski 襪係要幾舊水，上千蚊都有，但人地好到可以著十幾年... 唔好下下覺得人地收貴你。 一天當中何時出去滑雪？ 然後幾時出去滑雪好？梗係即時睇天氣啦下話，尋晚落左成晚大雪的話，我七點出去排隊 first lift 都肯，朝早落雨下午落雪就梗係情願滑朝早都唔願滑下午，因為落完雨D雪融左變冰，然後下午温度跌會變一片大冰面... 真係唔好 set 定一個 rule 呀. 仲有，初學時會跌，通常係因為未 Master 到D skills, 唔係個地太硬，D雪太滑，旁邊D人太快。 所以，先專心學好滑雪吧？ 平時我真係無咁 Mean的，但真心的，寫文章要負責任！ 寫滑雪文章的更要有責任心也要有良心！不要為了寫而寫！ 不要拿滑雪當兒嬉！滑雪是高危運動，一個唔小心就會受傷！！所以請認真對待！如果有人因為睇完你D野跟住做而受傷，你於心何忍！？ 最後個人認為滑雪和寫文章是我人生中很神聖的兩件事！所以我特別睇唔過眼有人用佢地用得咁拿HEA！歡迎對號入座！
